ມີເດຍລາວແຂວງສາລະວັນ ໂດຍ: ວິໄລວອນ ສິດທິໄຊ ວັນທີ 28 ເມສາ 2021, ທ່ານ ແຫວນເພັດ ລັດດາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງສາລະວັນ ໄດ້ເນັ້ນໃຫ້ເມືອງຄົງເຊໂດນ ເຂັ້ມງວດ, ກວດກາຄືນການປິດການເຂົ້າ-ອອກ ເມືອງ, ບ້ານ ທີ່ໄດ້ກຳນົດໄວ້ແລ້ວ ແລະເນັ້ນໃຫ້ເອົາໃຈໃສ່ ບັນຫາທີ່ສຳຄັນເຊັ່ນ: ສືບຕໍ່ໂຄສະນາເຜີຍແຜ່ບັນດາຄຳສັ່ງຕ່າງໆ ໃຫ້ເລີກເຊີ່ງ, ທົ່ວເຖີງ ພໍ່ແມ່ປະຊາຊົນ ຮັບຮູ້ເຂົ້າໃຈ ຕໍ່ກັບການປະຕິບັດມາດຕະການຕ່າງໆ ແລະຜົນຮ້າຍຂອງພະຍາດດັ່ງກ່າວ ເຮັດໃຫ້ສັງຄົມ ມີສ່ວນຮ່ວມ ພ້ອມກັນປະຕິບັດຢ່າງເຂັ້ມງວດ, ເຂັ້ມງວດໃນຈຸດກວດກາ ຄົນເຂົ້າ-ອອກ ລະຫວ່າງແຂວງ ຫາ ແຂວງ, ເມືອງຫາ ເມືອງ ແລະ ບ້ານຫາບ້ານ ເພື່ອຕິດຕາມການປະຕິບັດມາດຕະການປ້ອງກັນພະຍາດໂຄວິດ-19 ເຊັ່ນ: ແນະນຳໃຫ້ໃສ່ຜ້າອັດປາກ-ດັງ, ກວດເຊັກອຸນຫະພູມ ແລະອື່ນໆ. ຈຸດກັກບໍລິເວນ ກໍ່ຕ້ອງມີເຈົ້າໜ້າຕິດຕາມ, ກວດກາ, ເອົາໃຈໃສ່ດູແລເບີ່ງແຍງ ແລະ ໃຫ້ກຳລັງໃຈເຊີ່ງກັນ. ກຳລັງ ປກຊ-ປກສ ຕ້ອງເຂັ້ມງວດ ລາດຕະເວນ, ປ້ອງກັນເວນຍາມ ແລະ ສ່ອງແສງລາຍງານເປັນປະຈຳ ເປັນຕົ້ນ: ຂອບເຂດຕາມຊາຍແດນ ລະຫວ່າງປະເທດ. ນອກນັ້ນ ເອົາໃຈໃສ່ໃນການປະສານງານ ລະຫວ່າງແຂວງ ກັບ ເມືອງ ແລະ ບັນດາຄະນະສະເພາະກິດຂັ້ນຕ່າງໆ ໃຫ້ວ່ອງໄວ, ຖືກຕ້ອງ ແລະ ທ່ວງທັນກັບສະພາບການ.

ການກວດກາ ແລະຕິດຕາມການສວຍໂອກາດຂຶ້ນລາຄາສິນຄ້າ, ກັນຕູນສິນຄ້າ ແລະ ສຳລັບຮ້ານຄ້າຕ່າງໆທີ່ບໍ່ມີຄວາມຈຳເປັນ ແມ່ນໃຫ້ປິດບໍລິການ, ສຳລັບການເຄື່ອນຍ້າຍສິນຄ້າແຂວງຕໍ່ແຂວງ ຕ້ອງເຂັ້ມງວດ, ເດັດຂາດ ແລະ ກັກ ຖ້າບໍ່ມີໃບຮັບຮອງຈາກຄະນະສະເພາະກິດ ຂອງແຂວງ ຕົ້ນທາງ.ການລົງເຄື່ອນໄຫວຄັ້ງນີ້ ມີບັນດາທ່ານຄະນະສະເພາະກິດຕ້ານພະຍາດໂຄວິດ-19 ແຂວງສາລະວັນ ແລະ ມີບັນດາການນຳເມືອງຄົງເຊໂດນ ພ້ອມດ້ວຍພາກສ່ວນທີ່ກ່ຽວຂ້ອງ.