ມີເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ ຄະນະຊາວໜຸ່ມ ປະຊາຊົນປະຕິວັດລາວ ແຂວງໄຊສົມບູນ ໄດ້ນຳເອົາເຄື່ອງຊ່ວຍເຫຼືອ ຈຳນວນໜຶ່ງ ເປັນຕົ້ນ ນໍ້າດື່ມ, ໝີ່ ແລະ ຜ້າປິດປາກ ລວມມູນຄ່າທັງໝົດ ຈຳນວນ 3,000, 000 ກວ່າກີບ ມາມອບໃຫ້ຄະນະສະເພາະກິດ ແຂວງໄຊສົມບູນ ໃນວັນທີ 17 ພຶດສະພາ 2021 ນີ້ ທີ່ຫ້ອງວ່າການ ແຂວງ ໂດຍການກ່າວມອບ ຂອງທ່ານ ເຍຍຊົ່ງ ຫວັງທ່າວ, ເລຂາຄະນະບໍລິຫານງານຊາວໜຸ່ມ ແຂວງ ແລະ ກ່າວຮັບໂດຍ ທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ 19 ຂັ້ນແຂວງ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.

ໂອກາດດັ່ງກ່າວ ທ່ານ ຕົ່ງມົວ ຊົວໂກ້ ໄດ້ສະແດງຄວາມຂອບອົກຂອບໃຈ ຕໍ່ຄະນະຊາວໜຸ່ມ ແຂວງໄຊສົມບູນ ທີ່ໄດ້ຊຸກຍູ້ຊ່ວຍເຫຼືອ ທາງດ້ານວັດຖຸປັດໄຈ ໃຫ້ຄະນະສະເພາະກິດ ຂອງແຂວງ ຊຶ່ງເປັນການປະກອບສ່ວນທີ່ສຳຄັນ ເຂົ້າໃນວຽກງານຕ້ານ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ 19. ພ້ອມນີ້ ຍັງສະແດງໃຫ້ເຫັນເຖິງນ້ຳໃຈເສຍສະຫຼະອັນສູງສົ່ງ ແລະ ຄວາມເປັນຫ່ວງເປັນໃຍ ຂອງຄະນະຊາວໜຸ່ມ ປະຊາຊົນປະຕິວັດລາວ ແຂວງໄຊສົມບູນ ທີ່ມີຕໍ່ຄະນະສະເພາະກິດ ຕະຫຼອດມາ. ຂະນະດຽວກັນ ທ່ານຍັງໄດ້ໃຫ້ຄຳໝັ້ນສັນຍາວ່າ ຈະນຳໃຊ້ເຄື່ອງຊ່ວຍເຫຼືອຈຳນວນດັ່ງກ່າວ ທີ່ຄະນະຊາວໜຸ່ມ ແຂວງ ນຳມາມອບໃຫ້ໃນ ຄັ້ງນີ້ ໝູນໃຊ້ເຂົ້າໃນພາລະກິດປ້ອງກັນ ການແຜ່ລະບາດຂອງພະຍາດໂຄວິດ 19 ໃຫ້ມີປະສິດທິພາບ ແລະ ເກີດປະໂຫຍດສູງສຸດ ທັງໝົດນັ້ນ ກໍເພື່ອເຮັດໃຫ້ແຂວງໄຊສົມບູນ ຫຼຸດພົ້ນອອກຈາກວິກິດການ-ການແຜ່ລະບາດຂອງພະຍາດໂຄວິດ 19 ແລະ ກ້າວສູ້ສະພາບປົກກະຕິໂດຍໄວ.