ມີເດຍລາວແຂວງບໍ່ແກ້ວ ພາບ-ຂ່າວ: ພອນສະຫວັນ ມະນີສີ.
ວັນທີ 29 ມິຖຸນານີ້ ຄະນະໂຄສະນາອົບຮົມ ແຂວງບໍ່ແກ້ວ ຮ່ວມກັບ ຄະນະໂຄສະນາອົບຮົມ ເມືອງປາກທາ ໄດ້ຈັດຊຸດຝຶກອົບຮົມ ວຽກງານສັງລວມ-ຫາງສຽງສັງຄົມ ໃຫ້ກັບຄະນະຜູ້ປະສານງານເກັບກຳສັງລວມ-ຫາງສຽງສັງຄົມຂອງແຕ່ລະຫ້ອງການອ້ອມຂ້າງເມືອງປາກທາ ຊຸດທີ II ຂື້ນທີ່ສະໂມສອນຂອງເມືອງ ໂດຍການເຂົ້າຮ່ວມຂອງທ່ານ ຄອນສະຫວັນ ຊາພັກດີ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ ບໍ່ແກ້ວ ທ່ານ ສາລີ ວັນນະສານ ຮອງເລຂາພັກເມືອງ ຜູ້ຊີ້ນຳຂົງເຂດພັກ-ພະນັກງານ ແລະ ສຳມະນາກອນເຂົ້າຮ່ວມ.

ຊຸດຝຶກອົບຮົມ ແມ່ນຈະດຳເນີນ ໄປເປັນເວລາ 2 ວັນ ເຊິ່ງສໍາມະນາກອນ ແມ່ນຈະໄດ້ຮຽນຮູ້ ແລະ ຮັບຟັງ ເອກະສານສຳຄັນທັງໝົດ 4 ບົດ ເຊິ່ງປະກອບມີ: ຄວາມຮູ້ພື້ນຖານກ່ຽວກັບວຽກງານ-ຫາງສຽງສັງຄົມ, ວິທີເກັບກຳ ແລະ ການນຳໄຊ້ຫາງສຽງສັງຄົມ ເຂົ້າໃນວຽກງານການເມືອງແນວຄິດ, ຕາໜ່າງເພື່ອນຮ່ວມງານ ແລະ ວຽກງານຄົ້ນຄວ້າສັງລວມ ທັງນີ້

ເພື່ອແນໃສ່ເຮັດໃຫ້ພະນັກງານທີ່ເຮັດວຽກສັງລວມ ແລະ ເກັບກຳສະພາບແນວຄິດຫາງສຽງສັງຄົມ ໄດ້ຮັບການເສີມຂະຫຍາຍຄວາມຮູ້ ຄວາມສາມາດ, ປະສົບການໃນການປະຕິບັດໜ້າທີ່ວຽກງານໃຫ້ມີປະສິດຕິຜົນ ເພື່ອປະຕິບັດພາລະບົດບາດ, ສິດ, ໜ້າທີ, ຫຼັກການທິດນຳ ໃນການເຮັດວຽກງານ ຫາງສຽງສັງຄົມ, ຄວາມໝາຍ ຄວາມສຳຄັນ ຄວາມແຕກຕ່າງລະຫວ່າງຫາງສຽງສັງຄົມກັບຂ່າວລື, ສາມາດປະຕິບັດເປັນເສນາທິການໃຫ້ກັບຄະນະພັກ ຄະນະນຳ ໃນການຕິດຕາມເກັບກຳສະພາບແນວຄິດຂອງພະນັກງານສະມາຊິກພັກ ພໍ່ແມ່ປະຊາຊົນບັນດາເຜົ່າ ໃຫ້ມີຄວາມເຊື່ອໝັ້ນຕໍ່ກັບການນຳພາຂອງພັກ-ລັດ ແລະ ຍົກສູງຄວາມຮັບຜິດຊອບຂອງພະນັກງານທີ່ເຮັດວຽກງານສັງລວມ-ຫາງສຽງ ໃຫ້ສູງຂື້ນ.