ມິເດຍລາວແຂວງຄຳມ່ວນ ຂ່າວ: ກອງຄຳວັນ ທີ 27 ກຸມພາ 2021 ຜ່ານມາ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ພ້ອມດ້ວຍບັນດາຄະນະ ພະແນກການ, ຂະແໜງການກ່ຽວຂ້ອງ ໄດ້ລົງເຄື່ອນໄຫວ ຕິດຕາມ, ກວດກາ ສະພາບການບໍລິການ, ການຄຸ້ມຄອງ ຈັດສັນຕະຫຼາດຢູ່ພາຍໃນເທສະບານແຂວງຄຳມ່ວນ ເປັນຕົ້ນແມ່ນຕະຫຼາດສຸກສົມບູນ ຫຼັກ 3 ແລະ ຕະຫຼາດຫຼັກ 2 ເຊິ່ງໄດ້ຕິດຕາມກວດກາບັນຍາກາດການຊື້-ຂາຍ ຂອງບັນດາຫົວໜ່ວຍທຸລະກິດ, ຫ້າງຮ້ານສິນຄ້າເຄື່ອງອຸປະໂພກ-ບໍລິໂພກຕ່າງໆ ແລະ ສະຖານທີ່ບໍລິການຫ້ອງນໍ້າ, ບ່ອນຈອດລົດ, ສະຖານທີ່ເກັບມ້ຽນ ຂີ້ເຫຍື້ອຂອງຕະຫຼາດ ລວມເຖິງ ບັນຫາອື່ນໆ ທີ່ກ່ຽວຂ້ອງກັບການບໍລິການ, ຄຸ້ມຄອງພາຍໃນຕະຫຼາດ ທີ່ສຳຄັນໃນການລົງຕິດຕາມ, ກວດກາຕະຫຼາດ ໃນຄັ້ງນີ້ທ່ານເຈົ້າແຂວງຄຳມ່ວນ ຍັງໄດ້ຮຽກຮ້ອງມາຍັງຜູ້ຈັດການຕະຫຼາດ ໃຫ້ເພີ່ມທະວີເອົາໃຈໃສ່ໃນການຮັກສາ ຄວາມສະຫງົບ, ຄວາມປອດໄພ, ການຈັດສັນພາຫະນະເຂົ້າອອກ ໃຫ້ມີຄວາມເປັນລະບຽບຮຽບຮ້ອຍ ໄປຄຽງຄູ່ກັບ ການປົກປັກຮັກສາສິ່ງແວດລ້ອມໃຫ້ມີຄວາມສະອາດ ຈົບງາມ ໂດຍມີການປະສານສົມທົບກັບຂະແໜງການລັດ ທີ່ກ່ຽວຂ້ອງ ຕິດພັນກັບການເຮັດໜ້າທີ່ການບໍລິການ ທີ່ດີຕໍ່ລູກຄ້າເພື່ອດຶງດູດລູກຄ້າ ແລະ ສ້າງຄວາມປະທັບໃຈ ຕໍ່ຜູ້ມາໃຊ້ບໍລິການ.