ມີເດຍລາວແຂວງຈຳປາສັກ ຂ່າວ: ທັດຊະນະ ໃນວັນທີ 11 ພຶດສະພາ 2021 ນີ້, ທີ່ຫ້ອງວ່າການແຂວງຈຳປາສັກ ໄດ້ມີພິທີມອບ-ຮັບການຊ່ວຍເຫລືອ ເພື່ອຮັບໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ສະກັດກັ້ນການລະບາດ ພະຍາດໂຄວິດ-19 ຢູ່ແຂວງຈໍາປາສັກ ຈາກ ສອງພາກສ່ວນ ຄື: ບໍລິສັດ ຊີບີເອຟ ຟາຣມາ ຈໍາກັດ ມອບອຸປະກອນການແພດ ມີ ALCOHOL 70,Bt /60 ml 5.000 ແກ້ວ, ALCOHOL 70,Bt/1000 ml 270 ແກ້ວ, Antiseptic Hand Gel 100 ml 500 ແກ້ວ, Cap Disposable 10.000 ອັນ, Face Mask N95 ຈໍານວນ 300 ອັນ, Infared thermometer 60 ອັນ, Suppro Face Mask (Green, Blue, Pink) 560 ກັບ. ລວມມູນຄ່າ 150.000.000 ກີບ.

ກ່າວມອບໂດຍ ທ່ານ ດຣ ນາງ ວິໄລວັນ ພັນມະນີວົງ ຮອງຜູ້ອໍານວຍການ ບໍລິສັດ ຊີບີເອຟ ຟາຣມາ ຈໍາກັດ ແລະ ບໍລິສັດ ຮອນດາ ປາກເຊ ມອບ ຄອມພິວເຕີ້ PC 2 ຊຸດ, ເຂົ້າສານ, ນ້ຳສະອາດ ແລະ ອຸປະກອນການແພດ ລວມມູນຄ່າ 35.000.000 ກີບ ກ່າວມອບໂດຍ ທ່ານ ນາງ ດາວມະນີ ດວງຈະເລີນ ປະທານ ບໍລິສັດ ຮອນດາ ປາກເຊ, ເປັນກຽດກ່າວຮັບ ໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີ ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ, ມີຄະນະສະເພາະກິດສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ແຂວງຈຳປາສັກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານເຈົ້າແຂວງຈຳປາສັກ ກໍໄດ້ສະແດງຄວາມຂອບໃຈ ແລະ ຊົມເຊີຍມາຍັງ ພາກສ່ວນ ບໍລິສັດ ຊີບີເອຟ ຟາຣມາ ຈໍາກັດ ແລະ ບໍລິສັດ ຮອນດາ ປາກເຊ ທີ່ໄດ້ໃຫ້ການສະໜັບສະໜູນ ປະກອບສ່ວນເຂົ້າໃນການຈັດຕັ້ງປະຕິບັດວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ແຂວງຈຳປາສັກ. ພ້ອມນີ້, ທ່ານເຈົ້າແຂວງຈຳປາສັກ ໄດ້ແຈ້ງໃຫ້ຮູ້ເຖິງສະພາບລວມຂອງການລະບາດໂຄວິດ-19 ຢູ່ແຂວງຈຳປາສັກ ມີທ່າອຽງດີຂຶ້ນ, ໂຕເລກ ຜູ້ຕິດເຊື້ອແມ່ນຫຼຸດຜ່ອນລົງ ລວມຍອດຜູ້ຕິດເຊື້ອສະສົມ ທີ່ໄດ້ຮັບການປິ່ນປົວ ຢູ່ແຂວງຈໍາປາສັກ ມີທັງໝົດ 184 ຄົນ, ປິ່ນປົວດີ 3 ຄົນ, ຍັງສືບຕໍ່ປິ່ນປົວ 181 ຄົນ.