ມີເດຍລາວ ສາລະວັນ – ຂ່າວໂດຍ: ນາງກິນດາວັນ ວັນນາຄູ ວັນທີ 25 ກຸມພານີ້ ຄະນະພັກຮາກຖານພັກ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສາລະວັນ ໄດ້ຈັດພິທີເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ ຈໍານວນ 6 ສະຫາຍ ທີ່ຜ່ານສະໄໝສໍາຮອງຖືກຕ້ອງຕາມລະບຽບຂອງພັກປະຊາຊົນ ປະຕິວັດລາວ ໃຫ້ກຽດເຂົ້າຮ່ວມມີ ສະຫາຍ ມະໄລວອນ ສີປະເສີດ ກຳມະການພັກແຂວງ ເລຂາຄະນະພັກຮາກຖານ ຮັກສາການຫົວໜ້າພະແນກ ຖວທ ແຂວງ, ມີຜູ້ຕາງໜ້າຈາກຄະນະໂຄສະນາອົບຮົມແຂວງ, ຄະນະຈັດຕັ້ງແຂວງ ແລະສະມາຊິກພັກ ເຂົ້າຮ່ວມ.ໃນພິທີໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການເລື່ອນສະມາຊິກພັກສໍາຮອງ ຂຶ້ນເປັນສະມາຊິກພັກສົມບູນ ທັງ 6 ສະບັບ ແລະ ຢັ້ງຢືນຮັບເອົາສະມາຊິກພັກສົມບູນ.

ເຊີ່ງສະມາຊິກພັກສົມບູນ 6 ສະຫາຍ ມາຈາກ 4 ໜ່ວຍພັກ ອ້ອມຂ້າງຄະນະພັກຮາກຖານ ພະແນກ ຖວທ ແຂວງ ຄື: ມາຈາກໜ່ວຍພັກຖະແຫຼງຂ່າວ-ສື່ມວນຊົນ 2 ສະຫາຍ, ໜ່ວຍພັກວັດທະນະທຳ 1 ສະຫາຍ, ໜ່ວຍພັກຄຸ້ມຄອງບໍລິຫານ 2 ສະຫາຍ ແລະ ມາຈາກໜ່ວຍພັກທ່ອງທ່ຽວ 1 ສະຫາຍ. ຜ່ານການຕິດຕາມກໍ່ສ້າງ ໃນໄລຍະ 12 ເດືອນ ຕາມກົດລະບຽບຂອງພັກປະຊາຊົນ ປະຕິວັດລາວ ເຫັນວ່າ: ມີຄວາມຕື່ນຕົວທາງດ້ານການເມືອງ- ແນວຄິດ, ການຈັດຕັ້ງປະຕິບັດລະບຽບຂອງພັກ, ກົດໝາຍຂອງລັດ, ຄຸນສົມບັດສິນທຳປະຕິວັດ, ມີຄວາມສາມັກຄີພາຍໃນ ແລະນອກຢ່າງກວ້າງຂວາງ, ມີແບບແຜນວິທີເຮັດວຽກ, ສູ້ຊົນເຮັດສຳເລັດໜ້າທີ່ວຽກງານທີ່ໄດ້ຮັບການມອບໝາຍຈາກຂັ້ນເທິງດ້ວຍຄວາມຮັບຜິດຊອບສູງ. ມີຄວາມເປັນແບບຢ່າງໃຫ້ແກ່ມະຫາຊົນ, ໄດ້ເປັນກຳລັງຫຼັກ ໃຫ້ແກ່ອົງການຈັດຕັ້ງພັກ, ອົງການຈັດຕັ້ງມະຫາຊົນ.ໃນຕອນທ້າຍ ສະຫາຍມະໄລວອນ ສີປະເສີດ ກຳມະການພັກແຂວງ ຮັກສາການຫົວໜ້າພະແນກ ຖວທ ແຂວງ ໄດ້ເນັ້ນໃຫ້ສະມາຊິກພັກທຸກສະຫາຍ ຄົ້ນຄວ້າເຊື່ອມຊຶມແນວທາງນະໂຍບາຍ, ມະຕິ, ຄຳສັ່ງຂອງພັກ, ລັດຖະທຳມະນູນ ແລະກົດໝາຍຂອງລັດ, ເອົາໃຈໃສ່ປະຕິບັດຕາມສິດ ແລະ ໜ້າທີ່ສະມາຊິກພັກ, ເປັນແບບຢ່າງທີ່ດີ, ສືບຕໍ່ສ້າງຕົນເອງໃຫ້ກາຍເປັນສະມາຊິກພັກທີ່ດີເດັ່ນ ພ້ອມດຽວກັນນັ້ນ ກໍ່ຕ້ອງເອົາໃຈໃສ່ປະຕິບັດໜ້າທີ່ວິຊາສະເພາະດ້ວຍຄວາມເປັນເຈົ້າການ, ຄວາມຮັບຜິດຊອບ ແລະ ຮັດແໜ້ນຄວາມສາມັກຄີ, ຄວາມເປັນປຶກແຜ່ນ ພ້ອນກັນປະຕິບັດໜ້າທີ່ໆພັກ ແລະ ລັດ ກໍ່ຄືການຈັດຕັ້ງ ມອບໝາຍໃຫ້ຢ່າງມີຜົນສຳເລັດ.