ມີເດຍລາວແຂວງເຊກອງ ຂ່າວ: ອິນແປງ
ໃນລະຫວ່າງວັນທີ 27-29 ເມສາ(4)2021ນີ້ຫ້ອງການຍຸຕິທຳເມືອງໄດ້ເຄື່ອນໄຫວລົງປະກາດ ແລະ ມອບໃບຢັ້ງຢືນບ້ານແບບຢ່າງໃນການປະຕິບັດກົດໝາຍຢູ່ 5 ບ້ານຄື: ບ້ານດາກຕຽມ,ດາກເຕຼິບ,ດາກດໍ,ດາກຕະອອກນ້ອຍ ແລະ ບ້ານ ດາກຕະອອກໃຫຍ່,ໂດຍການໃຫ້ກຽດເຂົ້າຂອງທ່ານ ເພັງນາ ຈັນທະພອນ ຮອງເລຂາພັກເມືອງ ປະທານກວດກາພັກ-ລັດ ຜູ້ຊີ້ນຳວຽກງານປົກປ້ອງກົດໝາຍຂັ້ນເມືອງ,ມີທ່ານ ພົມວຽງໄຊ ເກດສະໜາຄຳ ກຳມະການພັກເມືອງ ຫົວໜ້າຫ້ອງການຍຸຕິທຳເມືອງ,ພ້ອມດ້ວຍອົງການຈັດຕັ້ງ 5 ບ້ານເຂົ້າຮ່ວມ.

ທ່ານ ສອນນີຄຳ ໄຊຍະເບ້ຍ ຮອງຫົວໜ້າຫ້ອງການຍຸຕິທຳເມືອງດາກຈຶງໃຫ້ຮູ້ວ່າ:ການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ເປັນການສ້າງສະຕິຕື່ນຕົວເຄົາລົບ ແລະ ປະຕິບັດລັດຖະທຳມະນູນ,ກົດໝາຍຢ່າງຖືກຕ້ອງເລິກເຊິ່ງ,ເສີມຂະຫຍາຍມູນເຊື້ອສາມັກຄີປອງດອງພາຍໃນຄອບຄົວ ແລະ ບ້ານໃຫ້ໜັກແໜ້ນ,ສະກັດກັ້ນຕີຖອຍທຸກປະກົດການຫຍໍ້ທໍ້ທີ່ລະເມີດຕໍ່ກົດໝາຍ,ປະກອບສ່ວນຢ່າງຫ້າວຫັ້ນໃນການພັດທະນາຄອບຄົວ ແລະ ບ້ານໃຫ້ມີຄວາມເຂັ້ມແຂງ,ມີຄວາມສະເໝີພາບ,ຮູ້ນຳພາແກ້ໄຂຂໍ້ຂັດແຍ່ງຕ່າງໆຢ່າງສັນຕິວິທີ,ປະຊາຊົນໄດ້ຮັບຄວາມສະເໝີພາບ,ຍຸຕິທຳ ແລະ ສ້າງຄວາມໝັ້ນຄົງໃຫ້ແກ່ລັດປະຊາທິປະໄຕປະຊາຊົນທີ່ປົກຄອງດ້ວຍລັດຖະທຳມະນູນ ແລະ ກົດໝາຍ,ເຊິ່ງໃນປີ 2020 ສາມາດປະເມີນຜົນການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍໄດ້ທັງໝົດ 5 ບ້ານທີ່ເຫັນວ່າຄົບຕາມມາດຖານເງື່ອນໄຂທີ່ກະຊວງຍຸຕິທຳວາງອອກຄື: ບ້ານດາກຕຽມ,ດາກເຕຼິບ,ດາກດໍ,ດາກຕະອອກນ້ອຍ ແລະ ບ້ານ ດາກຕະອອກໃຫຍ່.


ໂອກາດນີ້ທ່ານ ເພັງນາ ຈັນທະພອນ ຮອງເລຂາພັກເມືອງ ປະທານກວດກາພັກ-ລັດ ເມືອງກໍ່ໄດ້ໃຫ້ກຽດຂຶ້ນມອບໃບຢັ້ງຢືນໃຫ້ 5 ບ້ານພ້ອມຮຽກຮ້ອງໃຫ້ຄະນະພັກອຳນາດການປົກຄອງບ້ານຖືສຳຄັນການສຶກສາອົບຮົມການເມືອງແນວຄິດເປັນໜ້າທີ່ຕົ້ນຕໍ,ແກ້ໄຂບັນຫາຂໍ້ຂັດແຍ່ງພາຍໃນບ້ານໃຫ້ຕົກໄປຢ່າງຂາດຕົວ,ເປັນເຈົ້າການຕື່ນຕົວຮ່ຳຮຽນແນວທາງລະບຽບກົດໝາຍຂອງພັກ-ລັດໃຫ້ເປັນຂະບວນຟົດຟື້ນຕໍ່ເນື່ອງ ແລະກ້ວາງຂວາງ.