ມີເດຍລາວແຂວງເຊກອງ ວັນທີ 28 ເມສາ ນີ້ ທ່ານ ບຸນຫຼາຍ ບຸດທິ ຫົວໜ້າຄະນະຈັດຕັ້ງແຂວງເຊກອງ ທັງເປັນຄະນະຊີ້ນໍາຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດພະຍາດໂວິດ-19 ພ້ອມດ້ວຍຄະນະສະເພາະກິດຂັ້ນແຂວງ ໄດ້ລົງເຄື່ອນໄຫວຕິດຕາມ, ຊຸກຍູ້ການເຝົ້າລະວັງ, ສະກັດກັ້ນ, ປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຢູ່ສະໂມສອນເມືອງລະມາມ ໂດຍເຂົ້າຮ່ວມມີທ່ານ ໂພທອງ ສີລັນດອນ ຮອງເຈົ້າເມືອງລະມາມ ພ້ອມດ້ວຍຄະນະສະເພາະກິດຂັ້ນເມືອງເຂົ້າຮ່ວມ.

ທ່ານ ດຣ ສີທົນ ສາຍວິໄລສັກ ຮອງຄະນະສະເພາະກິດ, ຫົວໜ້າຫ້ອງການສາທາລະນະສຸກເມືອງລະມາມ ໄດ້ລາຍງານການຈັດຕັ້ງປະຕິບັດການເຄື່ອນໄຫວວຽກງານປ້ອງກັນ, ຄວບຄຸມ, ສະກັດກັ້ນພະຍາດໂຄວິດ-19 ຊຶ່ງທ່ານໃຫ້ຮູ້ວ່າ: ໄດ້ນໍາເອົານິຕິກໍາ, ຄໍາສັ່ງຕ່າງໆ ຂັ້ນແຂວງ-ຂັ້ນເມືອງ ມາຜັນຂະຫຍາຍຢ່າງທົ່ວເຖິງ, ໄດ້ຈັດກອງປະຊຸມປຶກສາຫາລື ເພື່ອປ້ອງກັນພະຍາດໂຄວິດ-19 ຮ່ວມກັບຄະນະກໍາມະການຂັ້ນເມືອງ 4 ຄັ້ງ, ຮ່ວມກັບວິຊາການແພດໝໍ ແລະໂຮງໝໍນ້ອຍ 7 ແຫ່ງ 2 ຄັ້ງ, ແບ່ງງານແບ່ງຄວາມຮັບຜິດຊອບ ໃຫ້ພະນັກງານແພດໝໍເວນຍາມຢູ່ດ່ານ 4 ດ່ານຄື: ເຊນໍ້ານ້ອຍ, ບ້ານແບ່ງ, ບ້ານໂພນ, ບ້ານໂພນໃຜ່, ຕະຫຼາດ, ສູນຈໍາກັດບໍລິເວນຕ່າງໆທີ່ຄະນະສະເພາະກິດກໍານົດໄວ້, ລົງສືບສວນ-ສອບສວນ ຄົນເຂົ້າ-ອອກ ຈາກບ່ອນທີ່ສ່ຽງ ແລະລົງໂຄສະນາສຸຂະສຶກສາຕາມຈຸດຕ່າງໆໃນ 44 ບ້ານທົ່ວເມືອງ, ຊຶ່ງມີຜູ້ທີ່ຈໍກັດບໍລິເວນນອນສູນ ພ້ອມເກັບຕົວຢ່າງສົ່ງແຂວງຈໍາສັກ ທັງໝົດ 45 ກໍລະນີ, ຍິງ 27 ກໍລະນີ, ຕ່າງປະເທດ 4 ກໍລະນີ(ຄົນຈີນ), ບໍ່ມີກໍລະນີພົບເຊື້ອ, ອອກຈາກສູນ 7 ກໍລະນີ, ມີຄົນຜ່ານດ່ານເຂົ້າ-ອອກທັງໝົດ 1,347 ຄົນ, ຕ່າງປະເທດ 92 ຄົນ.

ທ່ານ ດຣ ນາງລໍາພັນ ໄຊຄໍາມີ ຮອງຫົວໜ້າພະແນກສາທາລະນະສຸກແຂວງ ໄດ້ຜ່ານຄໍາສັ່ງ ຂອງຄະນະປະຈໍາພັກແຂວງ ສະບັບເລກທີ 05/ຄປພຂ, ລົງວັນທີ 26 ເມສາ 2021 ວ່າດ້ວຍ ເພີ່ມທະວີສະກັດກັ້ນ, ປ້ອງກັນ, ຄວບຄຸມ ແລະແກ້ໄຂພະຍາດໂຄວິດ-19 ຕື່ມອີກ ທັງນີ້ ເພື່ອໃຫ້ຄະນະສະເພາະກິດຂັ້ນເມືອງ ໄປເຜີຍແຜ່ຢູ່ຂັ້ນເມືອງຢ່າງທົ່ວເຖິງ.
ໂອກາດນີ້ ທ່ານ ບຸນຫຼາຍ ບຸດທິ ຍັງໄດ້ຮຽກຮ້ອງ ໃຫ້ຄະນະສະເພາະກິດຂັ້ນເມືອງ ຕ້ອງເພີ່ມທະວີຕື່ມໃນການສະກັດກັ້ນ, ປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19ໃຫ້ເຂັ້ມງວດກວ່າເກົ່າ ໂດຍຖືເອົາວຽກງານການເຝົ້າລະວັງເຊື້ອພະຍາດໂຄວິດ-19 ເປັນວຽກງານປະຈໍາວັນ, ພ້ອມທັງນໍາເອົານິຕິກໍາ, ຄໍາສັ່ງແນະນໍາ ຕ່າງໆຂອງແຂວງ ໄປເຜີຍແຜ່ໂຄສະນາສຶກສາອົບຮົມໃຫ້ທຸກຄົນໃນທົ່ວເມືອງລະມາມ ຮັບຮູ້ເຊື່ອມຊຶມຢ່າງກວ້າງຂວາງ, ພ້ອມນີ້ ຕ້ອງແບ່ງງານ, ແບ່ງຄວາມຮັບຜິດຊອບຢ່າງລະອຽດຊັດເຈນ ເພື່ອສະດວກໃນການຈັດຕັ້ງປະຕິບັດວຽກງານ, ການປະສານງານໄດ້ຢ່າງຄ່ອງຕົວ, ພ້ອມທັງລາຍງານ ແລະສະໜອງຂໍ້ມູນທີ່ຖືກຕ້ອງຊັດເຈນ ໃຫ້ຄະນະຮັບຜິດຊອບທີ່ກ່ຽວຂ້ອງ ຮັບຊາບຢ່າງວ່ອງໄວທັນການ ໂດຍສະເພາະຂໍ້ມູນຂອງຜູ້ທີ່ມາຈາກກຸ່ມສ່ຽງຕິດເຊື້ອ ທັງພາຍໃນ ແລະຕ່າງປະເທດ, ກະກຽມງົບປະມານ, ອຸປະກອນການແພດທີ່ຈໍາເປັນ, ພະນັກງານແພດໝໍ ເພື່ອກຽມພ້ອມຮັບມືໃດ້ຫາກມີກໍລະນີຕິດເຊື້ອເພີ່ມ.


ນອກນີ້ ທ່ານ ບຸນຫຼາຍ ບຸດທິ ພ້ອມຄະນະ ຍັງໄດ້ລົງຕິດຕາມ, ຊຸກຍູ້ການເຝົ້າລະວັງ, ສະກັດກັ້ນພະຍາດໂຄວິດ-19 ຢູ່ສະຖານທີ່ຊຸມຊົນແອອັດເຊັ່ນ ຕະຫຼາດສົດ ຊຶ່ງໄດ້ກໍານົດເປັນ 4 ຈຸດເພື່ອກັ່ນກອງ, ຈຸດກັ່ນກອງຄົນເຂົ້າ-ອອກເມືອງ ເຊັ່ນ: ຈຸດກັ່ນກອງບ້ານແບ່ງ, ດ່ານເຊນ້ອຍ ແລະສູນຈໍາກັດບໍລິເວນໂຮງຮຽນ ມສ ບ້ານດອນຈັນ ຊຶ່ງມີນັກສຶກສາ ທີ່ເດີນທາງມາແຕ່ແຂວງທີ່ມີຄວາມສ່ຽງ ທັງໝົດ 13 ຄົນ.