ກອງປະຊຸມແບບທາງໄກ (ວີດີໂອອອນລາຍ) ລັດຖະມົນຕີ ສະພາປະຊາຄົມວັດທະນະ ທຳ-ສັງຄົມອາຊຽນຄັ້ງທີ 25 ແລະ ກອງປະຊຸມປີ່ນອ້ອມອື່ນໆ ໄດ້ຈັດຂຶ້ນໃນວັນທີ 30-31 ມີນາ 2021, ພາຍໃຕ້ການເປັນປະທານ ຂອງປະເທດບຣູໄນ ດາລູສະລາມ, ພາຍໃຕ້ຄໍາຂວັນ: ພວກເຮົາຫ່ວງໄຍ, ພວກເຮົາກຽມພ້ອມ, ພວກເຮົາພ້ອມກັນຈະເລີນຮຸ່ງເຮືອງ (We Care, We Prepare, We Prosper), ຄະນະຜູ້ແທນລາວນຳໂດຍ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍເຈົ້າໜ້າອາວຸໂສປະຊາຄົມວັດທະນະທຳ-ສັງຄົມອາຊຽນ ສປປ ລາວ ເຂົ້າຮ່ວມ.

ກອງປະຊຸມຄັ້ງນີ້, ໂດຍການເປັນປະທານຂອງ ທ່ານ ດາໂຕະ ເສຣິ ພາດູກາ ຮາຈິ ອາບິດິນ ລັດຖະມົນຕີ ກະຊວງວັດທະນະທຳ, ຊາວໜຸ່ມ ແລະ ກິລາ ແຫ່ງ ບຣູໄນ ດາລູສາລາມ ແລະ ໄດ້ພິຈາລະນາຮັບຮອງບັນດາເອກະສານສຳຄັນຂອງອາຊຽນ ທີ່ຂະແໜງການກ່ຽວຂ້ອງ ພາຍໃຕ້ເສົາຄ້ຳວັດທະນະທຳ-ສັງຄົມອາຊຽນ.

ໃນໂອກາດນີ້, ສປປ ລາວ ໄດ້ຄົ້ນຄວ້າພິຈາລະນາລະອຽດ ເພື່ອສະເໜີ ໃຫ້ຜູ້ນຳອາຊຽນຮັບຮອງ ແລະ ຮັບຊາບທີ່ກອງປະຊຸມສຸດຍອດຜູ້ນຳອາຊຽນຄັ້ງທີ 38 ແລະ ກອງປະຊຸມສຸດຍອດ ທີ່ກ່ຽວຂ້ອງ ຄື: ແຜນງານຮອບດ້ານວ່າດ້ວຍຄວາມຫວ່ງໄຍດ້ານເສດຖະກິດ, ແຜນນະໂຍບາຍພາກພື້ນວ່າດ້ວຍການສົ່ງເສີມຄວາມເຂົ້າໃຈໃຫ້ຫລາຍຂື້ນ, ຄວາມອົດທົນ ແລະ ຄວາມຮູ້ສຶກຂອງວາລະພາກພື້ນໃນບັນດາປະຊາຊົນອາຊຽນ, ຖະແຫລງການຮ່ວມອາຊຽນ ທີ່ຈະສະເໜີຕໍ່ກອງປະຊຸມລັດພາຄີຕໍ່ສົນທິສັນ ຍາສະຫະປະຊາຊາດ ດ້ານການປ່ຽນແປງດິນຟ້າອາກາດຄັ້ງທີ 26, ຖະແຫລງການຮ່ວມອາຊຽນ ທີ່ຈະສະເໜີຕໍ່ກອງປະຊຸມລັດພາຄີຕໍ່ສົນທິສັນຍາ ດ້ານຄວາມຫລາກຫລາຍທາງຊີວະນານາພັນ, ຖະແຫລງ ການຜູ້ນຳອາຊຽນ ວ່າດ້ວຍຄວາມສຳຄັນຂອງສະຖາບັນຄອບຄົວ ເພື່ອການພັດທະນາປະຊາຄົມ ແລະ ສ້າງສາປະເທດຊາດ, ຖະແຫລງການອາຊຽນ ວ່າດ້ວຍການສົ່ງເສີມແຮງງານ ເພື່ອການແຂ່ງຂັນ, ຄວາມເຂັ້ມແຂງດ້ວຍຕົນເອງ ແລະ ຄ່ອງແຄ້ວ ຕໍ່ວຽກງານໃນອະນາຄົດ, ຖະແຫລງການຂອງຜູ້ນຳອາຊຽນວ່າດ້ວຍການປະຕິຮູບ ແລະ ທາງເລືອກໃນການຜະລິດອາຫານ ແລະ ເຄື່ອງດື່ມເພື່ອສຸຂະພາບ, ຖະແຫລງການຂອງຜູ້ນຳອາຊຽນ ວ່າດ້ວຍການລົບລ້າງການຂົ່ມເຫັງໃນອາຊຽນ, ແຜນງານຍຸດທະສາດອາຊຽນ ວ່າດ້ວຍການເຊື່ອມສານບົດບາດຍິງ-ຊາຍ, ມຸມມອງບົດບາດຍິງ- ຊາຍ ຂອງອາຊຽນ ເພື່ອບັນລຸເປົ້າໝາຍການພັດທະນາແບບຍືນຍົງ ສຳລັບທຸກກຸ່ມຄົນ ແລະ ບໍ່ປະໃຫ້ແມ່ຍິງ ຫລື ເດັກຍິງ ຢູ່ຂ້າງຫລັງ, ແຜນງານການຈັດຕັ້ງປະຕິບັດຖະແຫລງການຮ່າໂນຍ ວ່າດ້ວຍການສົ່ງເສີມວຽກງານທາງສັງຄົມສູ່ປະຊາຄົມອາຊຽນທີ່ໜຽວແໜ້ນ ແລະ ຕອບສະໜອງຕໍ່ສະພາບການ, ແຜນປະຕິບັດງານພາກພື້ນວ່າດ້ວຍການຈັດຕັ້ງປະຕິບັດຖະແຫລງການອາຊຽນ ວ່າດ້ວຍສິດທິເດັກໃນການເຄື່ອນຍ້າຍຖິ່ນຖານ 2021-2025, ແຜນປະຕິບັດງານພາກພື້ນວ່າດ້ວຍການປົກປ້ອງເດັກ ຈາກທຸກຮູບແບບໃນການລ່ວງລະເມີດ ແລະ ຂູດຮີດທາງເພດ ໂດຍຜ່ານສື່ອອນລາຍໃນອາຊຽນ ປີ 2021-2025, ແຜນແມ່ບົດວ່າດ້ວຍການພັດທະນາຊົນນະບົດ ແລະ ລຶບລ້າງຄວາມທຸກຍາກ, ມຸມມອງການພັດທະນາອາຊຽນ ເພື່ອເປີດກວ້າງ ແລະ ການພັດທະນາຍືນຍົງ, ບົດສຶກສາພາກພື້ນອາຊຽນວ່າດ້ວຍແມ່ຍິງ, ສັນຕິພາບ ແລະ ຄວາມໝັ້ນຄົງ, ແຜນປະຕິບັດງານພາກພື້ນ ເພື່ອຈັດຕັ້ງປະຕິບັດຖະແຫລງການກົວລາລໍາເປີ ວ່າດ້ວຍຜູ້ສູງອາຍຸ ເພື່ອການສ້າງຄວາມເຂັ້ມແຂງໃຫ້ແກ່ຜູ້ສູງອາຍຸໃນອາຊຽນ, ບົດລາຍງານການສຳຫລວດຄັ້ງທີ 5 ຂອງ ດັດຊະນີການພັດທະນາຊາວໜຸ່ມອາຊຽນ ເພື່ອຄວາມຮັບຮູ້-ເຂົ້າໃຈ, ຄຸນຄ່າ ແລະ ເອກະລັກອາຊຽນ, ແຜນງານການຮ່ວມມືປະຈຳປີອາຊຽນ-ສະຫະພັນບານເຕະສາກົນ (FIFA) ໃນການຈັດຕັ້ງປະຕິບັດບົດບັນທຶກຄວາມເຂົ້າໃຈອາຊຽນ-ສະຫະພັນບານເຕະສາກົນ, ບົດບັນທຶກຄວາມເຂົ້າໃຈອາຊຽນ ແລະ ອົງການຕ້ານສານກະຕຸ້ນໂລກ, ແຜນງານສົ່ງເສີມຄວາມສາມາດເຂົ້າເຖິງທຸກຄົນໃນວຽກງານການກະຈາຍສຽງ-ພາບດິຈິຕອນອາຊຽນ, ແຜນງານການພັດທະນາຄວາມພ້ອມທາງດ້ານດິຈິຕອນຂອງພົນລະເມືອງອາຊຽນ, ແຜນປະຕິບັດງານພາກພື້ນອາຊຽນ ວ່າດ້ວຍການປັບຕົວຕໍ່ໄພແຫ້ງແລ້ງ, ຖະແຫລງການຮ່ວມວ່າດ້ວຍສານເຄມີ ແລະ ສິ່ງເສດເຫລືອ ທີ່ຈະສະເໜີຕໍ່ກອງປະຊຸມລັດພາຄີປີ 2021 ຕໍ່ສົນທິສັນຍາບາເຊວ, ຣອດເຕີດາມ ແລະ ສະຕອກໂຮມ, ແຜນປະຕິບັດງານພາກພື້ນອາຊຽນວ່າດ້ວຍ ການກໍາຈັດສິ່ງເສດເຫລືອທາງທະເລ, ບົດລາຍງານການປ່ຽນແປງດິນຟ້າອາກາດອາຊຽນ, ແຜນງານຂອງບັນດາຂະແໜງການ ປະຊາຄົມວັດທະນະທຳ-ສັງຄົມອາຊຽນ, ແຜນງານສະພາອາຊີວິສຶກສາອາຊຽນ 2021-2025, ບົດລາຍງານ ກ່ຽວກັບການຕິດຕາມຕໍ່ກັບຂໍ້ສະເໜີແນະຂອງການປະເມີນຜົນກາງສະໄໝ ການຈັດຕັ້ງປະຕິບັດແຜນແມ່ບົດປະຊາຄົມວັດທະນະທຳ-ສັງຄົມອາຊຽນ 2025,ບົດລາຍງານຜົນຂອງກອງປະຊຸມສະພາປະຊາຄົມວັດທະນະທຳ-ສັງຄົມອາຊຽນ ຄັ້ງທີ 25.

ໃນໂອກາດນີ້, ຄະນະຜູ້ແທນລາວ ໄດ້ປະກອບຄຳເຫັນຕໍ່ກອງປະຊຸມວ່າ: ສປປ ລາວ ເຫັນດີສະໜັບສະໜູນກ່ຽວກັບບັນດາວຽກງານບູລິມະສິດ ແລະ ຂໍ້ລິເລີ່ມຕ່າງໆ, ເພື່ອພ້ອມກັນຊອກຫາວິທີການຕ່າງໆ ເຮັດໃຫ້ພົນລະເມືອງອາຊຽນມີຄວາມວັດທະນະຖາວອນ ແລະ ນັບຕັ້ງແຕ່ກອງປະຊຸມລັດຖະມົນຕີ ສະພາປະຊາຄົມວັດທະນະທຳ-ສັງຄົມອາຊຽນ ຄັ້ງທີ 24 ພາຍໃຕ້ການເປັນປະທານຂອງ ສສ ຫວຽດນາມ ໃນຫົວຂໍ້: “ປະຊາຄົມອາຊຽນ ທີ່ໜຽວແໜ້ນ ແລະ ຕອບສະໜອງຕໍ່ສະພາບການ”, ເອກະສານສຳຄັນຈຳນວນຫລາຍສະບັບໃນຂົງເຂດວຽກງານຂອງເສົາຄ້ຳວັດທະນະທຳ-ສັງຄົມອາຊຽນ ໄດ້ຖືກຮັບຮອງ ແລະ ຮັບຊາບ ຈາກບັນດາທ່ານຜູ້ນຳອາຊຽນ ທີ່ກອງປະຊຸມສຸດຍອດອາຊຽນຄັ້ງທີ 37 ໃນເດືອນພະຈິກ 2020, ຊຶ່ງເລັ່ງໃສ່ເປັນການສ້າງໄດ້ການປະກອບສ່ວນ ເຂົ້າໃນການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດປະຊາຄົມວັດທະນະທໍາ-ສັງຄົມອາຊຽນ 2025 ໃຫ້ປະກົດຜົນເປັນຈິງ ແລະ ມີບາດກ້າວເຕີບໃຫຍ່ກວ່າເກົ່າ.ສປປ ລາວ ໄດ້ປະຕິບັດພັນທະປະກອບສ່ວນເປັນປົກກະຕິ ແລະ ເປັນໄປຕາມຍຸດທະສາດທິດທາງລວມ ແລະ ຈຸດຢືນຂອງອາຊຽນ. ໂດຍສະເພາະ, ເພື່ອເພີ່ມທະວີຄວາມເອົາໃຈໃສ່ ແລະ ຮັດ ແໜ້ນການເຮັດວຽກຮ່ວມມືຢ່າງໃກ້ຊິດກັບບັນດາປະເທດສະມາຊິກອາຊຽນ ແລະ ຄູ່ຮ່ວມເຈລະຈາ. ຕໍ່ກັບວຽກງານການປູກຈິດສຳນຶກໃຫ້ແກ່ປະຊາຊົນອາຊຽນ ກ່ຽວກັບຜົນກະທົບ ແລະ ຜົນເສຍຫາຍຈາກການລະບາດຂອງພະຍາດໂຄວິດ-19.

ບັນດາຂະແໜງການທີ່ກ່ຽວຂ້ອງ ພາຍໃຕ້ເສົາຄ້ຳວັດທະນະທຳ-ສັງຄົມອາຊຽນ, ສປປ ລາວ ໄດ້ເຮັດໜ້າທີ່ອັນສໍາຄັນໃນການຫລຸດຜ່ອນ ແລະ ຜ່ອນຜັນຜົນກະທົບດ້ານຕ່າງໆຈາກການລະບາດດັ່ງກ່າວ, ສື່ມວນຊົນລາວ ໄດ້ເອົາໃຈໃສ່ປະຕິບັດໜ້າໃນການເຜີຍແຜ່ບັນດາຄຳສັ່ງ, ຄໍາແນະນຳ ແລະ ຂໍ້ມູນຂ່າວສານທີ່ເປັນປະໂຫຍດເປັນຈິງ ໃຫ້ແກ່ພໍ່ແມ່ປະຊາຊົນຢ່າງກວ້າງຂວາງໃນເວລາມີການລະບາດຮ້າຍແຮງ. ໃນຂະນະດຽວກັນນັ້ນ, ຄະນະຊ່ຽວຊານດ້ານການແພດກໍໄດ້ສຸມຄວາມພະຍາຍາມ ແລະ ຄວາມຮັບຜິດຊອບສູງ ປະກອບສ່ວນເຂົ້າໃນວຽກງານຮັກສາປິ່ນປົວກໍລະນີທີ່ມີຜູ້ຕິດເຊື້ອພະຍາດດັ່ງກ່າວ ທີ່ພົບຢູ່ພາຍໃນປະເທດ, ພ້ອມນັ້ນ ລັດຖະບານລາວ ໄດ້ມີການນໍາພາຈັດຕັ້ງປະຕິບັດບັນດາມາດຕະການປ້ອງກັນ ແລະ ສະກັດກັ້ນຢ່າງຈິງຈັງ ແລະ ເປັນປົກ ກະຕິ ເພື່ອປ້ອງກັນການລະບາດພະຍາດດັ່ງກ່າວຢ່າງມີປະສິດທິຜົນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)