ມີເດຍລາວແຂວງບໍ່ແກ້ວ ໂດຍ: ວໍລະສິດ ພິດສະຫາຍ.
ມອບເຄື່ອງອຸປະກອນການແພດໃຫ້ກອງບັນຊາການທະຫານແຂວງບໍ່ແກ້ວ ມູນຄ່າ 23 ລ້ານກ່ວາກີບ
ໃນວັນທີ 27 ພຶດສະພາ 2021 ນີ້, ກອງບັນຊາການຕຳຫຼວດລາດຕະເວນທາງນ້ຳ ແຂວງຢວນນານ ສປຈີນ ນໍາເອົາເຄື່ອງຊ່ວຍເຫຼືອເປັນເຄື່ອງອຸປະກອນການແພດ ມາມອບໃຫ້ແກ່ກອງບັນຊາການທະຫານແຂວງບໍ່ແກ້ວ ໃນການຕ້ານ ແລະ ສະກັດກັ້ນ ການແຜ່ລະບາດພະຍາດ ໂຄວິດ-19 ໂດຍພິທີມອບ-ຮັບໄດ້ຈັດຢູ່ທີ່ ສູນປະສານງານລາວ-ຈີນ ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ. ເຄື່ອງທີ່ນໍາມາມອບຊ່ວຍເຫຼືອໃນຄັ້ງນີ້, ປະກອບມີ ອຸປະກອນການແພດຄື: ຢາປ້ອງກັນໂຄວິດ-19 ຈໍານວນ 300 ກັບ, ຜ້າອັດປາກ-ອັດດັງKN95 ຈໍານວນ 500 ຜ້າອັດປາກ-ດັງ (ຊະນິດ 3 ຊັ້ນ) ຈໍານວນ 3000 ອັນ, ເຈວລ້າງມື ຈໍານວນ 20 ກົ້ງ, ນໍ້າຢາຂ້າເຊື້ອ ຈໍານວນ 40 ຖັງ, ບັ້ງສີດຢາຂ້າເຊື້ອ ຈໍານວນ 08 ອັນ, ເຫຼົ້າ 75 ຈໍານວນ 35 ລິດ, ເຄື່ອງວັດແທກອຸນຫະພູນ ຈໍານວນ 07 ເຄື່ອງ, ຖົງມືຢາງ ຈໍານວນ 15 ກັບ, ແວນຕາປອງກັນຈໍານວນ 30 ອັນ ແລະ ຊຸດປ້ອງກັນພະຍາດຈໍານວນ 30 ຊຸດ ຄິດເປັນມູນຄ່າຈຳນວນທັງໝົດ 15.639 ຢວນ ຫຼື 23 ລ້ານກ່ວາກີບ.

ຈາກນັ້ນຍັງໄດ້ເຊັ່ນບົດບັນທຶກຮ່ວມຂອງສອງຝ່າຍ. ເປັນກຽດກ່າວມອບໂດຍສະຫາຍ ພົນຕີ ຢວນຢ່າພິງ ຫົວໜ້າກອງບັນຊາການຕຳຫຼວດລາດຕະເວນທາງນໍ້າ ແຂວງຢວນນານ ສປຈີນ ແລະ ກຽດກ່າວຮັບຂອງສະຫາຍ ພັນໂທ ໂສວັນ ພັນທັນນີ ຄະນະພັກກອງບັນຊາການ ຫົວໜ້າຫ້ອງເສນາທິການ ກອງບັນຊາການທະຫານແຂວງບໍ່ແກ້ວ ພ້ອມທັງກ່າວສະແດງຄວາມຂອບໃຈນໍາ ພ້ອມດ້ວຍຄະນະ ທີ່ໄດ້ນໍາເອົາວັດຖຸອຸປະກອນການແພດ ມາມອບໃຫ້ ກອງບັນຊາການທະຫານແຂວງບໍ່ແກ້ວ ໃນຄັ້ງນີ້, ເຊິ່ງສະແດງໃຫ້ເຫັນເຖິງຄວາມເປັນຫ່ວງເປັນໄຍບົນພື້ນຖານການເສີມຂະຫຍາຍສາຍພົວພັນຮ່ວມມືຮອບດ້ານ, ຄວາມສາມັກຄີແບບພິເສດລະຫວ່າງສອງຊາດ ລາວ-ຈີນ, ຈີນ-ລາວ ໃຫ້ເພີ່ມພູນຄູນສ້າງງອກງາມຍີ່ງໆຂຶ້ນ, ພ້ອມທັງ ໃຫ້ຄໍາໝັ້ນສັນຍາວ່າ ຈະນໍາເອົາເຄື່ອງອຸປະກອນການແພດຈໍານວນດັ່ງກ່າວ ໄປແຈກຢາຍໃຫ້ບັນດາພະນັກງານ-ນັກຮົບໃນທົ່ວກົມກອງ ໃຫ້ທົ່ວເຖີງ ແລະ ນໍາໃຊ້ເຂົ້າໃນການ ສະກັດກັ້ນ ແລະ ຕ້ານການແຜ່ລະບາດຂອງເຊື້ອພະຍາດໂຄວິດ-19 ຢຸູ່ພາຍໃນປະເທດລາວ ເວົ້າລວມ ເວົ້າສະເພາະ ແຂວງບໍ່ແກ້ວ ໃຫ້ໄດ້ຮັບໝາກຜົນສູງສຸດ. ພ້ອມດຽວກັນນັ້ນສະຫາຍ ພົນຕີ ຢວນຢ່າພິງ ຍັງໄດ້ມອບອຸປະກອນການແພດໃຫ້ ກອງບັນຊາການປ້ອງກຫັນຄວາມສະຫງົບແຂວງ ແລະ ກອງບັນຊາການທະຫານເມືອງຕົ້ນເຜິ້ງ ຢ່າງສົມກຽດ.