ເພື່ອຄັດເລືອກເອົາສະມາຊິກເຍົາວະຊົນທັນວາທີ່ຫ້າວຫັນ, ມີຄວາມຮູ້, ຄວາມສາມາດ ເພື່ອນຳມາເປັນສະມາຊິກເຍົາວະຊົນແບບຢ່າງ, ເປັນກອງເຍົາວະຊົນທັນວານໍາໜ້າ ແລະ ດີເດັ່ນ ຫ້ອງການ ຊາວໜຸ່ມນະຄອນ-ຫຼວງພະບາງຈຶ່ງໄດ້ງານພົບປະຕັ້ງຄ້າຍປະຈຳປີຂື້ນທີ່ ໂຮງຮຽນ ມຕ ຊຽງມວກ ໃນລະຫວ່າງວັນທີ 1-2 ເມສາ 2021 ຜ່ານມານີ້ ໂດຍເປັນປະທານຂອງທ່ານ ພູເງິນ ຊາມົນຕີ ຄະນະປະຈຳພັກນະຄອນ ຫົວໜ້າຄະນະຈັດຕັ້ງນະຄອນ-ຫຼວງພະບາງ ຜູ້ຊີ້ນຳອົງການຈັດຕັ້ງມະຫາຊົນ, ມີທ່ານ ໄພວັນ ຈັນທະສຸກ ຮອງເລຂາຄະນະບໍລິຫານງານຊາວໜຸ່ມແຂວງ, ມີບັນດາຄະນະປະຈຳພັກນະຄອນ, ຄະນະນຳຊາວໜຸ່ມປະຊາຊົນປະຕິວັດລາວຂັ້ນແຂວງ, ຄະນະບໍລິຫານງານຊາວໜຸ່ມນະຄອນ, ອຳນວຍການໂຮງຮຽນ, ຄະນະຊາວໜຸ່ມອອ້ມຂ້າງນະຄອນ ພ້ອມດ້ວຍພໍ່ແມ່ນັກຮຽນ, ຄູ-ອາຈານ ແລະ ນ້ອງນ້ອຍເຍົາວະຊົນ ມຕ-ມສ ທົ່ວນະຄອນເຂົ້າຮ່ວມ 17 ໂຮງຮຽນ ລວມທັງໝົດມີ 489 ສະຫາຍ, ຍິງ 236 ສະຫາຍ.

ໃນພິທີໄດ້ມີການວາງກະຕ່າດອກໄມ້ ເພື່ອສະແດງຄວາມຮູ້ບຸນຄຸນຕໍ່ປະເທດຊາດ ແລະ ທ່ານຜູ້ນຳຢູ່ອານຸ ສາວະລີປະ ທານ ໄກສອນ ພົມວິຫານ ແລະ ອານຸສາວິລີ ປະທານ ສຸພານຸວົງ ຈາກນັ້ນ ຈຶ່ງເລີ້ມແຫ່ຂະບວນພາເລດອ້ອມເທດສະ ບານນະຄອນຈົນເຖິງ ໂຮງຮຽນ ມຕ ຊຽງມວກ, ພິທີດັ່ງໄດ້ໃຫ້ຕາງໜ້າກອງເຍົາວະຊົນທັນວາທໍາການຈົກສະຫຼາກເອົາສະຖານທີ່ຕັ້ງຄ້າຍ, ຜູ້ກວດຍາມ 1 ຄືນ, ຜ່ານກົດລະບຽບຂອງຄ້າຍເຍົາວະຊົນ, ກົດລະບຽບພາຍໃນຄ້າຍ, ປະດັບປະດາຄ້າຍຂອງໃຜລາວໃຫ້ສຳເລັດ ແລະ ມີຄວາມເປັນລະບຽບຮ້ຽບຮ້ອຍ.

ພາຍຫຼັງໄດ້ເປີດພິທີຢ່າງເປັນທາງການແຕ່ລະຂະບວນໄດ້ແຂ່ງຂັນຕາມກິດຈະກຳຕ່າງໆເຊັ່ນ: ການແຂ່ງຂັນແບບແຜນທີ່ມີເນື້ອໃນ, ມີຄວາມໝາຍຕາມຮູບແບບແຜນການສະແດງຕ່າງໆປະກອບກັບສຽງເພງປະຕິວັດ, ການຍ້ຽມຊົມຄວາມງາມ-ຄວາມເປັນລະບຽບຮຽບຮ້ອຍຂອງແຕ່ລະຄ້າຍ, ການແຂ່ງຂັນຮ້ອງເພງເຍົາວະຊົນ, ການແຂ່ງຂັນນຸ່ງເຄື່ອງແບບຄົບຊຸດຂອງເຍົາວະຊົນ ແລະ ການແຂ່ງຂັນສິລະປະວັນນະຄະດີ (ຟ້ອນລວມໝູ່) ນອກນັ້ນໃນພາກຄໍ່າ ຍັງໄດ້ຮ່ວມມ່ວນຊື່ນຢ່າງເປັນຂະບວນຟົດຟື້ນກັບການຈັດກິດຈະກຳຊຸມນຸມໄຟ ທີ່ເປັນສີສັນໃນງານຕັ້ງຄ້າຍໃນຄັ້ງນີ້.

ຕອນທ້າຍພິທີໃນວັນທັດມາພິທີດັ່ງກ່າວໄດ້ທໍາການຈັດອັນດັບທີ ພ້ອມທັງມອບຂອງຂວັນລາງວັນໃຫ້ກັບກອງເຍົາວະຊົນທັນວາຕາມລຳດັບ ແລະ ຮ່ວມກັນປູກຕົ້ນໄມ້ໄວ້ເປັນທີ່ລະນຶກໃຫ້ແກ່ງານຕັ້ງຄ້າຍໃນຄັ້ງນີ້ອີກດ້ວຍ.