ມີເດຍລາວແຂວງສາລະວັນ ຂ່າວພາບ: ວິໄລວອນ ສິດທິໄຊ ແພດໝໍ, ພະຍາບານ ໂຮງໝໍແຂວງສາລະວັນ ໄດ້ຂຸ້ນຂ້ຽວ, ເອົາໃຈໃສ່ປີ່ນປົວຜູ້ທີ່ຕິດເຊື້ອພະຍາດໂຄວິດ-19 ແລະ ໄດ້ປະສົບຜົນສຳເລັດໃນການປິ່ນປົວ ຫາຍດີເພີ່ມອີກ 2 ຄົນ ຄື: ນາງ ດາວ ອາຍຸ 22 ປີ ຢູ່ບ້ານກ່ອງເຂົ້າ ເມືອງຄົງເຊໂດນ ເປັນກໍລະນີ 7 ຂອງແຂວງ ເຂົ້າຮັບການປີ່ນປົວແຕ່ວັນທີ 28 ເມສາ-13 ພຶດສະພາ 2021 ເປັນເວລາ 16 ວັນ ແລະ ນາງ ແຕ໋ນ ອາຍຸ 37 ປີ ບ້ານໂພນສູງ ເມືອງລະຄອນເພັງ ກໍລະນີ 8 ເຂົ້າຮັບການປີ່ນປົວ ວັນທີ 1-13 ພຶດສະພາ 2021. ໂດຍໄດ້ຮັບການເອົາໃຈໃສ່ປິ່ນປົວຈາກທີມງານແພດໝໍຢ່າງຕໍ່ເນື່ອງ, ຊື່ງຜ່ານການກວດຫາເຊື້ອຂອງຜູ້ກ່ຽວທັງສອງ ຈຳນວນ 4 ຄັ້ງ, ຄັ້ງທຳອິດ ແມ່ນພົບເຊື້ອ ແລະ ກວດອີກ 3 ຄັ້ງ ບໍ່ພົບເຊື້ອ ໂດຍໄດ້ປະຕິບັດຕາມຂັ້ນຕອນ, ວິທີການຂອງແພດໝໍ ເປັນຢ່າງດີ.

ພາຍຫຼັງປີ່ນປົວຜູ້ກ່ຽວທັງສອງຫາຍດີແລ້ວ ແມ່ນຕ້ອງໄດ້ກັບເມືອສືບຕໍ່ກັກໂຕຢູ່ບ້ານຂອງຕົນເອງຕາມລະບຽບ ຕື່ມອີກ. ກ່ອນອື່ນ, ກໍ່ໄດ້ຊົມເຊີຍຕໍ່ຜົນສຳເລັດຂອງບັນດາແພດໝໍ ທີ່ໄດ້ເອົາໃຈໃສ່, ຮັກສາ ແລະ ປີ່ນປົວຜູ້ທີ່ຕິດເຊື້ອພະຍາດ ຈົນຫາຍດີ. #ສຳລັບທິມແພດໝໍ ກໍ່ຕ້ອງໄດ້ສືບຕໍ່ກັກບໍລິເວນຕົນເອງ ເປັນເວລາ 14 ວັນ ເພື່ອຕິດຕາມອາການຕົນເອງຕື່ມ.

ພິທີສົ່ງຜູ້ປີ່ນປົວຫາຍດີ ຈັດຂຶ້ນໃນວັນທີ 13 ພຶດສະພາ 2021, ຢູ່ທີ່ໂຮງໝໍແຂວງ, ໂດຍການເຂົ້າຮ່ວມຂອງ ທ່ານ ດຣ ຄຳຄ້າຍ ຄຳສິງສະຫວັດ ຮອງຫົວໜ້າພະແນກສາທາລະນະສຸກແຂວງ, ຜູ້ອຳນວຍການໂຮງໝໍ ພ້ອມດ້ວຍແພດ, ໝໍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.