ວັນທີ 10/3/2021 ນີ້ທາງຄະນະບໍລິຫານງານຊາວໜຸ່ມປະຊາຊົນປະຕິວັດລາວ ເມືອງນານໄດ້ນໍາເອົາເຄື່ອງນຸ່ງ ແລະ ອຸປະກອນຮັບໃຊ້ໃນການຮຽນ-ການສອນຈໍານວນໜຶ່ງໄປມອບໃຫ້ແກ່ປະຊາຊົນ ແລະ ນ້ອງນັກຮຽນບ້ານ ຫ້ວຍຄົງ ເຊິ່ງນໍາພາໂດຍ ທ່ານ ສັນຍາ ບຸນທະວີ ຮອງເລຂາຊາວໜຸ່ມເມືອງ, ພ້ອມດ້ວຍຄະນະ ໂດຍເປັນກຽດເຂົ້າຮ່ວມຂອງ ທ່ານ ວິລະສິດ ພັນທຸລີ ກໍາມະການພັກເມືອງ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ຜູ້ຊີ້ນໍາກຸ່ມພັດທະນາຄົກຕົມ ມີທ່ານ ນາຍບ້ານໆ ຫ້ວຍຄົງ ພ້ອມດ້ວຍຄະນະ, ພໍ່ແມ່ປະຊາຊົນ ແລະ ນ້ອງນັກຮຽນເຂົ້າຮ່ວມ.


ບ້ານຫ້ວຍຄົງ ເມືອງນານ ແຂວງຫຼວງພະບາງ ແມ່ນບ້ານໜຶ່ງທີ່ຕັ້ງຢູ່ຫ່າງຈາກເທດສະບານເມືອງນານປະມານ 27 ກິໂລແມັດ ທິດເໜືອຕິດກັບ ບ້ານໜອງຊາຍ, ທິດໃຕ້ຕິດກັບ ບ້ານຄໍແລ, ທິດຕາເວັນອອກຕິດກັບ ບ້ານນານວນ ແລະ ທິດຕາເວັນຕົກຕິດກັບ ບ້ານຄົກຢາ ພາຍໃນບ້ານມີທັງໝົດ 61 ຄອບຄົວ, ມີພົນລະເມືອງທັງໝົດ 321 ຄົນ, ຍິງ 164 ຄົນ ປະຊາຊົນທັງໝົດແມ່ນເຜົ່າກຶມມຸ, ອາຊີບຕົ້ນຕໍແມ່ນທໍາການຜະລິດ ປູກຝັງ ແລະ ລ້ຽງສັດ.

ເຊິ່ງເຄື່ອງທີ່ນໍາມາມອບໃນຄັ້ງນີ້ລວມມູນຄ່າທັງໝົດ 5 ລ້ານກ່ວາກີບ ແລະ ພິທີມອບແມ່ນໄດ້ຈັດຂຶ້ນຢູ່ທີ່ໂຮງຮຽນ ບ້ານຫ້ວຍຄົງ ໂດຍການເປັນກຽດຂຶ້ນມອບຂອງ ທ່ານ ສັນຍາ ບຸນທະວີ ຮອງເລຂາຊາວໜຸ່ມເມືອງ ໃຫ້ແກ່ນາຍບ້ານໆຫ້ວຍຄົງ ແລະ ນ້ອງນັກຮຽນ ຈາກນັ້ນ ທ່ານ ນາຍບ້ານໆ ຫ້ວຍຄົງກໍໄດ້ກ່າວສະແດງຄວາມຂອບໃຈນໍາທາງຄະນະບໍລິຫານງານຊາວໜຸ່ມເມືອງ ແລະ ທ່ານ ວິລະສິດ ພັນທຸລີ ກໍາມະການພັກເມືອງ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ຜູ້ຊີ້ນໍາກຸ່ມພັດທະນາຄົກຕົມ ທີ່ສະຫຼະເວລາອັນມີຄຸນຄ່ານໍາເອົາເຄື່ອງມາມອບໃຫ້ແກ່ປະຊາຊົນ ແລະ ນ້ອງນັກຮຽນໃນຄັ້ງນີ້.
ພາບ-ຂ່າວ: ເມືອງນານ