ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ເພື່ອປະກອບສ່ວນຊ່ວຍເຫລືອເຂົ້າໃນວຽກງານຕ້ານ, ສະກັດກັ້ນ, ປ້ອງກັນ ການແຜ່ລະບາດພະຍາດໂຄວິດ-19 ທີ່ກຳລັງແຜ່ລະບາດໃນທົ່ວໂລກ, ທົ່ວປະເທດລາວ ເວົ້າສະເພາະກໍ່ຄືແຂວງສາລະວັນ ທີ່ກຳລັງພົບກັບບັນຫາພະຍາດໂຄວິດ-19. ຍ້ອນເຫັນໄດ້ຄວາມສຳຄັນຄືແນວນັ້ນ ທາງຄະນະບໍລິຫານງານຊາວໜຸ່ມແຂວງສາລະວັນ ໄດ້ນໍາເອົາຜ້າອັດປາກ-ອັດດັງ 3 ແກັດ ຈໍານວນ 150 ກັບ, ເຈວລ້າງມື 10 ຕຸກ ລວມມູນຄ່າທັງໝົດ 2,500,000 ກີບ ມາມອບໃຫ້ແຂວງສາລະວັນ ໂດຍການມອບຂອງທ່ານ ຈັນທະວອນ ສີຫາຈັກ ຮັກສາການເລຂາ ຄຊປປລ ແຂວງ ພ້ອມຄະນະ ຮັບໂດຍ ທ່ານ ສົມໃຈ ອຸ່ນຈິດ ຮອງເຈົ້າແຂວງ ຫົວໜ້າຄະນະສະເພາະກິດໂຄວິດ-19.

ໃນໂອກາດດຽວກັນນີ້ ທ່ານ ກໍ່ໄດ້ສະແດງຄວາມຂອບໃຈ ຍ້ອງຍໍຊົມເຊີຍ ທາງຄະນະບໍລິຫານງານຊາວໜຸ່ມແຂວງສາລະວັນ ທີ່ໃຫ້ການຊ່ວຍເຫຼືອທາງດ້ານວັດຖຸ, ອຸປະກອນ ໃຫ້ກັບແຂວງສາລະວັນ, ເຄື່ອງຈຳນວນດັ່ງກ່າວ ແມ່ນຈະນຳໄປມອບໃຫ້ກັບໜ່ວຍງານແພດໝໍ, ທະຫານ, ຕຳຫວດ ແລະໜ່ວຍງານອື່ນໆ ທີ່ປະຕິບັດໜ້າທີ່ຕົວຈິງໃຫ້ເກີດຜົນປະໂຫຍດສູງສຸດ. ພິທີດັ່ງກ່າວແມ່ນຈັດຂຶ້ນໃນວັນທີ 4 ພຶດສະພາ 2021 ຢູ່ທີ່ຫ້ອງວ່າການແຂວງສາລະວັນ.