ມີເດຍລາວແຂວງຫຼວງພະບາງ ທ້າວ​ ບຸນມີ​ ໄຊຍະກຸມມານ ນັກຂ່າວ​ ຄ.​ອ. ຂ ຫຼວງພະບາງ.
ວັນທີ 22-23 ມິຖຸນາ ຜ່ານມານີ້ ຢູ່ສະໂມສອນໃຫຍ່ ຂອງເມືອງປາກແຊງ ໄດ້ຈັດຕັ້ງພິທີເຜີຍແຜ່, ມະຕິກອງປະຊຸມໃຫຍ່ XI ຂອງພັກ, ມະຕິ VIII ຂອງອົງພັກແຂວງຫຼວງພະບາງ ແລະມະຕິ VI  ຂອງອົງຄະນະພັກເມືອງປາກແຊງ ມີ ສະຫາຍ​ນາງ​ ວຽນວິໄລ​ ດີລະພັນ​ ກຳມະການປະຈຳພັກແຂວງ, ສະມາຊິກສະພາ​ ເຂດເລືອກຕັ້ງທີ​ 6 ແຂວງຫຼວງພະບາງ,​ ຫົວຫນ້າຄະນະໂຄສະນາອົບຮົມ​ແຂວງ,​ ສະຫາຍ ສຸກດາວັນ ພັນຈັກຂັນ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງປາກແຊງ, ພ້ອມດ້ວຍ ກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າກອງບັນຊາການ-ຫ້ອງການອ້ອມຂ້າງເມືອງ ເຂົ້າຮ່ວມ.

ພິທີ ໄດ້ຮັບຟັງການເຜີຍແຜ່ ມະຕິກອງປະຊຸມໃຫຍ່ ສະໄໝ XI ຂອງພັກ, ມະຕິ VIII ຂອງອົງພັກແຂວງຫຼວງພະບາງ ແລະ ມະຕິ VI ຂອງອົງຄະນະພັກເມືອງປາກແຊງ ເພື່ອປະຕິບັດເນື້ອໃນຂອງມະຕິກົມການເມືອງສູນກາງພັກ, ກໍ່ຄືແຜນພັດທະນາເສດຖະກິດ-ສັງຄົມໃນໄລຍະ 5 ປີ ຂອງແຂວງຫຼວງພະບາງ ໂດຍສະເພາະ ແຜນພັດທະນາເສດທະກິດ-ສັງຄົມ 5 ປີ ຂອງເມືອງ ແລະຕີລາຄາຄືນຄວາມຮັບຜິດຊອບໜ້າທີ່ການເມືອງ, ການຈັດຕັ້ງປະຕິບັດວຽກງານ ແຕ່ລະຂົງເຂດວຽກງານໃນໄລຍະຜ່ານມາ, ການກຳນົດທິດທາງແຜນການວຽກງານຈຸດສຸມ, ຄາດໝາຍສູ້ຊົນ ຕ້ອງເຮັດບັນລຸຕາມແຜນການທີ່ວາງໄວ້, ການແບ່ງງານ ແບ່ງຄວາມຮັບຜິດຊອບໃຫ້ຄະນະພັກແຕ່ລະຂັ້ນ ເພື່ອຍົກສູງຄຸນນະພາບ, ສ້າງການຫັນປ່ຽນໃໝ່ແບບແຜນ ແລະວິທີການນໍາພາ ຂອງຄະນະພັກແຕ່ລະຂັ້ນ ໃຫ້ມີປະສິດພາບສູງກວ່າເກົ່າ, ເສີມຂະຫຍາຍປະຊາທິປະໄຕໃຫ້ຄະນະພັກແຕ່ລະຂັ້ນ ໄດ້ຮັບຮູ້ການເຄື່ອນໄຫວນໍາພາລວມ ແລະຄວາມຮັບຜິດຊອບການເມືອງ, ທີ່ໄດ້ຮັບການມອບໝາຍ ຂອງຄະນະພັກແຕ່ລະຂັ້ນ ເພື່ອເສີມຂະຫຍາຍດ້ານດີທີຕັ້ງໜ້າ ແລະແກ້ໄຂຈຸດອ່ອນຂໍ້ຄົງຄ້າງ ໃຫ້ທັນກັບສະພາບການຄວາມເປັນຈິງໃນແຕ່ລະຂົງເຂດ ຄວາມຮັບຜິດຊອບຂອງຕົນ.

ຈາກນັ້ນທ່ານຍັງໄດ້ລາຍງານວຽກງານສະພາແຫ່ງຊາດກ່ຽວກັບຜົນສຳເລັດຂອງການເລືອກຕັ້ງ ແລະ​ ຢ້ັງຢືນຄຸນລັກສະນະຂອງສະມາຊິກສະພາແຫ່ງຊາດ​ ຊຸດທີ​ IX​ ຈຳນວນ​ 164 ທ່ານ,​ ຍິງ​ 36 ທ່ານ​ ແລະ​ ສະມາຊິກສະພາປະຊາຊົນແຂວງ ຊຸດທີ​ II​ ຈຳນວນ​ 492 ທ່ານ,​ ຍິງ​ 150 ທ່ານ​ ແລະ​ ຍັງລາຍງານກ່ຽວກັບຜົນສຳເລັດຂອງການເລືອກຕັ້ງ ແລະ​ ຢັ້ງຢືນຄຸນລັກສະນະ ໃນການເລືອກຕັ້ງຄັ້ງນີ້ມີຜູ້ສະຫມັກຮັບເລືອກຕັ້ງໄດ້ເປັນສະມາຊິກສະພາແຫ່ງຊາດຊຸດທີ IX​ ປະຈຳເຂດເລືອກຕັ້ງທີ 6 ຈຳນວນ​ 10 ທ່ານ,​ ຍິງ​ 03 ທ່ານ​ ແລະ​ ສະມາຊິກສະພາປະຊາຊົນແຂວງ​ ຊຸດທີ​ II​ ຈຳນວນ​ 33 ທ່ານ,​ ຍິງ​ 09​ ທ່ານ.​

ຕອນທ້າຍ ສະຫາຍ​ ນາງ​ ວຽນວິໄລ​ ດີລະພັນ ໄດ້ຍ້ອງຍໍຊົມເຊີຍ ຜົນງານທີ່ອົງຄະນະພັກເມືອງປາກແຊງຍາດມາໄດ້ໃນໄລຍະຕົ້ນ ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຂອງເມືອງ ແລະມີຄໍາເຫັນຊີ້ນໍາໃຫ້ສືບຕໍ່ ເອົາໃຈໃສ່ບາງວຽກງານຕື່ມ ເປັນຕົ້ນ ການສັງລວມບັນຫາປະກົດການຫຍໍ້ທໍ້ ທີ່ເກີດຊື້ນຢູ່ພາຍໃນເມືອງ ເພື່ອແກ້ໄຂໃຫ້ທັນການ, ເພີ່ມທະວີການຕ້ານ ແລະສະກັດກັ້ນພະຍາດໂຄວິດ 19, ຊຸກຍູ້ສົ່ງເສີມ ໃຫ້ມີຄອບຄົວຕົວແບບການປູກຝັງລ້ຽງສັດ, ຕັ້ງໜ້າສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະຈັດຕັ້ງປະຕິບັດແຜນການ 5 ປີ ຂອງແຕ່ລະຂົງເຂດວຽກງານ ໃຫ້ໄດ້ຮັບຜົນດີ.