ມີເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ
ກອງປະຊຸມ ສະຫຼຸບການຈັດຕັ້ງປະຕິບັດວຽກງານປ້ອງກັນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານໂຄວິດ 19 ຂອງຄະນະສະເພາະກິດ ຂັ້ນແຂວງໄຊສົມບູນ ໄດ້ຈັດຂຶ້ນໃນຕອນບ່າຍຂອງວັນທີ 7 ມິຖຸນາ 2021 ນີ້ ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ໂດຍການເປັນປະທານ ຂອງທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ, ຫົວໜ້າຄະນະສະເພາະກິດ ຂັ້ນແຂວງ ພ້ອມດ້ວຍຄະນະສະເພາະກິດ ຂອງແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໂອກາດນີ້ ຜູ້ເຂົ້າຮ່ວມໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານປ້ອງກັນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ 19 ໃນໄລຍະທີ 3 ຜ່ານມາ ຈາກທ່ານ ອູ່ເງິນ ດວງມະນີ, ຮອງຫົວໜ້າຫ້ອງວ່າການ ແຂວງ, ຫົວໜ້າກອງເລຂາຄະນະສະເພາະກິດ ແຂວງໄຊສົມບຸນ. ຊຶ່ງຄະນະສະເພາະກິດ ແລະ ທຸກພາກສ່ວນກ່ຽວ ໄດ້ເອົາໃຈໃສ່ຈັດຕັ້ງປະຕິບັດ ດ້ວຍຄວາມຮັບຜິດຊອບສູງ ໃນນີ້ ການຈັດຕັ້ງປະຕິບັດການສັກຢາວັກຊິນ ຊີໂນຟາມ ຈຳນວນ 2 ຊຸດ ຊຶ່ງການສັກໃນຊຸດທີ 1 ແມ່ນສຳເລັດໂດຍພື້ນຖານ ແລະ ກຳລັງຈັດຕັ້ງປະຕິບັດ ໃນຊຸດທີ 2 ໃນນີ້ ລວມທັງໝົດທົ່ວແຂວງ ເຂັ້ມທີ 1 ໄດ້ຈຳນວນ 4,017 ເຂັມ ແລະ ເຂັມທີ 2 ໄດ້ຈຳນວນ 1,716 ເຂັມ. ນອກນັ້ນ ການເກັບຕົວຢ່າງໃນໄລຍະຜ່ານມາ ສາມາດເກັບໄດ້ ຈຳນວນ 170 ຕົວຢ່າງສະສົມ ຊຶ່ງຜົນການກວດອອກມາແມ່ນລົບ.

ຂະນະດຽວກັນ ການຈັດຕັ້ງປະຕິບັດໃນໄລຍະທີ 3 ວັນທີ 22 ພຶດສະພາ ຫາ ວັນທີ 4 ມິຖຸນາ 2021 ປະກອບມີ 10 ດ່ານ ຊຶ່ງເຫັນວ່າບັນດາດ່ານ ໄດ້ເອົາໃຈໃສ່ຕິດຕາມກວດກາຄົນເຂົ້າ-ອອກ ໄດ້ເປັນຢ່າງດີ ເຮັດໃຫ້ແຂວງໄຊສົມບູນ ມີຄວາມປອດໄພ ແລະ ບໍ່ມີຜູ້ຕິດເຊື້ອໂຄວິດ 19 ຊຶ່ງມີຈຳນວນຄົນເຂົ້າ ທັງໝົດ 4,361 ແລະ ອອກແຂວງ ຈຳນວນ 1,166 ຄົນ. ໂອກາດດັ່ງກ່າວ ຜູ້ເຂົ້າຮ່ວມ ໄດ້ຜັດປ່ຽນກັນປະກອບຄຳຄິດ-ຄຳເຫັນ ຢ່າງກົງໄປກົງມາ ທັງນີ້ ກໍເພື່ອພ້ອມກັນຄົ້ນຄວ້າ ແລະ ປຶກສາຫາລື ກ່ຽວກັບການວາງມາດຕະການໃນໄລຍະທີ 4 ໃຫ້ມີຄວາມຮັດກຸມ ແລະ ສາມາດຈັດຕັ້ງປະຕິບັດ ຢ່າງມີປະສິດທິພາບ ທັງໝົດນັ້ນ ກໍເພື່ອເຮັດໃຫ້ແຂວງໄຊສົມບູນ ມີຄວາມປອດໄພຢ່າງໜັກແໜ້ນ ແລະ ຫຼຸດພົ້ນຄວາມສ່ຽງ ຈາກພະຍາດດັ່ງກ່າວ ໂດຍໄວ.