ມີເດຍລາວແຂວງເຊກອງ ຂ່າວ: ສີສັກດາ ບຸນໄຊຄຳ ກອງປະຊຸມເປີກວ້າງຄົບຄະນະບໍລິຫານງານພັກເມືອງດາກຈຶງຄັ້ງທີ 3 ສະໄໝທີXV ສຳເລັດລົງຢ່າງຈົບງາມໃນວັນທີ 12 ມີນາ 2021 ນີ້. ທີ່ສະໂມສອນຂອງເມືອງ ພາຍໃຕ້ການເປັນປະທານຂອງ ສະຫາຍ ໄລສວນ ມິດສຸວັນ ກຳມະການພັກແຂວງເລຂາພັກເມືອງເຈົ້າເມືອງ-ເມືອງດາກຈຶງ, ມີສະຫາຍ ຂັນຕີ ສີລະວົງສາ ກຳມະການປະຈຳພັກແຂວງ ຮອງເຈົ້າແຂວງ-ແຂວງເຊກອງ,ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ-ຮອງຫ້ອງການອ້ອມຂ້າງເມືອງພ້ອມດ້ວຍຄະນະພັກຮາກຖານບ້ານເຂົ້າຮ່ວມທັງໝົດ 110 ສະຫາຍ, ຍິງ 11ສະຫາຍ.


ສະຫາຍ ໄລສວນ ມິດສຸວັນ ກຳມະການພັກແຂວງເລຂາພັກເມືອງເຈົ້າເມືອງໆດາກຈຶງໃຫ້ຮູ້ວ່າ: ໃນໄລຍະໜຶ່ງປີຜ່ານມາເປັນປີທຳອິດຂອງການຈັດຕັ້ງຜັນຂະຫຍາຍມະຕີກອງປະຊຸມໃຫຍ່ຜູ້ແທນອົງຄະນະພັກເມືອງດາກຈຶງຄັ້ງທີ XV ກໍ່ຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ, ເຊິ່ງຢູ່ໃນໄລຍະສະພາບການບັນດາປະເທດໃນໂລກ ແລະ ພາກພື້ນກຳລັງປະເຊີນໜ້າກັບສິ່ງທ້າທາຍແມ່ນໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດພະຍາດໂຄວິດ-19, ເວົ້າລວມ, ເວົ້າສະເພາະຢູ່ເມືອງດາກຈຶງໄດ້ຮັບຜົນກະທົບໂດຍກົງຕໍ່ການຂະຫຍາຍຕົວທາງດ້ານເສດຖະກິດສັງຄົມ, ເຖິງຢ່າງໃດກໍ່ຕາມດ້ວຍຄວາມເອົາໃຈໃສ່ຊີ້ນຳ-ນຳພາຢ່າງໃກ້ຊິດຈາກຄະນະປະຈຳພັກແຂວງ, ບວກກັບຄວາມຮັບຜິດຊອບສູງຂອງຄະນະບໍລິຫານງານພັກເມືອງ, ຄວາມຕື່ນຕົວເປັນເຈົ້າຂອງທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນມີຄວາມສາມັກຄີເປັນປຶກແຜ່ນແໜ້ນໜາ, ວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ຮັບການກໍ່ສ້າງປັບປຸງເຂັ້ມແຂງທາງດ້ານການຈັດຕັ້ງ, ຍົກລະດັບຄວາມສາມາດໃນການປະຕິບັດໜ້າທີ່ ປກຊ -ປກສ ດ້ວຍການຫັນພະນັກງານລົງກໍ່ສ້າງຮາກຖານການເມືອງໄລຍະສັ້ນສຳເລັດ 36 ບ້ານ, ປັບປຸງກົດລະບຽບຂອງບ້ານສຳເລັດ 36 ບ້ານ, ອັນຜົນເດັ່ນແມ່ນສຳເລັດການຝຶກອົບຮົມການເມືອງ-ການທະຫານໃຫ້ແກ່ກອງຫຼອງບ້ານຈຳນວນ 2 ເຂດຄື: ເຂດເອກະລາດ ແລະ ເຂດອາຢູນ ເຊິງປະຕິບັດໄດ້ 80% ຂອງແຜນການປີ, ການຈັດຕັ້ງປະຕິບັດແຜນພັດທະນາເສດຖະກິດສັງຄົມສາມາດປະເມີນຜົນສຳເລັດໂດຍສັງເຂບໃນການຄຸ້ມຄອງດ້ານມະຫາພາກ, ດ້ານເສດຖະກິດ, ດ້ານສັງຄົມ, ຊຶ່ງມີລວມຍອດຜະລິດຕະພັນພາຍໃນ ( GO ) ປະຕິບັດໄດ້ 377 ກ່ວາຕື້ກີບເທົ່າກັບ 92,53 % ຂອງແຜນການປີ, ມີອັດຕາການເພີ່ມຂຶ້ນສະເລ່ຍ 7,8%ຕໍ່ປີ; ໃນນັ້ນດ້ານກະສິກຳ-ປ່າໄມ້ປະຕິບັດໄດ້ 236 ກ່ວາຕື້ກີບ, ກວມເອົາ 39,38%; ອຸດສາຫະກຳ-ການຄ້າປະຕິບັດໄດ້ 71 ກວ່າຕື້ກີບ, ກວມເອົາ 23,33%; ແລະ ຂົງເຂດບໍລິການປະຕິບັດໄດ້ 68 ກ່ວາຕື້ກີບ, ກວມເອົາ 37,29%; ລາຍໄດ້ຜະລິດຕະພັນພາຍໃນ ( GO ) ສະເລ່ຍຕໍ່ຫົວຄົນບັນລຸໄດ້ 14.957.250ກີບ ເທົ່າກັບ 1.847 ໂດລາຕໍ່ຄົນຕໍ່ປີ.


ໂອກາດນີ້ສະຫາຍ ຂັນຕີ ສີລະວົງສາ ກຳມະການປະຈຳພັກແຂວງຮອງເຈົ້າແຂວງເຊກອງກໍ່ໄດ້ກ່າວສະແດງຄວາມຊົມເຊີຍຕໍ່ຜົນສຳເລັດອັນໃຫຍ່ຫລວງຂອງອົງຄະນະພັກເມືອງໃນດ້ານຕ່າງໆທີ່ຍາດມາໄດ້, ພ້ອມທັງຮຽກຮ້ອງໃຫ້ບັນດາສະຫາຍຄະນະບໍລິຫານງານເມືອງພ້ອມກັນເອົາໃຈໃສ່ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງ, ໃຫ້ສົມກັບຄວາມໄວ້ເນື້ອເຊື່ອໃຈຂອງຜູ້ແທນກອງປະຊຸມທີ່ໄດ້ເລືອກເອົາບັນດາສະຫາຍເປັນຕົວແທນແກນນຳເພື່ອຊີ້ນຳ-ນຳພາປະຊາຊົນສືບຕໍ່ພັດທະນາເມືອງດາກຈຶງໃຫ້ດີຂື້ນເທື່ອລະກ້າວ.