ມີເດຍລາວແຂວງເຊກອງ ຂ່າວ:ສີສັກດາ ບຸນໄຊຄຳ
ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານໂຄສະນາອົບຮົມປະຈຳປີ 2020 ແລະ ທິດທາງແຜນການປະຈຳປີ 2021 ຂອງຄະນະໂຄສະນາອົບຮົມເມືອງດາກຈຶງໄດ້ຈັດຂຶ້ນໃນວັນທີ 16 ມີນາ 2021 ນີ້ຢູ່ທີ່ສະໂມສອນຂອງເມືອງ, ໂດຍການເປັນປະທານຂອວທ່ານ ແສນວັນ ເມີນທະນົງຮັກ ຫົວໜ້າຄະນະໂຄສະນາອົບຮົມເມືອງ,ໃຫ້ກຽດເຂົ້າຮ່ວມມີທ່ານ ອຸ່ນຄຳ ຫຼ້າທະຈັກ ຮອງເລຂາພັກເມືອງ ຜູ້ຊີ້ນຳວຽກງານການເມືອງແນວຄິດ,ປະທານແນວລາວສ້າງຊາດເມືອງດາກຈຶງ, ມີທ່ານ ນາງ ສີສະຫງ່າ ແກ້ວດວງດີ ກຳມະການພັກແຂວງຫົວໜ້າຄະນະໂຄສະນາອົບຮົມແຂວງເຊກອງ, ມີຄະນະໂຄສະນາອົບຮົມເມືອງກະລຶມ, ບັນດາຫົວໜ້າ-ຮອງຫ້ອງການພ້ອມດ້ວຍເລຂາພັກບ້ານເທສະບານອ້ອມຂ້າງເມືອງດາກຈຶງເຂົ້າຮວ່ມ.

ທ່ານ ວຸດສຳພັນ ນິນໂພໄຊ ຮອງຫົວໜ້າຄະນະໂຄສະນາອົບຮົມເມືອງດາກຈຶງໄດ້ຕີລາຄາການຈັດຕັ້ງປະຕິບັດວຽກງານໂຄສະນາອົບຮົມປະຈຳປີ 2020 ວ່າ: ຄະນະໂຄສະນາອົບຮົມເມືອງດາກຈຶງແມ່ນຫ້ອງການໜຶ່ງຂອງພັກມີຖານະທຽບເທົ່າກັບບັນດາຫ້ອງການອື່ນໆ, ມີໂຄງປະກອບກົງຈັກການຈັດຕັ້ງມີ 3 ໜ່ວຍງານຄື: ໜ່ວຍງານບໍລິຫານ-ຈັດຕັ້ງ, ໜ່ວຍງານອົບຮົມ, ຄົ້ນຄ້ວາສັງລວມ, ຫ່າງສຽງສັງຄົມ ແລະ ໜ່ວຍງານໂຄສະນາປາຖະກະຖາ, ໂຄສະນາເຄື່ອນທີ ແລະ ໂຄສະນາຜ່ານສື່, ມີພະນັກງານ-ລັດຖະກອນທັງໝົດ 8ຄົນ, ຍິງ 1 ຄົນ, ຊຶ່ງຄະນະພັກ,ພະນັກງານ-ລັດຖະກອນກໍ່ໄດ້ເອົາໃຈໃສ່ຕາມພາລະບົດບາດຂອບເຂດສິດ ແລະ ໜ້າທີ່ທີ່ກຳນົດໄວ້ຢ່າງຕັ້ງໜ້າ ແລະ ເປັນເຈົ້າການດຳເນີນສຶກສາອົບຮົມທາງດ້ານການເມືອງແນວຄິດໃຫ້ແກ່ຖັນແຖວສະມາຊິກພັກ, ພະນັກງານ-ລັດຖະກອນ, ທະຫານ-ຕຳຫຼວດຕະຫຼອດຮອດພໍ່ແມ່ປະຊາຊົນບັນດາເຜົ່າໃນຂອບເຂດຄວາມຮັບຜິດຊອບຂອງຕົນຢ່າງແທດເຖິງ ແລະ ສອດຫ້ອຍກັບທຸກໜ້າທີ່ວຽກງານຂອງຂະແໜ່ງການຕ່າງໆເປັນຕົ້ນ: ແມ່ນການຈັດຕັ້ງເຜີຍແຜ່, ເຊື່ອມຊຶມມະຕິກອງປະຊຸມເປີດກ້ວາງຄົບຄະນະຄັ້ງທີ 10 ສະໄໝທີ່ X ຂອງສູນກາງພັກ, ຄັ້ງທີ່ 11 ສະໄໝທີ IX ຂອງອົງຄະນະພັກແຂວງ ແລະ ມະຕິ 02 ສະໄໝທີ່ XV ຂອງອົງຄະນະບໍລິຫານງານພັກເມືອງດາກຈຶງ, ອັນພົ້ນເດັ່ນ: ສຳເລັດການໂຄສະນາຜ່ານສື່ວັນສ້າງຕັ້ງພັກປະຊາຊົນປະຕິວັດລາວຄົບຮອບ 65 ປີ ຜ່ານສະຖານີວິທະຍຸຊຸມຊົນເພື່ອພັດທະນາເມືອງດາກຈຶງ ແລະ ໂຄສະນາປາຖະກະຖາວັນສ້າງຕັ້ງແນວລາວສ້າງຊາດຄົບຮອບ 70 ປີ ເຮັດໃຫ້ຄະນະພັກ, ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈຢ່າງເລິກເຊິງ.


ໂອກາດນີ້ທ່ານ ນາງ ສີສະຫງ່າແກ້ວດວງດີ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງເຊກອງໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະໜຶ່ງປີຜ່ານມາກໍ່ຄືຜົນສຳເລັດກອງປະຊຸມໃຫຍ່ຕ່າງໆຂອງພັກ-ຂອງຊາດ, ພ້ອມໄດ້ຮຽກຮ້ອງໃຫ້ບັນດາຄະນະພັກ, ສະມາຊິກພັກ, ພະນັກງານ-ລັດຖະກອນຕ້ອງໄດ້ເຊື່ອມຊຶມເລົ່າມູນເຊື້ອວັນສຳຄັນຂອງພັກ-ຂອງຊາດ ແລະ ຂອງສາກົນ, ເພື່ອແນ່ໃສ່ຮັບປະກັນເຮັດໃຫ້ສະມາຊິກພັກ, ພະນັກງານມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມຈົງຮັກພັກດີ ແລະ ເດັດດ່ຽວຕີຖອຍແນວຄິດປະກົດການຫຍໍ້ທໍ້ໃນສັງຄົມ ,ປະຕິບັດໜ້າທີການເມືອງທີ່ຂັ້ນເທິງໄດ້ມອບໝາຍໃຫ້ຢ່າງເຂັ້ມງວດ.