ທ່ານ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງບໍ່ແກ້ວ ພ້ອມດ້ວຍຄະນະນຳຂອງແຂວງໄດ້ລົງຢ້ຽມຢາມ ແລະ ເຮັດວຽກຢູ່ເມືອງປາກທາເມື່ອບໍ່ດົນມານີ້ ພິທີໄດ້ ຈັດຂຶ້ນທີ່ສະໂມສອນຂອງເມືອງດັ່ງກ່າວ ຊຶ່ງມີບັນດາທ່ານຄະນະປະຈຳ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການເຂົ້າຮ່ວມ.

ໂອກາດທີ່ລົງມາຢ້ຽມຢາມ ແລະ ເຮັດວຽກຢູ່ເມືອງປາກທາໃນຄັ້ງນີ້ ກໍໄດ້ຮັບການຕ້ອນຮັບຢ່າງ ອົບອຸ່ນຈາກ ທ່ານ ສຸໄລ ດວງຜາຄຳ ກຳມະການພັກແຂວງ ເລຂາພັກເມືອງ ເຈົ້າເມືອງປາກທາ ພ້ອມທັງລາຍງານສະພາບການເຄື່ອນໄຫວວຽກຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະຜ່ານມາຂອງເມືອງໂດຍຫຍໍ້ ຊຶ່ງຄະນະພັກແຕ່ລະຂັ້ນໄດ້ເອົາໃຈໃສ່ປະຕິບັດວຽກງານດ້ວຍຄວາມເປັນເຈົ້າການ, ໄດ້ນຳເອົາວຽກງານສຶກສາອົບຮົມການເມືອງແນວຄິດ ລົງໂຄສະນາສຶກສາໃຫ້ພະນັກງານ, ສະມາຊິກພັກ ຕະຫຼອດຮອດປະຊາຊົນບັນດາເຜົ່າ ໃຫ້ມີຄວາມເຂົ້າໃຈ ແລະ ເຊື່ອໝັ້ນຕໍ່ການນຳພາຂອງພັກ, ເພີ່ມທະວີການຊີ້ນຳ-ນຳພາເດັດຂາດໂດຍກົງ ແລະ ຮອບດ້ານຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ຊຶ່ງຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ຮັບປະກັນໄດ້ຄວາມປອດໄພ ແລະ ຄວາມເປັນລະບຽບຮຽບຮ້ອຍທົ່ວສັງຄົມໂດຍພື້ນຖານ.

ໂອກາດນີ້, ທ່ານ ບົວຄົງ ນາມມະວົງ ໄດ້ມີຄຳເຫັນໂອ້ລົມ ຊຶ່ງທ່ານໄດ້ສະແດງຄວາມຢ້ຽມຢາມຖາມຂ່າວ ພ້ອມທັງຊົມເຊີຍຕໍ່ກັບຄະນະນຳຂອງເມືອງໃນການຈັດຕັ້ງປະຕິບັດວຽກງານໃນໄລຍະຜ່ານມາ ພ້ອມທັງເນັ້ນໜັກ ໃຫ້ຄະນະນຳຂອງເມືອງຈົ່ງເປັນເຈົ້າການໃນການສຶກສາອົບຮົມການເມືອງແນວຄິດ ໃຫ້ພະນັກງານ, ທະຫານ, ຕຳຫຼວດ ແລະ ພໍ່ແມ່ປະຊາຊົນພາຍໃນເມືອງໃນການມີສະຕິປະຕິບັດມາດ ຕະການຕ້ານພະຍາດໂຄວິດ-19 ທີ່ພວມແຜ່ລະບາດຢູ່ໃນປັດຈຸບັນ ແລະ ວຽກງານປ້ອງກັນຊາດປ້ອງກັນຄວາມສະຫງົບຕ້ອງຮັບປະກັນໄດ້ຄວາມເປັນລະບຽບຮຽບຮ້ອຍ ແລະ ເອົາໃຈໃສ່ໃກ້ຊິດຕິດແທດກ່ຽວກັບການເກັບກຳຂໍ້ມູນຜູ້ມີສິດປ່ອນບັດ ໃຫ້ສືບຕໍ່ຊີ້ນຳ-ນຳພາສ້າງຂະບວນການຮອບດ້ານເພື່ອກະກຽມໃຫ້ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ທີ່ຈະມາເຖິງນີ້ໃຫ້ເປັນຂະບວນຟົດຟື້ນ ແລະ ໃຫ້ມີຜົນສຳເລັດ ບັນລຸໃນ 3 ຄາດໝາຍໃຫຍ່ເປັນຕົ້ນ ຜູ້ມີສິດປ່ອນບັດຕ້ອງໄປໃຊ້ສິດໃຫ້ມັນຄົບຖ້ວນ, ຮັບປະກັນບໍ່ໃຫ້ມີບັດຕາຍ, ຮັກສາຄວາມສະຫງົບ ແລະ ຄວາມປອດໄພ.

ໂອກາດທີ່ລົງເຄື່ອນໄຫວຢ້ຽມ ຢາມໃນຄັ້ງນີ້ ທ່ານເຈົ້າແຂວງບໍ່ແກ້ວ ຍັງໄດ້ມອບເຄື່ອງນຸ່ງຫົ່ມໃຫ້ກັບປະຊາຊົນ ບ້ານດອນມີໄຊ 18 ຄອບຄົວ, ບ້ານດອນສະຫວັນ 19 ຄອບຄົວ ແລະ ມອບໃຫ້ຄະນະນຳຂອງເມືອງ ເພື່ອໄປແຈກຢາຍ ໃຫ້ຄອບຄົວທຸກຍາກພາຍໃນ ເມືອງຢ່າງທົ່ວເຖິງ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)