ມີເດຍລາວແຂວງຄຳມ່ວນ ຂ່າວ: ກອງຄຳ ພິທີ ປາຖະກະຖາວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 66 ປີ (22 ມີນາ 1955-22 ມີນາ 2021) ແລະ ມູນເຊື້ອ 21 ມີນາ ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 75 ປີ (21 ມີນາ 1946-21 ມີນາ 2021) ໄດ້ຈັດຂຶ້ນທີ່ຫ້ອງປະຊຸມໃຫຍ່ ຫຼັກ4 ຂອງແຂວງ ໃນວັນທີ 22 ມີນາ 2021 ໂດຍການເປັນປະທານຂອງທ່ານ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ, ມີບັນດາຄະນະປະຈຳພັກແຂວງ, ກຳມະການ ພັກແຂວງ, ພະນັກງານອາວຸໂສບຳນານ, ກຳລັງ ປກຊ-ປກສ ຕະຫຼອດເຖິງພະນັກງານ-ວິຊາການພະແນກການ ອ້ອມຂ້າງ ແຂວງເຂົ້າຮ່ວມ.

ທ່ານ ວົງເພັດ ຈິດປັນຍາ ຮອງເລຂາພັກແຂວງ ໄດ້ກ່າວປາຖະກະຖາມູນເຊື້ອ 2 ວັນດັ່ງກ່າວ ເຊິ່ງໄດ້ຍົກໃຫ້ເຫັນເຖິງຄວາມໝາຍ, ຄວາມສຳຄັນ ແລະ ມູນເຊື້ອແຫ່ງການເຕີບໃຫຍ່ຂະຫຍາຍຕົວ, ບັນດາຜົນສຳເລັດທີ່ຍາດມາໄດ້ຕະຫຼອດໄລຍະ 66 ປີຜ່ານມາ ພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ເຊິ່ງເຫັນໄດ້ວ່າປະເທດຊາດໄດ້ຮັບການພັດທະນາຢ່າງຮອບດ້ານດ້ວຍບາດກ້າວທີ່ໜັກແໜ້ນ. ພ້ອມກັນນັ້ນຍັງໄດ້ຍົກໃຫ້ເຫັນມູນເຊື້ອການຕໍ່ສູ້ຂອງນັກຮົບປະຕິວັດ ພ້ອມດ້ວຍປະຊາຊົນບັນດາເຜົ່າຊາວເມືອງທ່າແຂກ ໃນບັ້ນຮົບປ້ອງກັນຕົວເມືອງທ່າແຂກຢ່າງອົງອາດ, ກ້າແກ່ນດ້ວຍນ້ຳໃຈເສຍສະຫຼະເພື່ອປະເທດຊາດຕ້ານຈັກກະພັດຜູ້ຮຸກຮານໃນໄລຍະຜ່ານມາ.

ເຊິ່ງການ ປາຖະກະຖາວັນສຳຄັນປະຫວັດສາດໃນຄັ້ງນີ້ ແມ່ນເພື່ອເປັນການທົບທວນຄືນມູນເຊື້ອ ແລະ ໄຊຊະນະອັນຍິ່ງໃຫຍ່ຂອງພາລະກິດ ແຫ່ງການຕໍ່ສູ້ປົດປ່ອຍຊາດ ໃນເມື່ອກ່ອນ ແລະ ຜົນສຳເລັດໃນພາລະກິດປົກປັກຮັກສາ ແລະ ພັດທະນາປະເທດຊາດ ພາຍໃຕ້ການນຳພາຂອງພັກເຮົາ ພ້ອມທັງຖືເອົາໂອກາດນີ້ ເປັນການເພີ່ມທະວີການສຶກສາອົບຮົມພະນັກງານ, ສະມາຊິກພັກ, ນັກຮົບ ລັດຖະກອນ ແລະ ປະຊາຊົນບັນດາເຜົ່າ ກ່ຽວກັບນໍ້າໃຈຮັກຊາດ, ມູນເຊື້ອສາມັກຄີປອງດອງປະຊາຊົນບັນດາເຜົ່າ, ຊັ້ນຄົນ, ນໍ້າໃຈຕໍ່ສູ້ອັນອົງອາດກ້າຫານຂອງກອງທັບ ແລະ ປະຊາຊົນລາວ ແລະ ເພື່ອລະນຶກເຖິງວິລະກໍາອັນຍິ່ງໃຫຍ່ ຄວາມເສຍສະຫຼະອັນອົງອາດກ້າຫານ ຂອງປະຊາຊົນຊາວເມືອງທ່າແຂກ ພາຍໃຕ້ການນຳພາຂອງ ປະທານ ສຸພານຸວົງ ພ້ອມດ້ວຍໝູ່ຄະນະ ວິລະບູລຸດເຫຼັກ ໃນວັນທີ 21 ມີນາ 1946 ເຊິ່ງແມ່ນເຫດການປະຫວັດສາດອັນສຳຄັນ ແລະ ຍິ່ງໃຫຍ່ ທີ່ພວກເຮົາຈະຕ້ອງໄດ້ຫວນຄືນ ເພື່ອພ້ອມກັນສ້າງສະຕິຊາດ ເອກະລາດ ເອກະພາບ ໜຶ່ງດຽວ ພາຍໃຕ້ການນຳພາຂອງພັກ ແລະ ຍົກໃຫ້ເຫັນມູນເຊື້ອສາຍພົວພັນພິເສດ ແລະ ການຮ່ວມມືຮອບດ້ານລາວ-ຫວຽດນາມ.


ໃນໂອກາດຄົບຮອບ 66 ປີ ວັນສ້າງຕັ້ງພັກ ແລະ ຄົບຮອບ 75 ປີ ວັນນັກຮົບເສຍອົງຄະ ແລະ ເສຍສະຫຼະ ວີຊິດ ເພື່ອປະເທດຊາດ ບັນດາການນຳຂອງແຂວງຄຳມ່ວນ ຍັງໄດ້ຮ່ວມວາງກະຕ່າດອກໄມ້ ໂດຍເລີ່ມຈາກ ຫໍຈາລຶກ ມູນເຊື້ອ ປະຫວັດສາດ 21 ມີນາ, ອະນຸລາວະລີນັກຮົບນິລະນາມ, ອະນຸສາວະລີປະທານ ໄກສອນ ພົມວິຫານ ແລະ ອະນຸສາວະລີ ປະທານ ສຸພານຸວົງ ເພື່ອສະແດງເຖິງຄວາມຈົງຮັກພັກດີ ລະນຶກເຖິງບຸນຄຸນຢ່າງເລິກເຊິ່ງຕໍ່ຄຸນງາມຄວາມດີອັນປະເສີດເລີດລ້ຳ, ທັງເປັນແບບຢ່າງອັນດີງາມຂອງທົ່ວພັກ, ທົ່ວລັດ, ກຳລັງປະກອບອາວຸດ ແລະ ປະຊາຊົນບັນດາເຜົ່າຢ່າງສຸດຊຶ້ງຂອງຜູ້ນຳທີ່ດີເດັ່ນ, ເປັນວີລະບູລຸດຂອງຊາດລາວທີ່ໄດ້ນຳພາປວງຊົນລາວບັນດາເຜົ່າສະຖາປະນາ ສາທາລະ ນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975.