ມິເດຍລາວແຂວງເຊກອງ
ເພື່ອເຮັດໃຫ້ແມ່ຍິງ ແລະແມ່ຍິງບັນດາເຜົ່າ ໄດ້ມີຄວາມເຂັ້ມແຂງ ແລະປະກອບສ່ວນຢ່າງຕັ້ງໜ້າເຂົ້າໃນທຸກຂົງເຂດວຽກງານ ເພື່ອເຮັດໃຫ້ປະເທດຊາດຫຼຸດພົ້ນອອກຈາກຄວາມດ້ອຍພັດທະນາ ແລະບັນລຸເປົ້າໝາຍດ້ານການພັດທະນາ ເທື່ອລະກ້າວ. ໃນໂອກາດທີ່ ທ່ານ ນາງ ຈັນຫອມ ມະຫາໄຊ ຮອງເລຂາພັກແຂວງ ໄດ້ເຂົ້າຮ່ວມພິທີສະເຫຼີມສະຫຼອງວັນແມ່ຍິງສາກົນ ໃນວັນທີ 4 ມີນາ ນີ້ ທ່ານໄດ້ເນັ້ນໜັກໃຫ້ແມ່ຍິງບັນດາເຜົ່າເອົາໃຈໃສ່ 8 ບັນຫາ ໂດຍສະເພາະ ແມ່ນຄະນະພັກ-ອົງການປົກຄອງແຕ່ລະຂັ້ນ, ການຈັດຕັ້ງສັງຄົມ ຈະຕ້ອງໄດ້ເອົາໃຈໃສ່ໃນການສ້າງ ແລະເອື້ອອໍານວຍຄວາມສະດວກໃຫ້ແກ່ແມ່ຍິງ, ກ້າມອບວຽກໃຫ້ແມ່ຍິງ, ສະໜັບສະໜູນໃຫ້ແມ່ຍິງໄດ້ຮັບການພັດທະນາໃນທຸກດ້ານ.
ພ້ອມນີ້ ສະມາຊິກສະຫະພັນແມ່ຍິງ ແລະແມ່ຍິງລາວບັນດາເຜົ່າ ຈະຕ້ອງໄດ້ບຸກບືນພັດທະນາຕົນເອງໃນທຸກດ້ານໃຫ້ເຂັ້ມແຂງກວ່າເກົ່າ ເຊິ່ງກ່ອນອື່ນໝົດຕ້ອງພັດທະນາດ້ານແນວຄິດໃຫ້ເອື້ອຍນ້ອງແມ່ຍິງຮັບຮູ້ເຊື່ອມຊຶມຢ່າງຖືກຕ້ອງຕໍ່ກັບແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເສີມຂະຫຍາຍມູນເຊື້ອວັດທະນະທໍາອັນດີງາມຂອງຊາດ ຂອງແມ່ຍິງລາວ; ສືບຕໍ່ເອົາໃຈໃສ່ປະຕິບັດພາລະບົດບາດໃນການເປັນເສນາທິການໃຫ້ແກ່ຄະນະພັກ ແລະເປັນຕົວແທນໃນການປົກປ້ອງສິດຜົນປະໂຫຍດຂອງແມ່ຍິງ, ສົມທົບກັບພະແນກການຕ່າງໆເອົາໃຈໃສ່ຂຶ້ນແຜນບໍາລຸງ-ກໍ່ສ້າງພະນັກງານເພດຍິງ ເພື່ອໃຫ້ເຂົ້າເຖິງຕໍາແໜ່ງງານທີ່ສໍາຄັນ ແລະຍົກສູງບົດບາດແມ່ຍິງໃນສັງຄົມໃຫ້ຫຼາຍຂຶ້ນ; ສ້າງ ແລະຄຸ້ມຄອງກອງທຶນໝູນວຽນ, ກຸ່ມທ້ອນເງິນ ເພື່ອໃຫ້ແມ່ຍິງຜູ້ທຸກຍາກ ໄດ້ເຂົ້າເຖິງ ແລະຊົມໃຊ້ກອງທຶນດັ່ງກ່າວ; ຊຸກຍູ້ຂະບວນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງ ໂດຍຕິດພັນກັບຂະບວນການຮັກຊາດ ແລະພັດທະນາ; ຄະນະນໍາສະຫະພັນແມ່ຍິງ ແລະເອື້ອຍນ້ອງປມ່ຍິງ ຕ້ອງເປັນເຈົ້າການຈັດຕັ້ງປະຕິບັດລະບຽບຂອງສະຫະພັນແມ່ຍິງວາງອອກ, ຮັກສາ ແລະເສີມຂະຫຍາຍຄຸນລັກສະນະທີ່ເປັນມູນເຊື້ອອັນດີງາມຂອງສະຫະພັນແມ່ຍິງລາວ.
ນອກນີ້ ຄະນະສະຫະພັນແມ່ຍິງແຕ່ລະຂັ້ນ ຕ້ອງເອົາໃຈໃສ່ປຸກລະດົມສະມາຊິກສະຫະພັນແມ່ຍິງ, ແມ່ຍິງບັນດາເຜົ່າ ເຂົ້າຮ່ວມຢ່າງຕັ້ງໜ້ານໍາຄະນະສະເພາະກິດຂອງຕົນ, ເພື່ອພ້ອມກັນເປັນເຈົ້າການປ້ອງກັນ, ຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19; ຄະນະນໍາສະຫະພັນແມ່ຍິງ ຕ້ອງສືບຕໍ່ປັບປຸງກົງຈັກການຈັດຕັ້ງ, ປັບປຸງແບບແຜນການເຄື່ອນໄຫວ, ວິທີນໍາພາ ວິທີເຮັດວຽກ ເພື່ອໃຫ້ສອດຄ່ອງກັບເນື້ອໃນຈິດໃຈຂອງມະຕິກອງປະຊຸມໃຫຍ່ຂອງຕົນວາງອອກ ເພື່ອເຮັດໃຫ້ການຈັດຕັ້ງ ແລະສະມາຊິກມີຄວາມເຂັ້ມແຂງ ເຮັດໃຫ້ຂະບວນການແມ່ຍິງເຕີບໃຫຍ່ຂະຫຍາຍຕົວ ຮັບປະກັນໄດ້ທາງດ້ານປະລິມານ ແລະຄຸນນະພາບສູງກວ່າເກົ່າ