ມີເດຍລາວແຂວງຄຳມ່ວນ ກອງປະຊຸມເຜີຍແຜ່ຄຳສັ່ງເລກທີ 02 ຂອງທ່ານເຈົ້າແຂວງຄຳມ່ວນ ວ່າດ້ວຍການສືບຕໍ່ເພີ່ມທະວີຄວາມເຂັ້ມ ງວດ ໃນການຈັດຕັ້ງປະຕິບັດມາດຕະການສະກັດກັ້ນ, ຄວບຄຸມ ແລະ ປ້ອງກັນການແຜ່ລະບາດ ພະຍາດໂຄວິດ-19 ຈັດຂຶ້ນ ໃນຕອນບ່າຍວັນທີ 26 ເມສາ 2021 ທີ່ເຮືອນຮັບແຂກເລກ 1 ໂດຍການເປັນປະທານຂອງທ່ານ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ, ມີບັນດາຄະນະພະແນກການ, ອົງການຈັດຕັ້ງ, ລັດວິສາຫະກິດ ແລະ ຂະແໜງການ ຕ່າງໆອ້ອມຂ້າງແຂວງເຂົ້າຮ່ວມ.

ກອງປະຊຸມແມ່ນໄດ້ຜ່ານກ່ຽວກັບຄຳສັ່ງ ເລກທີ 02 ຂອງທ່ານເຈົ້າແຂວງຄຳມ່ວນ ລົງວັນທີ 25 ເມສາ 2021 ເຊິ່ງເນື້ອໃນຂອງຄຳສັ່ງດັ່ງກ່າວແມ່ນໄດ້ກຳນົດບັນດາມາດຕະການ, ຂໍ້ຫ້າມຕ່າງໆ ລວມເຖິງການປິດການເດີນທາງ ເຂົ້າ-ອອກ ແຂວງຄຳມ່ວນ (Lock down) ນັບແຕ່ວັນທີ 25 ເມສາ ຫາ 10 ພຶດສະພາ 2021 ແລະ ການປິດສະຖານ ທີ່ບັນເທີງ, ສະຖານທີ່ທ່ອງທ່ຽວ, ສະຖານທີ່ອອກກຳລັງກາຍ ລວມເຖິງການຫ້າມຈັດປະຊຸມ, ໂຮມຊຸມນຸມ, ກິດຈະກຳ ທາງສາສະໜາ, ງານບຸນປະເພນີ, ງານລ້ຽງ, ງານດອງ ແລະ ງານສ້າງສັນອື່ນໆທີ່ມີການເຕົ້າໂຮມຄົນຈຳນວນຫຼາຍ, ຫ້າມໂຄສະນາ, ເຜີຍແຜ່ ແລະ ສົ່ງຕໍ່ຂໍ້ມູນຂ່າວສານ ທີ່ບໍ່ມີມູນຄວາມຈິງ ໃນຮູບແບບໃດໜຶ່ງຜ່ານສື່ຕ່າງໆ ເຊິ່ງເຮັດໃຫ້ ມີຄວາມເຂົ້າໃຈຜິດ, ສ້າງຄວາມແຕກຕື່ນ ແລະ ສົ່ງຜົນກະທົບໃນທາງລົບຕໍ່ສັງຄົມ ລວມເຖິງການຈັດຕັ້ງຈຸດກວດກາ ຕາມຈຸດຕ່າງໆ ເຂົ້າ-ອອກເມືອງ ແລະ ບ້ານຕໍ່ບ້ານຢ່າງເຂັ້ມງວດ ໃນກໍລະນີທີ່ມີການພົບເຫັນບຸກຄົນໃດລະເມີດ ໃຫ້ເຈົ້າໜ້າທີ່ດຳເນີນມາດ ຕະການຕາມລະບຽບກົດໝາຍ ແລະ ບັນດາຂໍ້ຫ້າມອື່ນໆ.

ເຊິ່ງຈຸດປະສົງກອງປະຊຸມດັ່ງກ່າວ ແມ່ນເພື່ອອະທິບາຍ, ຊີ້ແຈງ ແລະ ໃຫ້ຄວາມກະຈ່າງແຈ້ງຕໍ່ກັບຄຳສັ່ງດັ່ງກ່າວ ເພື່ອຄວາມເຂົ້າໃຈເປັນເອກະພາບ ພ້ອມທັງມອບຄວາມ ຮັບຜິດຊອບໃຫ້ແຕ່ລະພະແນກການ, ຂະແໜງການນຳໄປເຜີຍແຜ່ ໂຄສະນາໃຫ້ແກ່ສະມາຊິກ ພັກ-ພະນັກງານ ທີ່ຢູ່ໃນ ຄວາມຮັບຜິດຊອບຂອງຕົນ ໃຫ້ເຂົ້າໃຈຢ່າງເລິກເຊິ່ງກ່ຽວກັບຄວາມອັນຕະລາຍຮ້າຍແຮງ ຂອງພະຍາດດັ່ງກ່າວ ເຊິ່ງໄດ້ ສົ່ງຜົນກະທົບຕໍ່ສະຖຽນລະພາບການເມືອງ ກໍ່ຄືເສດຖະກິດ-ສັງຄົມ, ໃຫ້ຄະນະພັກ, ຄະນະນຳຖືເອົາການປ້ອງກັນ, ສະກັດກັ້ນພະຍາດໂຄວິດ-19 ໃນເວລານີ້ເປັນຍຸດທະສາດສຳຄັນ, ເປັນໜ້າທີ່ຈຸດສຸມ, ເລັ່ງດ່ວນທີ່ຈະຕ້ອງໄດ້ເອົາໃຈໃສ່ ແລະ ໃຫ້ຖືການບັນຊາຊີ້ນຳວຽກງານດັ່ງກ່າວຢູ່ໃນພາວະກຽມພ້ອມຕອບໂຕ້ຮອບດ້ານ ເພື່ອບໍ່ໃຫ້ຕິດແຜ່ ແລະ ຂະຫຍາຍເປັນ ວົງກວ້າງ