ມີເດຍລາວແຂວງເຊກອງ ພາບ-ຂ່າວ: ເຈີນ ແດນວົງວິຈິດ
ໃນວັນທີ 28 ເມສາ 2021 ນີ້, ທ່ານ ດົງເພັດ ພະຍົນ ຮອງເລຂາພັກແຂວງ,ປະທານສະພາປະຊາຊົນແຂວງ,ຮອງຫົວໜ້າຄະນະສະເພາະກິດປ້ອງກັນ ແລະ ຄວບຄຸມການແຜ່ລະບາດພະຍາດໂຄວິດ 19 ຂັ້ນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວ ແລະ ເຮັດວຽກຢູ່ເມືອງທ່າແຕງ, ເຊິ່ງໃຫ້ກຽດຕ້ອນຮັບໂດຍທ່ານ ສົມເພັດ ເອີດລັດດາ ເຈົ້າ
ເມືອງໆທ່າແຕງ,ມີຄະນະສະເພາະກິດຂັ້ນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນໂອກາດນີ້ ທ່ານ ແສງສຸບັນ ໄຊສະຫັວນ ຮອງເຈົ້າເມືອງທ່າແຕງໄດ້ລາຍງານສະພາບການປ້ອງກັນຄວບຄຸມແລະແກ້ໄຂການແຜ່ລະບາດຂອງພະຍາດໂຄວິດ 19 ໂດຍໄດ້ເອົາໃຈໃສ່ປະຕິບັດມາດຕະການຢ່າງເຂັ້ມງວດເປັນຕົ້ນ: ຄໍາສັ່ງແນະນໍາເລກທີ 15 ຂອງນາຍຍົກລັດຖະມົນຕີກ່ຽວກັບການສະກັດກັ້ນ,ປ້ອງກັນ,ຄວບຄຸມ ແລະ ແກ້ໄຂພະຍາດໂຄວິດ 19,ຄຳສັ່ງຂອງເຈົ້າແຂວງ ສະບັບເລກທີ 05 ວ່າດ້ວຍການເພີ່ມທະວີສະກັດກັ້ນ,ປ້ອງກັນ,ຄວບຄຸມ ແລະ ແກ້ໄຂພະຍາດໂຄວິດ 19.

ຮອງເຈົ້າ ເມືອງທ່າແຕງກ່າວວ່າ: ເມືອງທ່າແຕງເປັນເມືອງທາງຜ່ານ ແລະ ມີດ່ານເຂົ້າ – ອອກມີຈຸດເຊື່ອມຕໍ່ລະຫວ່າງເມືອງສາລະວັນແຂວງສາລະວັນ ແລະ ເມືອງປາກຊ່ອງແຂວງຈຳປາສັກ ເຊິ່ງເປັນສິ່ງທ້າທາຍ ແລະ ມີຄວາມສ່ຽງຫລາຍ. ດັ່ງນັ້ນ ໜ່ວຍສະເພາະກິດຂັ້ນເມືອງໄດ້ເອົາໃຈໃສ່ໃນການຕິດຕາມເຝົ້າລະວັງຢ່າງໃກ້ຊິດ.ໂດຍມີຕົວເລກສະສົມ ແຕ່ວັນທີ 22 ຫາ 27ເມສາ 2021 ນີ້ ຈຳນວນ 1,102 ຄົນ. ໃນນີ້ເປັນຄົນລາວ 957 ຄົນ, ຄົນໄທ 14 ຄົນ, ຫວຽດນາມ 33 ຄົນ ແລະ ຄົນຈີນ 7 ຄົນ,ຈໍາກັດບໍລິເວນຢູ່ບ້ານ 33 ຄົນ, ໄດ້ເກັບຕົວຢ່າງໄປກວດທັງໝົດ 33 ຄົນ,ຜົນອອກມາເປັນລົບ,ບໍ່ມີຜູ້ຕິດເຊື້ອ.

ພ້ອມດຽວກັນນີ້ກໍຈະສືບຕໍ່ປະຕິບັດຄຳສັ່ງຂອງຄະນະເລຂາທິການສູນກາງພັກວ່າດ້ວຍການເພີ່ມທະວີຄວາມຮັບຜິດຊອບຂອງຄະນະພັກແຕ່ລະຂັ້ນໃນການສືບຕໍ່ສະກັດກັ້ນ,ປ້ອງກັນ,ຄວບຄຸມ ແລະ ແກ້ໄຂ ພະຍາດໂຄວິດ 19. ຈາກນັ້ນຄະນະທິມງານສະເພາະກິດທັງຂັ້ນແຂວງ ແລະ ຂັ້ນເມືອງກໍໄດ້ໄປກວດກາເບິ່ງສະຖານທີ່ກັ່ນກອງດ່ານກວດກາຄົນເຂົ້າ – ອອກ 2 ຈຸດຄື: ຈຸດ ເຊື່ອມຕໍ່ດ່ານບ້ານກົກພຸງໃຕ້ເມືອງທ່າແຕງ ກັບ ເມືອງສາລະວັນແຂວງສາລະວັນ,ຈຸດເຊື່ອມຕໍ່ ດ່ານບ້ານ ຫຼັກຂາວເມືອງທ່າແຕງ ກັບ ເມືອງປາກຊ່ອງແຂວງຈຳປາສັກ ແລະ ບໍລິສັດຄູນມີໄຊຕື່ມອີກ.