ມີເດຍລາວແຂວງຈຳປາສັກ ຂ່າວ-ພາບ: ນາງ ເພັດສະຫວັນ ນັກຂ່າວເມືອງ ວັນທີ 4ພຶດສະພາ2021ນີ້ທ່ານ ປອ ວິໄລວົງ ບຸດດາຄຳ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກ ພ້ອມທ່ານ ດຣ. ບຸນກອງ ສີຫາວົງ ອະດີດລັດຖະມົນຕີ ກະຊວງສາທາລະນະສຸກແລະຄະນະສະເພາະກິດຂັ້ນສູນກາງ-ແຂວງໄດ້ເຄື່ອນໄຫວຊຸກຍູ້ມາດຕະການສະກັດກັ້ນ,ກັນການລະບາດ,ຄວບຄຸມແລະຕ້ານພະຍາດໂຄວິດ-19ຢູ່ທີ່ສະໂມສອນຂອງເມືອງບາຈຽງຈະເລີນສຸກ

ໂດຍໃຫ້ກຽດຕ້ອນຮັບແລະລາຍງານສະພາບການຈັດຕັ້ງປະຕິບັດມາດຕະການປ້ອງກັນຄວບຄຸມ,ຕ້ານພະຍາດໂຄວິດ-19ພາຍໃນເມືອງໃນໄລຍະຜ່ານມາຂອງທ່ານ ສົມລິດ ປັນທະບົວສີ ກຳມະການພັກແຂວງ ເລຂາຄະນະບໍລິຫານງານພັກເມືອງເຈົ້າເມືອງບາຈຽງຈະເລີນສຸກ ພ້ອມນັ້ນຄະນະສະເພາະກິດຂັ້ນສູນກາງ,ແຂວງແລະຂັ້ນເມືອງຍັງໄດ້ມີການແລກປ່ຽນປະກອບຄຳຄິດເຫັນເພື່ອເຮັດໃຫ້ການສະກັດກັ້ນ,ກັນການລະບາດ,ຄວບຄຸມແລະຕ້ານພະຍາດໂຄວິດ-19ທັນກັບສະພາບການ ຈາກນັ້ນທ່ານທ່ານ ດຣ. ບຸນກອງ ສີຫາວົງ ອະດີດລັດຖະມົນຕີ ກະຊວງສາທາລະນະສຸກຍັງໄດ້ຮຽກຮ້ອງໃຫ້ຄະນະພັກ-ອຳນາດການປົກຄອງເມືອງກໍ່ຄືສາທາລະນະສຸກເມືອງຂື້ນແຜນກຳນົດເປົ້າໝາຍກຸ່ມສ່ຽງທີ່ຕ້ອງໄດ້ຮັບການສັກວັກຊິນໂດຍສະເພາະແມ່ນ: ແພດໝໍທີ່ປິ່ນປົວໄກ້ສິດກັບຄົນເຈັບ,ຜູ້ອາວຸໂສທີ່ມີອາຍຸ60ປີຂຶ້ນໄປແລະຜູ້ທີ່ມີພະຍາດຕິດໂຕ,ເອົາໃຈໃສ່ໃນການປະສາສະພັນໃຫ້ຄວາມຮູ້ເຂົ້າໃຈແກ່ປະຊາຊົນມາດຕະການສະກັດກັ້ນ,ກັນການລະບາດ,ຄວບຄຸມແລະຕ້ານພະຍາດໂຄວິດ-19ຕິດພັນກັບການປະຕິບັດທຳລາຍແຫຼ່ງເພາະພັນໜອນນ້ຳໄຂ້ຍຸງລາຍຕິດພັນກັບການປະຕິບັດ11ຕົວຊີວັດຂອງກະຊວງສາທາລະນະສຸກວາງອອກ

ຕອນທ້າຍ ທ່ານ ປອ ວິໄລວົງ ບຸດດາຄຳ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກ ໄດ້ເນັ້ນໃຫ້ຄະນະພັກ-ອຳນາດການປົກຄອງເມືອງສືບຕໍ່ເພີ້ມທະວີບັນດາມາດຕະການສະກັດກັ້ນ,ກັນການລະບາດ,ຄວບຄຸມແລະຕ້ານພະຍາດໂຄວິດ-19,ສືບຕໍ່ເພີ້ມທະວີວຽກງານປ້ອງກັນຊາດ-ປ້ອງກັນຄວາມສະຫງົບໂດຍສະເພາະແມ່ນ: ຕັ້ງຈຸດກວດກາລະຫວ່າງຊາຍແດນຕໍ່ກັບເມືອງອ້ອມຂ້າງແລະກວດກາການເຂົ້າ-ອອກເມືອງຂອງປະຊາຊົນ,ຊີ້ນຳໆພາປະເມີນຜົນການຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີສະບັບເລກທີ15/ນຍ,ຄຳສັ່ງ04ຂອງແຂວງຕິດພັນກັບການປະເມີນສັງລວມໃນການກະຕຸ້ນເສດຖະກິດ-ສັງຄົມໄປພ້ອມໆກັນແລະຕິດພັນກັບການປຸກລະດົມໃນທົ່ວສັງຄົມປະກອບສ່ວນເຂົ້າໃນວຽກງານສະກັດກັ້ນ,ຄວບຄຸມແລະຕ້ານພະຍາດໂຄວິດ-19 ໃນກອງປະຊຸມຄັ້ງນີ້ມີບັນດາທ່ານຮອງເລຂາພັກເມືອງ,ຄະນະປະຈຳພັກເມືອງ,ກຳມະການພັກເມືອງ,ຫົວໜ້າຫ້ອງການພ້ອມຄະນະສະເພາະກິດຂັ້ນເມືອງເຂົ້າຮ່ວມໂດຍປະຕິບັດຮັກສາໄລຍະຫ່າງ,ໃຊ້ເຈວລ້າງມື,ວັດແທກອຸ່ນນະພູມແລະໃຊ້ຜ້າອັດປາກ-ດັງ ຈາກນັ້ນທ່ານເຈົ້າແຂວງຈຳປາສັກພ້ອມຄະນະສະເພາະກິດຍັງໄດ້ຢ້ຽມຢາມຈຸດຄັດກ່ອງເກັບຕົວຢ່າງໂຮງໝໍເມືອງຕື່ມອິກ.