ກອງປະຊຸມສະຫຼຸບວຽກງານພະລາທິການ – ການເງິນ ປະຈໍາປີ 2020 ແລະ ວາງທິດທາງແຜນການປີປະຈໍາປີ 2021 ຂອງກອງບັນຊາການທະຫານແຂວງຫຼວງພະບາງ ໄດ້ຈັດຂື້ນໃນວັນທີ 24 ມີນາ 2021 ນີ້, ໂດຍການເປັນປະທານຂອງ ສະຫາຍ ພັນເອກ ວິລ່ຽມ ວົງທິສານ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງຫຼວງພະບາງ, ມີສະຫາຍ ພັນໂທ ທອງລາ ໄຊຍະວົງສັກ ຄະນະພັກກອງບັນຊາການ ຫົວໜ້າຫ້ອງພະລາທິການທະຫານແຂວງ, ມີຄະນະພັກ – ຄະນະບັນຊາອົງການອ້ອມຂ້າງ, ພະແນກການກ່ຽວຂ້ອງ, ພະນັກງານຫຼັກແຫຼ່ງ ແລະ ພະນັກງານທີ່ເຮັດວຽກງານພະລາທິການ – ການເງິນຈາກກົມກອງທົ່ວທະຫານແຂວງເຂົ້າຮ່ວມ.


ສະຫາຍ ພັນໂທ ສຸກແກ້ວ ອິນດາປິງ ຄະນະພັກຮາກຖານ ຮອງຫົວໜ້າຫ້ອງພະລາທິການທະຫານແຂວງ ຜ່ານບົດສະຫຼຸບຕີລາຄາຜົນສໍາເລັດ ຂອງການຈັດຕັ້ງປະຕິບັດວຽກງານພະລາທິການ – ການເງິນທົ່ວທະຫານແຂວງຫຼວງພະບາງ ໄດ້ຖືສໍາຄັນລົງເລິກວຽກງານສຶກສາອົບຮົມການເມືອງ – ນໍາພາແນວຄິດ ໃຫ້ພະນັກງານ – ນັກຮົບດ້ວຍຫຼາຍຮູບການ ແລະ ຕໍ່ເນື່ອງ ເຮັດໃຫ້ພະນັກງານສະມາຊິກພັກ – ນັກຮົບມີຄວາມຕື່ນຕົວທາງດ້ານການເມືອງ ແລະ ເຂັ້ມງວດທາງຕໍ່ການຈັດຕັ້ງ, ສະແດງອອກການເຄື່ອນໄຫວຕ້ານ ແລະ ສະກັດກັ້ນບັນຫາປາກົດການຫຍໍ້ທໍ້ໃນສັງຄົມ, ກົມກອງໄດ້ເປັນຢ່າງດີ.ໄດ້ຊຸກຍູ້ເຮັດວຽກງານຮັບປະກັນຊີວິດການເປັນຢູ່ ແລະ ຈັດຕັ້ງລ້ຽງດູທັບຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ແຂງດ້ວຍຕົນເອງ, ຕິດພັນກັບທິດ 4 ປູກ 4 ລ້ຽງທີ່ກົມໃຫຍ່ພະລາທິການກອງທັບວາງອອກ. ເຊິ່ງສາມາດຮັບປະກັນດ້ານສະບຽງ-ອາຫານເຂົ້າກິນ 100% ຊີ້ນ-ປາ 50%,ຜັກ 80%, ພ້ອມກັນນີ້ຍັງຮັບປະກັນດ້ານການກິນ-ດື່ມ ແລະ ເຄື່ອງນຸ່ງຮົມ, ດ້ານການເງິນ ຕາມລະບົບອັດຕາທີ່ຂັ້ນເທິງໄດ້ກໍານົດໄວ້ໄດ້ 100%, ຮັບປະກັນດ້ານສຸຂະພາບ, ການຂົນສົ່ງ ແລະ ເຊື້ອໄຟ ພ້ອມກັນນີ້ສູ້ຊົນປັບປຸງກໍ່ສ້າງ ແລະ ສ້ອມແປງພື້ນຖານໂຄງລ່າງຄ້າຍຄູຫັນເຂົ້າສູ່ລະບົບທີ່ແໜ້ນໜາຖາວອນ ໃນນີ້ໄດ້ສໍາເລັດໂຄງການກໍ່ສ້າງເຮືອນນອນກອງຮ້ອຍ 26, ປັບປຸງເດີ່ນ ແລະ ຕິດຕັ້ງກັນສາດໂຮງງານນໍ້າດື່ມ, ໂຄງການກໍ່ສ້າງສາງຢາ, ຕິດຕັ້ງກໍ່ສ້າງລະບົບນໍ້າປະປາ ແລະ ນໍ້າລິນຢູ່ໝວດສາງຢຸດໂທຫ້ອງເຕັກນິກ ແລະ ກອງພັນ 414, ຟື້ນຟູສ້ອມແປງໂຮງຮຽນການທະຫານທ້ອງຖິ່ນ, ສ້ອມແປງໄຟຟ້າ ແລະ ປະດັບປະດາຄ້າຍຄູຕ້ອນຮັບກອງປະຊຸມໃຫຍ່ ລວມເປັນມູນຄາທັງໝົດ 325.830.000 ກີບ. ທົ່ວທະຫານແຂວງມີເນື້ອທີ່ທໍາການຜະລິດ 9.085 ເຮັກຕາ ມີເນື້ອທີ່ປູກພືດຜັກເປັນສິນຄ້າ 17,88 ເຮັກຕາ, ມີປະເພດຕົ້ນໄມ້ໃຫ້ໝາກ 4.031 ຕົ້ນ, ຕົ້ນໄມ້ອຸດສາຫະກໍາ 32.246 ຕົ້ນ, ມີສັດລ້ຽງປະເພດງົວ – ຄວາຍ 1.332 ໂຕ, ໝູ – ແບ້ 504 ໂຕ, ສັດປີກ 6.089 ໂຕ ແລະ ສັດນໍ້າ 158.650 ກວ່າໂຕ. ປີຜ່ານມາສາມາດເກັບລາຍຮັບຈາກການຂາຍເຄື່ອງປູກຂອງຝັງ, ສັດລ້ຽງ ແລະ ການບໍລິການຕ່າງໆ ລວມທັງໝົດ 7.235.858.000 ກີບ ສະເລ່ຍໃສ່ຫົວຄົນບັນລຸໄດ້ 1.671.871 ກີບຕໍ່ຄົນຕໍ່ປີ ທຽບໃສ່ແຜນການໄດ້ລື່ນຄາດໝາຍ 11% ບົດສະຫຼຸບຍັງຍົກໃຫ້ເຫັນດ້ານດີ, ບັນຫາທີ່ຍັງຄົງຄ້າງທີ່ຈະຕ້ອງໄດ້ປັບປຸງແກ້ໄຂ ແລະ ບົດຮຽນຖອດຖອນໄດ້ ໂອກາດນີ້ຜູ້ເຂົ້າຮ່ວມກອງປະຊຸມຍັງໄດ້ພັດປ່ຽນກັນຂື້ນປະກອບຄໍາຄິດຄໍາເຫັນ ເຮັດໃຫ້ບົດສະຫຼຸບມີເນື້ອໃນຄົບຖ້ວນສົມບູນເປັນບ່ອນອີງ ແລະ ເອກະພາບນໍາໄປຈັດຕັ້ງປະຕິບັດໃນຕໍ່ໜ້າໃຫ້ໄດ້ຮັບໝາກຜົນສູງຂື້ນກວ່າເກົ່າ.


ໃນຕອນທ້າຍກອງປະຊຸມ ສະຫາຍ ພັນເອກ ວິລ່ຽມ ວົງທິສານ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງຫຼວງພະບາງ ໄດ້ມີຄໍາເຫັນຊີ້ນໍາໃຫ້ອົງການກ່ຽວຂ້ອງ ແລະ ຄະນະພັກ – ຄະນະບັນຊາແຕ່ລະກົມກອງ ຕ້ອງເອົາໃຈໃສ່ຄຸ້ມຄອງດ້ານບັນຊີລາຍຮັບ-ລາຍຈ່າຍງົບປະມານໃຫ້ເຂັ້ມງວດ, ຄຸ້ມຄອງຄຸນນະພາບ ແລະ ບົວລະບັດພັດເຊັດ ບໍາລຸງຮັກສາພາຫະນະເຕັກນິກ, ອາວຸດກະສູນໃຫ້ສາມາດນໍາໃຊ້ໄດ້ຍາວນານ ແລະ ໄດ້ຮັບຜົນດີ ມີຄວາມປອດໄພ 100%, ພ້ອມກັນນີ້ກໍ່ຕ້ອງປັບປຸງແບບແຜນວິທີເຮັດວຽກຂອງເຫຼົ່າຮົບວິຊາສະເພາະພະລາທິການ, ເພີ່ມທະວີນໍ້າໃຈປະຢັດສັດທ່ຽງຕໍ່ການຄຸ້ມຄອງນໍາໃຊ້ຊັບສິນ, ເງິນຄໍາ, ພາຫະນະ ແລະ ເຄື່ອງປະກອບຕ່າງໆ ຢ່າງສົມເຫດຜົນ, ປັບປຸງກໍ່ສ້າງພະນັກງານໃຫ້ຖືກຕ້ອງຕາມໜ້າທີ່ວຽກງານວິຊາສະເພາະທີ່ໄດ້ຮຽນມາ ແລະ ມີຄວາມເປັນເອກະພາບກັບຄະນະພັກ – ຄະນະບັນຊາ ເພື່ອແນໃສ່ເຮັດໃຫ້ການຈັດຕັ້ງປະຕິບັດວຽກງານພະລາທິການທົ່ວກອງບັນຊາການທະຫານແຂວງໄດ້ຮັບຜົນດີ.
ຂ່າວ: ສົມພອນ ສຸວັນທອນ; ພາບ: ໄຊຍະສອນ ລັດຕະນະວົງ.