ທ່ານ ແດງ ປະທຸມທອງ, ຮອງເລຂາພັກແຂວງໄຊສົມບູນ, ຫົວໜ້າຄະນະສະເພາະກິດຄວບຄຸມ, ຕ້ານ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ 19 ຂັ້ນແຂວງ ພ້ອມດ້ວຍຄະນະ ໄດ້ ລົງເຄື່ອນໄຫວຢ້ຽມຢາມ ແລະ ຊຸກຍູ້ ວຽກງານຄວບຄຸມ, ຕ້ານ, ສະກັດ ແລະ ແກ້ໄຂການລະບາດ ຂອງພະຍາດໂຄວິດ 19 ຢູ່ເມືອງທ່າໂທມ, ເມືອງຮົ່ມ ແລະ ເມືອງລ້ອງຊານ ໃນລະຫວ່າງວັນທີ 23-24 ກຸມພາ 2021 ນີ້ ໂດຍການຕ້ອນຮັບຂອງທ່ານເລຂາພັກເມືອງ, ເຈົ້າເມືອງ ແຕ່ລະເມືອງ ພ້ອມດ້ວຍຄະນະສະເພາະກິດ ຂັ້ນເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໃນໂອກາດ ລົງເຄື່ອນໄຫວຢ້ຽມຢາມ, ຊຸກຍູ້ ແລະ ເຮັດວຽກ ຢູ່ບັນດາເມືອງ ຄັ້ງນີ້ ທ່ານ ແດງ ປະທຸມທອງ, ຮອງເລຂາພັກ ແຂວງໄຊສົມບູນ, ຫົວໜ້າຄະນະສະເພາະກິດຄວບຄຸມ, ຕ້ານ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ19 ຂັ້ນແຂວງ ໄດ້ຮັບຟັງການລາຍງານວຽກງານໂດຍຫຍໍ້ກ່ຽວກັບມາດຕະການປະຕິບັດວຽກງານສະກັດກັ້ນ, ຄວບຄຸມ ແລະ ຕ້ານພະຍາດໂຄວິດ 19 ໃນໄລຍະຜ່ານມາ ຈາກຄະນະສະເພາະກິດ ຂັ້ນເມືອງ. ຊຶ່ງຕະຫຼອດໄລຍະຜ່ານມາຮອດປັດຈຸບັນ ຄະນະສະເພາະກິດຂັ້ນເມືອງ ໄດ້ສຸມໃສ່ການຄວບຄຸ້ມ, ຕ້ານ, ສະກັດກັ້ນ ແລະ ແກ້ໄຂ ການແຜ່ລະບາດຂອງພະຍາດໂຄວິດ 19 ຢ່າງແຂງແຮງ ແລະ ດ້ວຍຄວາມຮັບຜິດຊອບສູງ ຊຶ່ງຄະນະສະເພາະກິດ ແລະ ທຸກພາກສ່ວນທີ່ຂອງເມືອງ ໄດ້ເພີ່ມທະວີເປັນເຈົ້າການ ໃນການຜັນຂະຫຍາຍບັນດາເນື້ອໃນ ກ່ຽວກັບມາດຕະການຕ່າງໆ ເປັນຕົ້ນ ໄດ້ກຳນົດຈຸດກັກກັ້ນ ແລະ ຈຸດປິ່ນປົວຂອງເມືອງ ພ້ອມທັງເຂັ້ມງວດຕິດຕາມຄົນເຂົ້າອອກພາຍໃນ ແລະ ຕ່າງປະເທດ ທີ່ລັກລອບເຂົ້າມາພັກເຊົາ ຫຼື ເຂົ້າມາເຮັດວຽກຢູ່ພາຍໃນເມືອງຂອງຕົນ ຢ່າງເຄັ່ງ ແລະ ຕໍ່ເນື່ອງ ໂດຍຮັບປະກັນໄດ້ຄວາມປອດໄພ ຂອງແຕ່ລະເມືອງຢ່າງໜັກແໜ້ນ.

ໂອກາດດັ່ງກ່າວ ທ່ານຮອງເລຂາພັກແຂວງ ໄດ້ຜ່ານແຈ້ງການ ຂອງຫ້ອງວ່າການສຳນັກງານນາຍົກລັດຖະມົນຕີ ກ່ຽວກັບການສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ 19 ໃນໄລຍະແຕ່ວັນທີ 1 ກຸມພາ ຫາ 31 ມີນາ 2021. ໂອກາດດຽວກັນ ທ່ານຍັງໄດ້ເນັ້ນໜັກໃຫ້ຄະນະສະເພາະກິດ ຂັ້ນເມືອງ ແຕ່ລະເມືອງ ຈົ່ງສືບຕໍ່ວາງມາດຕະການປ້ອງກັນພະຍາດໂຄວິດ 19 ຢ່າງເປັນປົກກະຕິ ແລະ ຕໍ່ເນື່ອງ ໂດຍເກັບກຳຄົນເຂົ້າອອກພາຍໃນເມືອງ ໃຫ້ເຂັ້ມງວດ ແລະ ເຄັ່ງຄັດ ພ້ອມທັງສຶກສາອົບຮົມພໍ່ແມ່ປະຊາຊົນບັນດາເຜົ່າ ໃຫ້ມີສະຕິຕື່ນຕົວ-ເປັນເຈົ້າການຢ່າງແຂງແຮງ ໃນການປະກອບສ່ວນຕ້ານ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ 19 ດ້ວຍຄວາມຮັບຜິດຊອບສູງ. ທັງໝົດນັ້ນ ເພື່ອເຮັດໃຫ້ແຕ່ລະເມືອງ ມີຄວາມສະຫງົບປອດໄພ ແລະ ປາສະຈາກການແຜ່ລະບາດ ຂອງພະຍາດດັ່ງກ່າວ 100%. ເນື່ອງໃນໂອກາດລົງເຄື່ອນໄຫວຢ້ຽມ ແລະ ຊຸກຍູ້ຄວບຄຸມ, ຕ້ານ ແລະ ສະກັດກັ້ນ ພະຍາດໂຄວິດ 19 ຢູ່ແຕ່ລະເມືອງ ເທື່ອນີ້ ທ່ານ ແດງ ປະທຸມທອງ, ຮອງເລຂາພັກແຂວງໄຊສົມບູນ ໄດ້ນຳເອົາປັດໄຈເປັນເງິນຈຳນວນໜຶ່ງ ມາມອບໃຫ້ບັນດາເມືອງ ຄື: ເມືອງຮົ່ມ 10 ລ້ານກີບ, ເມືອງລ້ອງຊານ 15 ລ້ານກີບ ແລະ ເມືອງທ່າໂທມ 20 ລ້ານກີບ ເພື່ອໝູນໃຊ້ເຂົ້າໃນການເຄື່ອນໄຫວ ຕ້ານ ແລະ ປ້ອງກັນ ການແຜ່ລະບາດຂອງພະຍາດໂຄວິດ ໃນຕໍ່ໜ້າ.
ຂ່າວ: ພູທອນ ວິນາວົງ