ມີເດຍລາວແຂວງເຊກອງ
ໃນວັນທີ 6 ຕຸລາ 2021 ນີ້ທີ່ຫ້ອງການບ້ານດາກຕຽມໄດ້ພິທີປະກາດຄອບຄົວ ແລະ ບ້ານ 3 ບ້ານຄື: ບ້ານດາກຕຽມ, ດາກດູງ ແລະ ບ້ານຈະລິງເມືອງດາກຈຶງແຂວງເຊກອງເປັນບ້ານປ້ອງກັນຊາດເຂັ້ມແຂງໂດຍພາຍໃຕ້ການເປັນປະທານຂອງທ່ານ ໄລສວນ ມິດສຸວັນ ກຳມະການພັກແຂວງ ເລຂາພັກເມືອງເຈົ້າເມືອງໆດາກຈຶງປະທານປ້ອງກັນຊາດ-ປ້ອງກັນຄວາມສະຫງົບຂັ້ນເມືອງ, ມີທ່ານ ພັອ ຫຼອດ ນັນທະວົງ ຄະນະພັກກອງບັນຊາການ ຫົວໜ້າຫ້ອງເສນາທະຫານແຂວງ, ທ່ານ ພັທ ແກ້ວອູດອນ ສາຍນໍ້າແດ ຄະນະປະຈຳພັກເມືອງຫົວໜ້າການເມືອງກອງບັນຊາການທະຫານເມືອງດາກຈຶງ, ມີບັນດາຄະນະພັກ-ຄະນະບັນຊາການ ປກສ-ປກຊ ແຂວງ ແລະ ເມືອງ, ເລຂາພັກບ້ານ-ນາຍບ້ານຕະຫຼອດຮອດພໍ່ແມ່ປະຊາຊົນທັງ 3 ບ້ານເຂົ້າຮ່ວມ.

ທ່ານ ພັທ ແກ້ວອຸດອນ ສາຍນໍ້າແດ ຄະນະປະຈຳພັກເມືອງຫົວໜ້າກອງບັນຊາການທະຫານເມືອງດາກຈຶງໄດ້ລາຍງານການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງໃຫ້ຮູ້ວ່າ: ກຸ່ມຊຽງຫຼວງໃນ 3 ບ້ານຄື: ບ້ານດາກຕຽມ, ບ້ານດາກດູງ ແລະ ບ້ານຈະລິງ, ມີພົນລະເມືອງທັງໝົດ 1.620 ຄົນ, ຍິງ 832 ຄົນ, ຈຳນວນຄອບຄົວມີ 296 ຄອບຄົວ, ມີ 252 ຫຼັງຄາເຮືອນ, ໃນຜ່ານມາບ້ານມີແນວຄິດອຸ່ນອຽນທຸນທ່ຽງເຊື່ອໝັ້ນຕໍ່ການນຳພາຂອງພັກ, ມີຄວາມສາມັກຄີຊ່ວຍເຫຼື່ອ ເຊິ່ງກັນ ແລະ ກັນ, ໄດ້ເອົາໃຈໃສ່ເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິຄຳສັ່ງຕ່າງໆຂອງຂັ້ນເທິງ, ໄດ້ຊີ້ນຳຄະນະພັກອຳນາດການປົກຄອງບ້ານສ້າງແຜນການນຳພາວຽກງານປ້ອງກັນຊາດ-ປ້ອງກັນຄວາມສະຫງົບ, ປັບປຸງກອງຫຼອນ ແລະ ປກສ ບ້ານມີຄວາມໜັກແໜ້ນເຂັ້ມແຂງ, ຕິດຕາມສະພາບກຳແໜ້ນສະພາບການເຄື່ອນໄຫວຂອງສັດຕູ ແລະ ກຸ່ມຄົນບໍ່ວັງດີໄດ້ທັນເວລາ, ສາມາດປົກປັກຮັກສາເຂດນໍ້າ, ແດນດິນຂອງບ້ານເຮັດໃຫ້ບ້ານມີຄວາມສະຫງົບໂດຍພື້ນຖານ, ຊຶ່ງຜົນການປະເມີນແມ່ນໄດ້ 6 ມາດຖານຂອງຄອບຄົວ ແລະ 6 ມາດຖານຂອງບ້ານເທົ່າກັບ 100%, ພ້ອມດ່ຽວກັນນີ້ກໍ່ໄດ້ຜ່ານຂໍ້ຕົກລົງຂອງກອງບັນຊາການທະຫານແຂວງສະບັບເລກທີ 532/ກບຊ-ຂ, ລົງວັນທີ 5 ກໍລະກົດ 2021 ວ່າດ້ວຍການຢັ້ງຢືນ ແລະ ຮັບຮອງ 3 ບ້ານເປັນບ້ານປ້ອງກັນຊາດເຂັ້ມແຂງ ແລະ ຂໍ້ຕົກລົງຂອງກອງບັນຊາການທະຫານເມືອງດາກຈຶງສະບັບເລກທີ 030/ກບຊ-ມຈ, ລົງວັນທີ 27 ສິງຫາ 2021 ວ່າດ້ວຍການຢັ້ງຢືນຄອບຄົວປ້ອງກັນຊາດເຂັ້ມແຂງ.

ຫຼັງຈາກນັ້ນທ່ານ ໄລສວນ ມິດສຸວັນ ກຳມະການພັກແຂວງ ເລຂາພັກເມືອງເຈົ້າເມືອງໆດາກຈຶງ ປະທານປ້ອງກັນຊາດ-ປ້ອງກັນຄວາມສະຫງົບຂັ້ນເມືອງໄດ້ໃຫ້ກຽດຂຶ້້ນມອບໃບຢັ້ງຢືນໃຫ້ແກ່ 3 ບ້ານເປັນບ້ານປ້ອງກັນຊາດເຂັ້ມແຂງ ແລະ ກ່າວຮັບແມ່ນທ່ານເລຂາພັກບ້ານທັງ 3 ບ້ານ, ພ້ອມມອບໃບຢັ້ງຢືນຄອບຄົວເປັນປ້ອງກັນຊາດເຂັ້ມແຂງໃນຈຳນວນ 270 ຄອບຄົວ.

ຂ່າວ-ພາບ ສີສັກດາ ບຸນໄຊຄຳ