ມີເດຍລາວແຂວງຄຳມ່ວນ ໃນວັນທີ 16 ມີນາ 2021 ຢູ່ທີ່ເຮືອນຮັບແຂກເລກ 01 ຂອງແຂວງຄຳມ່ວນ ໄດ້ຈັດກອງປະຊຸມຊຸກຍູ້ ແລະ ຮັບຟັງລາຍງານການເຄື່ອນໄຫວຈັດຕັ້ງປະຕິບັດໜ້າທີ່ວຽກງານຂອງບັນດາຂະແໜງການອ້ອມຂ້າງແຂວງ ໂດຍການເປັນປະທານຂອງ ທ່ານ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ, ມີບັນດາໃນຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ, ອົງການຈັດຕັ້ງມະຫາຊົນ ຕະຫລອດຮອດພະນັກງານວິຊາການທີ່ກ່ຽວຂ້ອເຂົ້າຮ່ວມ.

ໂອກາດດັ່ງກ່າວບັນດາຂະແໜງການທີ່ເຂົ້າຮ່ວມຄື : ຄະນະຈັດຕັ້ງແຂວງ, ກວດກາພັກ – ລັດ ແຂວງ, ພະແນກພາຍໃນແຂວງ, ພະແນກການຕ່າງປະເທດແຂວງ, ຄະນະບໍລິຫານງານຊາວໜຸ່ມແຂວງ, ສະຫະພັນແມ່ຍິງແຂວງ, ສະຫະພັນກຳມະບານແຂວງ, ໂຮງຮຽນທິດສະດີການເມືອງ ແລະ ການປົກຄອງແຂວງ ແລະ ຫ້ອງການອານຸສາວະລີ-ອະນຸສອນແຂວງ ໄດ້ຜັດປ່ຽນກັນຂຶ້ນລາຍງານຫຍໍ້ ໃນການນຳພາ – ຊີ້ນຳ ບັນດາວຽກງານຂອງຕົນຮັບຜິດຊອບການຕາມພາລະບົດບາດ, ຂອບເຂດ, ສິດໜ້າທີ່ຂອງໃນແຕ່ລະພາກສ່ວນ ເປັນຕົ້ນແມ່ນຂໍ້ສະດວກ, ຂໍ້ຫຍຸ້ງຍາກ, ຈຸດດີ-ຈຸດອ່ອນ, ຂໍ້ຄົງຄ້າງ ແລະ ທິດທາງແຜນການເຄື່ອນໄຫວໃນຕໍ່ໜ້າ ເວົ້າສະເພາະແມ່ນປີ 2021-2025 ( ແຜນ 05 ປີຂອງແຕ່ລະຂະແໜງການ ). ໂອກາດນີ້ທ່ານຮອງເລຂາພັກແຂວງກໍ່ໄດ້ຕີລາຄາສູງ ແລະ ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ແຕ່ລະພາກສ່ວນຍາດມາໄດ້ ແລະ ມີຜົນສໍາເລັດຫລາຍດ້ານ ຄຽງຄູ່ກັນນັ້ນທ່ານກໍ່ໄດ້ເນັ້ນໜັກໃຫ້ແຕ່ລະພາກສ່ວນເອົາໃຈໃສ່ຕໍ່ວຽກງານສຶກສາອົບຮົມທາງດ້ານການເມືອງ-ແນວຄິດ ໃຫ້ສະມາຊິກພັກ-ພະນັກງານໃຫ້ຫຼາຍ ດ້ວຍວິທີການຕ່າງໆ, ສືບຕໍ່ຮັກສາໄດ້ຄວາມສາມັກຄີເປັນເອກະພາບໃນໝູ່ຄະນະ, ມີການແບ່ງງານ, ແບ່ງຄວາມຮັບຜິດຊອບຢ່າງຈະແຈ້ງ ຂັ້ນລຸ່ມຂຶ້ນກັບຂັ້ນເທິງ, ບຸກຄົນຂຶ້ນກັບການຈັດຕັ້ງ, ບັນຫາສໍາຄັນແມ່ນເຮັດວຽກຕາມຫຼັກການລວມສູນປະຊາທິປະໄຕ, ດ້ານຄວາມຮັບຜິດຊອບການເມືອງຕໍ່ວິຊາສະເພາະໃຫ້ສົມທົບກວດກາຄືນກ່ຽວກັບແຜນການເຄື່ອນໄຫວນຳພາ – ຊີ້ນໍາ ຂອງຄະນະພັກຮາກຖານໃນ 5 ປີແຕ່ລະດ້ານວາງໄວ້ແນວໃດ ແລະ ຈັດຕັ້ງປະຕິບັດແນວໃດ. ທັງນີ້ກໍ່ເພື່ອເປັນການພົບປະ ແລະ ແຈ້ງກ່ຽວກັບການຊີ້ນຳໃຫ້ບັນດາຂະແໜງການຮັບຊາບ ແລະ ທັງເປັນການນຳເອົາແນວຄວາມຄິດຂອງແຕ່ຂະແໜງການ ສັງລວມນຳສະເໜີລາຍງານຕໍ່ຂັ້ນເທິງກໍ່ຄືທ່ານເລຂາພັກແຂວງ ເພື່ອເປັນທິດໃນການປັບປຸງວຽກງານໃນຕໍ່ໜ້າບັນຫາໃດທີ່ດີແລ້ວແມ່ນຈະໄດ້ສືບຕໍ່ ສ່ວນຈຸດອ່ອນຂໍ້ຄົງຄ້າງແມ່ນຈະໄດ້ພ້ອມກັນປັບປຸງແກ້ໄຂໃຫ້ດີຂຶ້ນກວ່າເກົ່າ.