ມີເດຍລາວແຂວງວຽງຈັນ ພາບ-ຂ່າວ : ບຸນມາ ແກ້ວບຸດດາ. ໃນວັນທີ 18 ມິຖຸນາ 2021ຄະນະສະເພາະກິດຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ແຂວງວຽງຈັນ ໄດ້ຮັບເຄື່ອງຊ່ວຍເຫຼືອ ຈາກອົງການໃຈບຸນສາກົນ ເດເຊເຣັດ (DIC) ເປັນມູນຄ່າ 56.270.000 ກີບ. ເຄື່ອງທີ່ນຳມາຊ່ວຍເຫຼືອຄັ້ງນີ້ເປັນອຸປະກອນການແພດເພຶ່ອນຳໃຊເຂົ້າໃນວຽກງານການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ແຂວງວຽງຈັນ, ໃນນັ້ນມີເຈວລ້າງມື,ເຫົ້ຼາເກົ້າ90, ຖົງມືອານາໄມ, ໄມ້ງັດລີ້ນ, ບາຫຼອດ, ຖົງເກີບ ແລະ ໝວກຢາງ ລວມເປັນມູນຄ່າທັງໝົດ 56.270.000 ກີບ.

ເປັນກຽດກ່າວມອບເຄື່ອງຊ່ວຍເຫຼືອຈຳນວນດັ່ງກ່າວ ໂດຍ ທ່ານ ຊະກອດ ໂຄວະລິສ໌ (Scott Cowallis) ຜູ້ຕາງໜ້າ ອົງການໃຈບຸນສາກົນ ເດເຊເຣັດ (DIC) ແລະກ່າວຮັບໂດຍ ທ່ານ ດຣ ຄຳປຸ່ນ ພົມປັນຍາ ຮອງຫົວໜ້າພະແນກສາທາລະນະສຸກແຂວງວຽງຈັນ ເຊິ່ງຈະໄດ້ນຳເອົາເຄື່ອງຊ່ວຍເຫຼືອຈຳນວນດັ່ງກ່າວ ໄປມອບຕໍ່ໃຫ້ບັນດາພະແນກການ, ອົງການ, ກົມກອງ ທີ່ກ່ຽວຂ້ອງ ແລະ ຫ້ອງການສາທາລະນະສຸກເມືອງ, ໂຮງໝໍນ້ອຍ ແລະ ສຸກສາລາ ເພຶ່ອນຳໃຊ້ເຂົ້າໃນວຽກງານການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ພາຍໃນແຂວງວຽງຈັນໃນ, ພ້ອມທັງໄດ້ມອບໃບກຽດຕິຄຸນຂອງທ່ານເຈົ້າແຂວງໃຫ້ແກ່ ອົງການໃຈບຸນສາກົນ ເດເຊເຣັດ (DIC) ແລະ ໃບຍ້ອງຍໍຂອງທ່ານເຈົ້າແຂວງວຽງຈັນອີກຈຳນວນ 2 ໃບ ໃຫ້ແກ່ຜູ້ປະສານງານກັບອົງການໃຈບຸນສາກົນ ເດເຊເຣັດ (DIC) ເພຶ່ອເປັນການສະແດງຄວາມຂອບໃຈ, ຮູ້ບຸນຄຸນສັນລະເສີນ ຜົນງານຄຸນງາມຄວາມດີ ທີ່ໄດ້ປະກອບສ່ວນຊ່ວຍເຫຼືອແຂວງວຽງຈັນໃນການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19ໃນຄັ້ງນີ້.