ມີເດຍລາວແຂວງຄຳມ່ວນ ໃນວັນທີ 13 ພຶດສະພາ 2021 ທາງທະນາຄານ 4 ແຫ່ງພາຍໃນແຂວງຄຳມ່ວນຄື : ທະນາຄານພັດທະນາລາວ, ທະນາຄານສົ່ງເສີມກະສິກຳ, ທະນາຄານການຄ້າຕ່າງປະເທດລາວ ແລະ ທະນາຄານນະໂຍບາຍ ສາຂາແຂວງຄຳມ່ວນ ໄດ້ນຳເອົາເຄື່ອງຂະຫຍາຍສຽງ ( ແອັມ )ມູນຄ່າ 3 ລ້ານກີບ. ມາມອບໃຫ້ພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວແຂວງຄຳມ່ວນ. ເປັນກຽດກ່າວຮັບໂດຍ ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວແຂວງ, ມີບັນດາຫົວໜ້າ, ຮອງຫົວໜ້າຂະແໜງການ, ກອງວິຊາການກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ໄຊສົມບູນ ສຸວັນດາລາ ກໍ່ໄດ້ກ່າວສະແດງຄວາມຂອບໃຈມາຍັງ 4 ທະນາຄານທີ່ໄດ້ໃຫ້ການຊ່ວຍເຫລືອ – ອຸປະຖໍາ ແລະ ຫວັງວ່າຈະສືບຕໍ່ໃຫ້ການຊ່ວຍເຫລືອຕື່ມອີກໃນຄັ້ງຕໍ່ໄປ. ເຊິ່ງເຄື່ອງຂະຫຍາຍສຽງດັ່ງກ່າວນີ້ ແມ່ນຈະໄດ້ນຳໃຊ້ເຂົ້າໃນວຽກສື່ມວນຊົນໃຫ້ເກີດດອກອອກຜົນ ເພື່ອກະຈາຍສຽງໃຫ້ປະຊາຊົນໄດ້ຮັບຮູ້ ແລະ ຮັບຟັງ ເຖິງການໂຄສະນາເຜີຍແຜ່ກ່ຽວກັບການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ໃນຕອນເຊົ້າຂອງວັນດຽວກັນ ທ່ານ ແກ້ວນ້ອຍ ສີວິໄລ ຜູ້ບໍລິຫານຮ້ານໄວຫວານ ຍັງໄດ້ນຳເອົານໍ້າດື່ມຈຳນວນ 30 ແພັກ, ລວມມູນຄ່າ 540,000 ກີບ ມາມອບໃຫ້ພະແນກ ຖວທ ແລະ ເຄື່ອງດັ່ງກ່າວນີ້ແມ່ນຈະໄດ້ນຳໄປມອບຕໍ່ໃຫ້ຄະນະສະເພາະກິດຂອງແຂວງຄຳມ່ວນ.