ມີເດຍລາວແຂວງຫຼວງພະບາງ ໃນວັນທີ 14 ກັນຍາ 2021 ນີ້ ທີ່ສູນສະເພາະກິດ ຄວບຄຸມ ໂຄວິດ-19 ແຂວງຫຼວງພະບາງ ໄດ້ຈັດກອງປະຊຸມສະຫຼຸບລາຍງານ ການສືບຕໍ່ປະຕິບັດຄຳສັ່ງ ເລກທີ 15/ນຍ, ເລກທີ 01/ຈຂ.ຫຼບ ກ່ຽວກັບມາດຕະການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການລະບາດ ຂອງພະຍາດ ໂຄວິດ-19 ໂດຍການເປັນປະທານຂອງ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ຫົວໜ້າຄະນະສະເພາະກິດຄວບຄຸມ ໂຄວິດ-19 ຂອງແຂວງ.

ກອງປະຊຸມໄດ້ຍົກໃຫ້ເຫັນບັນຫາສິ່ງທ້າຍໃໝ່ຕໍ່ການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດ COVID-19. ປັດຈຸບັນເຫັນວ່າສາຍພັນໃຫມ່( ແດວຕ່າDELTA, ນອກຈາກມີການແຜ່ເຊື້ອໄວແລ້ວ,ອັນຕະລາຍສູງແລ້ວ, ຍັງມີການປັບຕົວບົ່ມເຊື້ອຍາວນານຮອດ 21 ວັນ ຫຼືຫລາຍກວ່ານັ້ນ, ຈື່ງສາມາດກວດພົບ) ມັນເຮັດໃຫ້ທາງດ້ານວິຊາການແມ່ນມີຄວາມຫຍຸ້ງຍາກໃນການກັ່ນກອງ, ສຶບຄົ້ນ ແລະ ການບົ່ງມະຕິເພື່ອຊອກຫາກໍລະນີຕິດເຊື້ອໃນປະຈຸບັນ, ສະພາບຜູ້ຕິດເຊື້ອໃນຊຸມຊົນ ແລະ ນຳເຂົ້າພາຍໃນແຂວງ ແມ່ນນັບມື້ນັບສູງຂື້ນ ໂຮງໝໍແຂວງບໍ່ສາມາດຮັບຜູ້ຕິດເຊື້ອໄດ້, ຈໍາເປັນຕ້ອງໄດ້ໃຫ້ໂຮງໝໍຊຸມຊົນ ຕ້ອງໄດ້ກະກຽມສະຖານທີ່ຮອງຮັບຄົນເຈັບເບົາບາງ, ໄດ້ເອົາໃຈໃສ່ຊຸກຍູ້ການສັກວັກຊີນໃຫ້ແກ່ປະຊາຊົນເປົ້າໝາຍໃນ 11 ເມືອງ ແລະ 1 ນະຄອນ ແນໃສ່ສ້າງພູມຄູ້ມກັນໝູ່ໃຫ້ໄດ້ 50% ຂຶ້ນໄປ, ປະຈຸບັນສັກໄດ້ 25,7 % ຂອງປະຊາກອນໃນທົ່ວແຂວງ, ເຊິ່ງແຂວງໄດ້ຮັບວັກຊີນຈາກສູນກາງປະມານ 30 ກວ່າພັນໂດສ໌ ແລະຈະສຶບຕໍ່ສັກໃຫ້ບັນດາເປົ້າໝາຍຕໍ່ໄປ.

ພ້ອມນີ້ ກອງປະຊຸມໄດ້ພ້ອມກັນ ປືກສາຫາລືຫຼາຍບັນຫາ ເປັນຕົ້ນແມ່ນ ການກະກຽມຄວາມພ້ອມຂອງສະຖານທີ່ແຍກປ່ຽວປີ່ນປົວເພື່ອຮອງຮັບຜູ້ຕິດເຊື້ອເບົາບາງ, ປານກາງ, ຮ້າຍແຮງໂດຍສະເພາະຄວາມພ້ອມຂອງສະຖານທີ່, ອຸປະກອນການແພດ, ຢາປີ່ນປົວ, ທີມງານແພດໝໍໃຫ້ພຽງພໍໃນສະຖານທີ່ປີ່ນປົວຕ່າງໆ, ການກະກຽມສູນຈຳກັດບໍລິເວນແຮງງານນຳເຂົ້າຈາກຕ່າງປະເທດ ແລະມາຈາກຕ່າງແຂວງ, ໃຫ້ພຽງພໍ ແລະບໍ່ໃຫ້ແອອັດ,

ພ້ອມທັງມີການວາງມາດຕະການບໍລິຫານ, ຈັດການ, ຄຸ້ມຄອງພາຍໃນສູນໃຫ້ດີເພື່ອຫລີກລ້ຽງການຕິດເຊື້ອກັນເອງພາຍໃນສູນ, ລວມທັງສູນຂອງບັນດາເມືອງ ຕ້ອງມີການຝຶກອົບຮົມໃຫ້ພະນັກງານປະຈຳສູນ ໃຫ້ຮູ້ຈັກການປ້ອງກັນການຕິດເຊື້ອໃຫ້ໄດ້ມາດຕະຖານ, ການຂຽນຄູ່ມືມາດຕະການໃນການຄຸ້ມຄອງ, ບໍລິຫານຈັດການສູນຈຳກັດບໍລິເວນ ໃຫ້ມີມາດຕະການທາງການແພດ, ສະຫວັດດີການ, ພັນທະໜ້າທີ, ມາດຕະການຕໍ່ຜູ້ລະເມີດ, ການແຜ່ເຊື້ອ ແລະການປ້ອງກັນຄວາມສະຫງົບພາຍໃນສູນ, ບັນຫາອາຫານຜູ້ຈໍາກັດບໍລິເວນຜູ້ທຸກຍາກ, ການປະຕິບັດຫຼັກການກັ່ນຕອງ, ສຶບສວນປະຫວັດ ໃນການຮັບສົ່ງແຮງງານເຂົ້າ-ອອກສູນແຕ່ລະຄັ້ງ, ບັນຫາການຂຶ້ນແຜນງົບປະມານ, ການກະກຽມຂຶ້ນແຜນໂຄງການປຸກສ້າງໂຮງໝໍສຳຫຼັບປີ່ນປົວແຍກດຽວ ພະຍາດຕິດຕໍ່ຫຼັງໃໝ່ໃຫ້ໂຮງໝໍແຂວງ ຂະໜາດ 200 ຕຽງ, ໂຮງໝໍຊຸມ ເມືອງນໍ້າບາກ 20 ຕຽງ, ໂຮງໝໍຊຸມຊົນ ເມືອງນານ 20 ຕຽງ, ຕາມທິດຂອງກະຊວງເພື່ອຮອງຮັບໃນອານາຄົດ, ການອອກແຈ້ງການໃຫ້ແຕ່ລະເມືອງກະກຽມສູນຮອງຮັບຜູ້ຕິດເຊື້ອກໍລະນີບໍ່ຮ້າຍແຮງໃນເມືອງເປົ້າໝາຍ, ພ້ອມອົບຮົມທີມງານປະຈຳສະຖານທີ່ປີ່ນປົວ ເພື່ອຫລຸດຜ່ອນການແອດອັດຢູ່ແຂວງ ພ້ອມທັງເປັນການສ້າງຄວາມເຂັ້ມແຂງໃຫ້ບັນດາເມືອງ, ມາດຕະການ ວິທີການໃນການເອົາໃຈໃສ່ສືບຕໍ່ສັກວັກຊິນ ປ້ອງກັນ ໂຄວິດ-19, ເພີ່ມທະວີຄວາມຮັບຜິດຊອບທົ່ວສັງຄົມ ເພື່ອຕ້ານ ແລະສະກັດກັ້ນການລະບາດພະຍາດໂຄວິດ-19 ໃຫ້ເປັນໜ້າທີ່ຂອງທົ່ວສັງຄົມ ໂດຍສະເພາະແມ່ນບ້ານ ແລະຄອບຄົວ. ໃຫ້ມີການກວດກາຄົນເຂົ້າ-ອອກ ລະຫວ່າງແຂວງ ຕະຫຼອດ 24 ຊົ່ວໂມງ ໂດຍສະເພາະແມ່ນແຂວງທີ່ມີການຕິດເຊື້ອ ຄື: ດ່ານພູຄູນ-ກາສີ, ນາເມືອງ-ກາສີ ແລະ ນໍ້າບາກ (ຫ້ວຍໝ້ຽງ) – ແຂວງອຸດົມໄຊ ຢ່າງເຂັ້ມງວດ.

ປັດຈຸບັນແຂວງຫຼວງພະບາງ ໄດ້ມີການລະບາດເປັນຮອບທີ 3 ແລະມີການລະບາດໃນຊຸມຊົນ, ເລີ່ມແຕ່ວັນທີ 25 ເດືອນສິງຫາ 2021 ເປັນຕົ້ນມາ, ໂດຍເກີດຈາກຜູ້ຕິດເຊື້ອ 1 ຄົນ ນຳເຂົ້າມາແຕ່ແຂວງບໍ່ແກ້ວ ທີ່ໄດ້ມາຮ່ວມວັນຊາປະນາກິດສົບພີ່ນ້ອງຢູ່ ບ້ານນາຝາຍ ເມືອງນານ ແລະ ໄດ້ສໍາພັດຂະຫຍາຍໃສ່ຊຸມຊຸມ ບ້ານນາຝາຍ ແລະ ບຸກຄົນຈຳນວນໜື່ງຂອງນະຄອນຫຼວງພະບາງ ທີ່ໄດ້ໄປຮ່ວມງານດັ່ງກ່າວ, ແລະອີກແຫລ່ງທີ່ມາຜູ້ຕິດເຊື້ອທີ2 ແມ່ນມີການຕິດເຊື້ອພາຍໃນສູນກັນເອງ (ຢູ່ສູນກັກກັນຫໍຄອຍສະໜາມບີນເກົ່າ ແລະ ສູນວິທະຍາໄລວິທະຍາສາດສຸຂະພາບ). ມາຮອດວັນທີ 13 ກັນຍາ 2021 ແຂວງຫຼວງພະບາງ ມີຜູ້ຕິດເຊື້ອສະສົມ 129 ຄົນ, ຕິດເຊື້ອຮອບ 3 ມີ 113 ຄົນ, ຕິດເຊື້ອໃນຊຸມຊົນ 77 ຄົນ, ກໍລະນີນໍາເຂົ້າ 52 ຄົນ, ປີ່ນປົວຫາຍດີສະສົມ 41 ຄົນ, ຍັງບໍ່ມີກໍລະນີການເສຍຊີວິດ, ກຳລັງປີ່ນປົວຢູ່ໂຮງໝໍຕ່າງໆ ທັງໝົດ 88 ຄົນ, ກໍາລັງປີ່ນປົວຢູໂຮງໝໍແຂວງ 49 ຄົນ, ກຳລັງປີ່ນປົວໂຮງໝໍບໍລິເວນ 107 ມີ 12 ຄົນ, ກຳລັງປີ່ນປົວຢູ່ໂຮງໝໍຊຸມຊົນ ເມືອງນານ 14 ຄົນ, ກຳລັງປີ່ນປົວຢູ່ໂຮງໝໍຊຸມຊົນເມືອງງອຍ 02 ຄົນ, ກຳລັງປີ່ນປົວຢູ່ໂຮງໝໍຊຸມຊົນເມືອງວຽງຄຳ 09 ຄົນ, ກຳລັງປີ່ນປົວຢູ່ໂຮງໝໍຊຸມຊົນເມືອງຊຽງເງິນ 03 ຄົນ, ສະພາບສູນຈຳກັດບໍລິເວນ ທົ່ວແຂວງ ມີສູນຈຳກັດບໍລິເວນ 16 ແຫ່ງ, ໂຮງແຮມທີ່ໄດ້ເຊັນສັນຍາມີ 05 ແຫ່ງ, ແຮງງານມີໜ້າຈໍາກັດຢູ່ສູນຈໍາກັດບໍລີເວນ 705 ຄົນ, ຍິງ 297 ຄົນ, ຢູ່ໂຮງແຮມ 04 ຄົນ,ໂຮງໝໍພາກສະໜາມ: ຂັ້ນແຂວງ 1 ແຫ່ງ (ຫໍຄອຍເດີນບີນເກົ່າ) ມີ 100 ຕຽງ, ບ້ານທີ່ຖຶກກຳນົດເປັນບ້ານສີແດງ ມີ 13 ບ້ານ ຄື: ນະຄອນຫຼວງພະບາງ ມີ 3 ບ້ານ, ເມືອງນານ 9 ບ້ານ ແລະ ເມືອງຈອມເພັດ 1 ບ້ານ

ຂ່າວ: ບົວວອນ ດວງສະຫວັດ