ທູດອາເມລິກາ ເຂົ້າຢ້ຽມຂໍ່ານັບ ທ່ານ ທັນສະໄໝ ກົມມະສິດ

0
394

ໃນວັນທີ 19 ມັງກອນ 2020 ຜ່ານມາ ທີ່ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ທ່ານ ປອ. ທັນສະໄໝ ກົມມະສິດ ລັດຖະມົນຕີກະຊວງ ໄປສະນີ, ໂທລະຄົມ ມະນາຄົມ ແລະ ການສື່ສານ (ປທສ) ໄດ້ໃຫ້ກຽດຕ້ອນຮັບ ທ່ານ ປີເຕີ ເຣມ໋ອນ (Dr. Peter M. Haymond) ເອກອັກຄະລັດຖະທູດ ແຫ່ງສະຫະລັດອາເມລິກາ ຜູ້ມີອໍານາດເຕັມ ປະຈໍາ ສປປ ລາວ​ເຂົ້າຢ້ຽມຂໍ່ານັບ ເພື່ອປຶກສາຫາລືກ່ຽວກັບການເສີມຂະຫຍາຍການຮ່ວມມື ໂດຍສະເພາະດ້ານການພັດທະນາລະບົບຄວາມປອດໄພດ້ານດິຈິຕອນ ແລະ ການລິເລີ່ມໂຄງການ Clean Network ໃນໂອກາດນີ້ ທ່ານ ທັນສະໄໝ ກົມມະສິດ ໄດ້ສະແດງຄວາມຕ້ອນຮັບ, ຊົມເຊີຍຕໍ່ການເຂົ້າຢ້ຽມຂໍ່ານັບຂອງ ທ່ານ ປີເຕີ ເຮມ໋ອນ ທັງສອງຝ່າຍໄດ້ປຶກສາຫາລືແລກປ່ຽນຄໍາຄິດເຫັນ ກ່ຽວກັບການພັດທະນາລະບົບຄວາມປອດໄພ ແລະ ການແກ້ໄຂເຫດສຸກເສີນທາງຄອມພິວເຕີໂດຍສັງເຂບ ໂດຍສະເພາະການລິເລີ່ມໂຄງການ Clean Network ຊຶ່ງເປັນໂຄງການປ້ອງກັນຄວາມປອດໄພຂອງຂໍ້ມູນເພື່ອໃຫ້ Network ໄດ້ຮັບຄວາມປອດໄພ ແລະ ໄດ້ມາດຕະຖານສູງສຸດ.

ໃນຕອນທ້າຍ ທ່ານ ປີເຕີ ເຮມ໋ອນ ກໍ່ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີກະຊວງ ປທສ ໄດ້ສະຫຼະເວລາ ອັນມີຄ່າຕ້ອນຮັບການເຂົ້າຢ້ຽມຢາມໃນຄັ້ງນີ້ຢ່າງອົບອຸ່ນ ເປັນກັນເອງ ແລະ ໄດ້ມີການແລກປ່ຽນຄຳຄິດຄຳເຫັນຢ່າງກົງໄປກົງມາ.

ພາບ-ຂ່າວ: ພະແນກເລຂານຸການ-ພິທີການ, ກະຊວງ ປທສ.