ໃນຕອນເຊົ້າຂອງວັນທີ 23 ມີນາ 2021ຢູ່ທີ່ວິທະຍາໄລເຕັກນິກແຂວງວຽງຈັນ ໄດ້ຈັດໃຫ້ມີກິດຈະກຳບໍລິຈາກເລືອດແບບສະໝັກໃຈ ໂດຍພາຍໃຕ້ຫົວຂໍ້ : ສິນໄຊຍຸກໃໝ່ ຮ່ວມໃຈບໍລິຈາກເລືອດ ແລະ ໃຫ້ເລືອດຄືການໃຫ້ຊີວິດ, ໂດຍມີບັນດາສະມາຊິກຊາວໝຸ່ມ-ໄວໜຸ່ມ ຈາກພະແນກການ, ອົງການ, ກົມກອງ, ໂຮງຮຽນ, ໂຮງໝໍສັດຕະວະແພດ, ລັດວິສາຫະກິດ ແລະ ນັກສຶກສາວິທະຍາໄລເຕັກນິກແຂວງວຽງຈັນ ຮ່ວມໃຈກັນບໍລິຈາກເລືອດແບບສະໝັກໃຈໄດ້ທັງໝົດ 157 ຖົງ ຍິງ 68 ຖົງ.

ທ່ານ ດາວສະຫວັນ ລາດຊະວົງ ຮອງເລຂາຄະນະບໍລິຫານງານຊາວໜຸ່ມແຂວງວຽງຈັນ ໄດ້ກ່າວໃນພິທີວ່າ: ການຈັດກິດຈະກຳບໍລິຈາກເລືອດຄັ້ງນີ້ ກໍ່ເພຶ່ອເປັນການສະເຫລີມສະຫລອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ ( 22 ມີນາ 1955 – 22 ມີນາ 2021 ) ແລະ ເພຶ່ອຂ່ຳນັບຮັບຕ້ອນວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 66 ປີ ( 14 ເມສາ 1955 – 14 ເມສາ 2021 ) ແລະ ທັງເປັນການຊ່ວຍເຫລືອສັງຄົມ.

ໂດຍສະເພາະຜູ້ທີ່ເຈັບເປັນກຳລັງນອນປິ່ນປົວຢູ່ໂຮງໝໍ ທີ່ກຳລັງຕ້ອງການເລືອດ, ເພຶ່ອນຳມາແຮໄວ້ຢູ່ສູນເລືອດແຂວງວຽງຈັນ, ເພື່ອກຽມໄວ້ແກ້ໄຂສຸກເສີນຜູ້ທີ່ຕ້ອງການປິ່ນປົວດ້ວຍເລືອດ, ທັງເປັນການກອບກູ້ຊີວິດຜູ້ທີ່ປະສົບອຸປະຕິເຫດ, ການຜ່າຕັດໃຫຍ່, ຄົນເຈັບທີ່ຂາດເລືອດ ແລະ ພະຍາດຕ່າງໆທີ່ຕ້ອງການເລືອດໃຫ້ທ່ວງທັນກັບຄວາມຕ້ອງການ.
ພາບ-ຂ່າວ: ບຸນມາ ແກ້ວບຸດດາ