ວັນທີ 7 ເມສາ 2021ນີ້ ຊາວໜຸ່ມປະຊາຊົນປະຕິວັດລາວ ທົ່ວເມືອງນ້ຳບາກ ອອກແຮງງານລວມ ເພື່ອສ້າງຂະ ບວນການຕ້ອນຮັບວັນສຳຄັນຂອງຊາດ. ມີເລຂາ, ຮອງເລຂາ, ສະມາຊິກຊາວໜຸ່ມປະຊາຊົນປະຕິວັດລາວເຂົ້າຮວ່ມ.

ເພື່ອເປັນການຂ່ຳນັບຊົມເຊີຍ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ ວັນທີ 5 ເມສາ 1961 ຫາ ວັນທີ 5 ເມສາ 2021, ຕ້ອນຮັບວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 66 ປີ ວັນທີ 14 ເມສາ 1955 ຫາ ວັນທີ 14 ເມສາ 2021 ທີ່ຈະມາເຖີງນີ້.

ກິດຈະກຳຂອງການອອກແຮງງານລວມໃຫຍ່ ຂອງເມືອງນ້ຳບາກ ໃນຄັ້ງນີ້ແມ່ນອານາໄມ້ລ້າງຂີ້ຕົມ, ຂີ້ຝຸ່ນ, ສິ່ງເປີເປື້ອຍ, ຖາງຫຍ້າ, ເກັບຂີ້ເຫຍື້ອອອກຂົວນໍ້າບາກໃຫ້ມີຄວາມງົດງາມ ເພາະຈຸດດັ່ງກ່າວເປັນບ່ອນຊົມປາທຳມະຊາດ ຂອງວັງອາລຸລັກສັດນ້ຳຂອງເມືອງ, ພ້ອມທັງເກັບຂີ້ເຫຍື້ອ, ອ້ອມສະໂມສອນໃຫຍ່ຂອງເມືອງ, ອານຸສາວະລີປະທານ ໄກສອນ ພົມວິຫານ, ອານາໄມຮ່ອງລະບາຍນ້ຳ ຢູ່ສອງຝາກທາງ ຂອງເສັ້ນທາງເລກ 1 ເຊເທດສະບານເມືອງ, ບົວລະບັດຕົ້ນດອກໄມ້ປະດັບ, ຕົ້ນໄມ້ໃຫ້ໝາກ ຢູ່ຂອບເຂດຄວາມຮັບຜິດຊອບຂອງແຕ່ລະຫ້ອງການ. ເປັນການສ້າງຂະບວນການໃຫ້ຟົດຟື້ນ, ເປັນການສຶກສາອົບຮົມປູກຈິດສຳນຶກໃຫ້ແກ່ຊາວໜຸ່ມ-ເຍົາວະຊົນ ໄດ້ຮູ້ຈັດອານຸລັກຮັກສາສີ່ງແວດລ້ອມ, ທັງເປັນການຮຽນຮູ້ເຖີງປະຫວັດຄວາມເປັນມາຂອງວັນສຳຄັນດັ່ງກ່າວ, ພ້ອມທັງຮຽນຮູ້ເອົາຄຸນງາມຄວາມດີ, ແບບຢ່າງດຳລົງຊີວິດ ແລະ ແບບແຜນວິທີເຮັດວຽກ ຂອງທ່ານຜູ້ນຳມາໝູນໃຊ້ເຂົ້າໃນການດຳລົງຊີວິດ ແລະ ໜ້າທີ່ວຽກງານຂອງຕົນ.

ພາບ-ຂ່າວ: ພອນສັກ ສິງດາລັກ (ນັກຂ່າວເມືອງນໍ້າບາກ)