ໃນວັນທີ 24 ກຸມພາ 2021 ນີ້ ຄະນະບໍລິຫານງານສະຫະພັນແມ່ຍິງແຂວງວຽງຈັນ ຊຸດທີ VII ໄດ້ພ້ອມກັນທາບທາມຮ່າງເນື້ອໃນເອກະສານກອງປະຊຸມໃຫຍ່ແມ່ຍິງລາວທົ່ວປະເທດ ສະໄໝທີ VIII ໂດຍການເປັນປະທານຂອງ ທ່ານ ນາງ ມະໄລສີ ທຳມະໂຄດ ກຳມະການພັກແຂວງ, ປະທານສະຫະພັນແມ່ຍິງແຂວງວຽງຈັນ, ມີບັນດາທ່ານໃນຄະນະບໍລິຫານງານສະຫະພັນແມ່ຍິງແຂວງວຽງຈັນ ຊຸດທີ VII ຈຳນວນ 26 ທ່ານ ເຂົ້າຮ່ວມ.

ຮ່າງເນື້ອໃນເອກະສານທີ່ໄດ້ພ້ອມກັນທາບທາມຄັ້ງນີ້ ມີຮ່າງບົດລາຍງານການເມືອງທັງ 2 ພາກ ຕໍ່ກອງປະຊຸມໃຫຍ່ແມ່ຍິງລາວທົ່ວປະເທດ ສະໄໝທີ VIII, ຮ່າງບົດສະຫລູບການຈັດຕັ້ງປະຕິບັດແຜນພັດທະນາແມ່ຍິງລາວ 5 ປີ ຜ່ານມາ ( 2016-2020 ) ແລະ ແຜນພັດທະນາແມ່ຍິງແຫ່ງຊາດ 5 ປີ ຕໍ່ໜ້າ ( 2021-2025 ) ແລະ ຮ່າງກົດລະບຽບຂອງສະຫະພັນແມ່ຍິງລາວ ສະໄໝທີ VIII, ເຊິ່ງໄດ້ພ້ອມກັນຮັບຟັງການຜ່ານບັນດາຮ່າງເອກະສານດັ່ງກ່າວ, ຫລັງຈາກນັ້ນບັນດາທ່ານໃນຄະນະບໍລິຫານງານສະຫະພັນແມ່ຍິງແຂວງວຽງຈັນໄດ້ພ້ອມກັນຄົ້ນຄວ້າ, ປະກອບຄຳຄິດ, ຄຳເຫັນ ໃສ່ຮ່າງເອກະສານດັ່ງກ່າວ ເພຶ່ອສ້າງຄວາມເປັນເອກະພາບກັນ ເຮັດໃຫ້ມີເນື້ອໃນກະທັດຮັດ, ຄົບຖ້ວນ ,ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງຂອງວຽກງານໃນແຕ່ລະດ້ານ ເພຶ່ອກະກຽມຄວາມພ້ອມໃຫ້ແກ່ການດຳເນີນກອງປະຊຸມໃຫຍ່ແມ່ຍິງລາວທົ່ວປະເທດສະໄໝທີ VIII ທີ່ຈະໄຂຂຶ້ນໃນຕໍ່ໜ້ານີ້.