ວັນທີ 25 ກຸມພາ 2021 ຄະນະກວດກາແຂວງສາລະວັນ ຈັດກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ປະຈຳປີ 2021, ໂດຍການເຂົ້າຮ່ວມເປັນປະທານຂອງ ທ່ານ ວິຊຽນ ນະວິກຸນ ຄະນະປະຈຳພັກແຂວງ ປະທານຄະນະກວດກາພັກແຂວງ, ມີບັນດາພະນັກງານນຳພາພາຍໃນຄະນະກວດກາແຂວງ ພ້ອມດ້ວຍແຂກທີ່ຖືກເຊີນຈາກພະແນກການອ້ອມຂ້າງ ແລະພະນັກງານ-ລັດຖະກອນ ພາຍໃນເຂົ້າຮ່ວມ

ທ່ານວິຊຽນ ນະວິກຸນ ໄດ້ກ່າວຈຸດປະສົງ ວ່າ: ການສ້າງແຜນກຳນົດພະນັກງານນຳພາ-ຄຸ້ມຄອງ ແມ່ນເພື່ອຄາດຄະເນເປົ້າໝາຍພະນັກງານ ທີ່ຈະຈັດວາງຕຳແໜ່ງເຂົ້າໃນພະນັກງານນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການ ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະຍາວນານ. ຈາກນັ້ນໃນກອງປະຊຸມກໍ່ໄດ້ເຜີຍແຜ່ເອກະສານ ໂດຍຕິດພັນກັບວຽກງານການສ້າງແຜນກຳນົດ ພະນັກງານນຳພາ-ຄຸ້ມຄອງ ຕໍ່ກອງປະຊຸມ ເພື່ອທົບທວນຄືນບາງເນື້ອໃນ ມະຕິຂອງກົມການເມືອງສູນກາງພັກ ສະບັບເລກທີ 032/ກມສພ, ເລກທີ 030/ກມສພ, ລົງວັນທີ 3 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານ ນຳພາ-ຄຸ້ມຄອງ, ຂໍ້ຕົກລົງຂອງປະທານຄະນະກວດກາແຂວງສາລະວັນ ວ່າດ້ວຍ: ການແຕ່ງຕັ້ງຄະນະຮັບຜິດຊອບ ສ້າງແຜນກຳນົດພະນັກງານນຳພາ-ຄຸ້ມຄອງ, ພາຍໃນຄະນະກວດກາແຂວງ ແລະ ຂໍ້ຕົກລົງ ວ່າດ້ວຍ: ການແບ່ງຄວາມຮັບຜິດຊອບຊີ້ນຳ, ປັບປຸງຊັບຊ້ອນໜ້າທີ່ຂັ້ນຫົວໜ້າຂະແໜງ ແລະວິຊາການພາຍໃນຄະນະກວດກາແຂວງ. ການສ້າງແຜນກຳນົດພະນັກງານແມ່ນຄວາມຮັບຜິດຊອບໂດຍກົງຂອງຄະນະພັກແຕ່ລະຂັ້ນ ຕາມຂອບເຂດສິດໃນການແບ່ງຂັ້ນຄຸ້ມຄອງພະນັກງານ, ປະຕິບັດຕາມຫລັກການລວມສູນປະຊາທິປະໄຕຢ່າງເຂັ້ມງວດ, ຄົ້ນຄວ້າເປົ້າໝາຍເຂົ້າໃນແຜນກຳນົດພະນັກງານເປັນໝູ່ຄະນະ ແລະຕົກລົງຕາມສຽງສ່ວນຫຼາຍ, ຮັບປະກັນຄວາມຖືກຕ້ອງ, ໂປ່ງໃສ, ພາວະວິໃສ, ຮອບດ້ານ, ຍຸຕິທຳ, ຄຳນຶງເຖິງໂຄງປະກອບ ເພດ, ເຜົ່າ ແລະເລັງໃສ່ພະນັກງານໜຸ່ມໃຫ້ກວມອັດຕາສ່ວນຫຼາຍ.ພ້ອມນັ້ນໃນພິທີ ກໍ່ໄດ້ຜ່ານມາດຖານຂອງພະນັກງານນຳພາ-ຄຸ້ມຄອງ ແລະຢາຍບັດທາບທາ ແລະດໍາເນີນການປ່ອນບັດ ເພື່ອນຳສະເໜີໃຫ້ຄະນະພັກ, ຄະນະກວດກາແຂວງ ໄດ້ຄົ້ນຄວ້າພິຈາລະນາຮັບຮອງເອົາແຜນກຳນົດພະນັກງານນຳພາຄຸ້ມຄອງ ໃຫ້ຮັບປະກັນໄດ້ຄວາມຖືກຕ້ອງ, ໂປ່ງໃສ ແລະໄດ້ຄຸນນະພາບ. saravanhnewspaper ຂ່າວພາບ: ນາງ ທິດລານີ ໂຄດໂຍທາ