ມີເດຍລາວແຂວງຄຳມ່ວນ ໃນທ່າມກາງບັນຍາກາດອັນເບີກບານມ່ວນຊື່ນທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ເວົ້າລວມ, ປະຊາຊົນລາວບັນດາເຜົ່າຊາວແຂວງຄໍາມ່ວນ ພວກເຮົາ ພວມພ້ອມກັນຈັດຕັ້ງພິທີສະເຫຼີມສະຫລອງສົ່ງທ້າຍປີເກົ່າປີຊວດ ພໍສໍ 2563 ແລະ ຕ້ອນຮັບປີໃໝ່ລາວປີສະລຸ ພໍສໍ 2564 ເຊິ່ງເປັນປາງບຸນໃຫຍ່ ຂອງປວງຊົນລາວທັງຊາດໄດ້ໜູນວຽນມາບັນຈົບຄົບຮອບອີກວາລະໜຶ່ງ ແຕ່ເນື່ອງຈາກບຸນປີໃໝ່ປະຈໍາຊາດເຮົາ 2021 ນີ້ ຍັງມີການສືບຕໍ່ແຜ່ລະບາດພະຍາດໂຄວິດ-19 ຢູ່ໃນປະເທດຕ່າງໆ ທົ່ວໂລກກໍ່ຄືບັນດາປະເທດໃກ້ຄຽງ ມີທ່າອ່ຽງເພີ່ມຂື້ນໃນລະດັບຕ່າງກັນ ສະນັ້ນໃນການສະເຫຼີມສະຫຼອງປີໃໝ່ລາວປີນີ້ທົ່ວປວງຊົນລາວກໍ່ຄືປະຊາຊົນທົ່ວແຂວງຄໍາມ່ວນພວກເຮົາ ຕ້ອງໄດ້ສືບຕໍ່ປະຕິບັດເຂັ້ມງວດຕໍ່ມາດຕະການຕ່າງໆ ໃນການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຕາມທີ່ລັດຖະບານໄດ້ວາງອອກໃນໄລຍະຜ່ານມາຢ່າງເປັນເຈົ້າການ.

ໃນໂອກາດປີໃໝ່ລາວ ພສ 2564 ທີ່ມາຮອດນີ້ ຂ້າພະເຈົ້າໃນນາມການນຳຂອງແຂວງຄຳມ່ວນ ຖືໂອກາດອັນເປັນສິລິມົງຄຸນນີ້ ຂໍສົ່ງຄຳອວຍພອນໄຊອັນປະເສີດໄປຍັງ ບັນດາທ່ານ ການນໍາພັກ – ລັດ, ພະນັກງານ – ລັດຖະກອນ, ທະຫານ, ຕໍາຫຼວດ ອົງການຈັດຕັ້ງຕ່າງໆ ນັກທຸລະກິດ ຕະຫຼອດຮອດພໍ່ແມ່ປະຊາຊົນ ຊາວແຂວງຄໍາມ່ວນ ທີ່ນັບຖືຮັກແພງທັງຫຼາຍ ພ້ອມທັງຊາວຕ່າງປະເທດທີ່ດຳລົງຊີວິດ, ປະຕິບັດໜ້າທີ່ ແລະ ທຳມາຫາກິນຢູ່ແຂວງຄໍາມ່ວນ ຂໍໃຫ້ທຸກໆ ທ່ານ ຈົ່ງມີສຸຂະພາບ, ພະລານາໄມສົມບູນ, ສຸກກາຍ, ສຸກໃຈ, ຮ່ວມສະຫຼອງວັນບຸນປີໃໝ່ລາວ ຢ່າງເບີກບານມ່ວນຊື່ນ ແລະ ມີຜົນສຳເລັດໃນການປະຕິບັດໜ້າທີ່ຂອງຕົນຕະຫຼອດປີໃໝ່ນີ້ດ້ວຍ.


ໃນປີເກົ່າ ພໍສໍ 2563 ທີ່ພວມຈະກ້າວລ່ວງໄປ ໃນທ່າມກາງບັນຍາກາດ ທີ່ທົ່ວພັກ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວບັນດາເຜົ່າ ໃນທົ່ວປະເທດ ພວມກະກຽມຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເວົ້າລວມ, ເວົ້າສະເພາະແຂວງຄໍາມ່ວນ ພວກເຮົາກໍາລັງສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ. ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ 5 ປີຂອງແຂວງ ທີ່ໄດ້ວາງຄາດໝາຍສູ້ຊົນໄວ້ຮອດປີ 2025. ໄປພ້ອມກັບການຈັດຕັ້ງປະຕິບັດ ບັນດາຄໍາສັ່ງ, ຄໍາແນະນໍາ, ນິຕິກໍາຕ່າງໆ ຂອງສູນກາງ, ລັດຖະບານ ແລະ ຂອງແຂວງວາງອອກ ໃຫ້ເຂົ້າສູ່ຊີວິດຕົວຈິງຢ່າງກວ້າງຂວາງ, ເລິກເຊິ່ງ ແລະ ເປັນເຈົ້າການເຊິ່ງສາມາດຍາດໄດ້. ຜົນງານຕ່າງໆ ສະແດງອອກຄືດັ່ງນີ້: ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ: ພວກເຮົາຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ມີຄວາມສະຫງົບປອດໄພໃນທົ່ວສັງຄົມໂດຍພື້ນຖານ, ບັນດາປະກົດການຫຍໍ້ທໍ້ໄດ້ຮັບການແກ້ໄຂ ແລະ ຕີຖອຍ. ໄດ້ຈັດຕັ້ງພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 72 ປີ ແລະ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ.


ດ້ານການພັດທະນາເສດຖະກິດ: ກໍ່ສືບຕໍ່ມີການຂະຫຍາຍຕົວ, ໃນ 01 ປີຜ່ານມາອັດຕາການຂະຫຍາຍຕົວຂອງເສດຖະກິດຢູ່ໃນລະດັບ 4,06%, ລວມຍອດຜະລິດພັນພາຍໃນ (GDP) ບັນລຸ 8.919 ຕື້ກີບ. ສະເລ່ຍລາຍຮັບຕໍ່ຫົວຄົນໄດ້ 2.343 ໂດລາສະຫະລັດ, ການຜະລິດເຂົ້າໄດ້ທັງໝົດ 300.847 ໂຕນ ເທົ່າກັບ 79,57% ຂອງແຜນ, ສະເລ່ຍຜົນຜະລິດເຂົ້າຕໍ່ຫົວຄົນໄດ້ 683 ກິໂລເຂົ້າເປຶອກ/ຄົນ/ປີ. ດ້ານພະລັງງານ ແລະ ບໍ່ແຮ່ ມາຮອດປະຈຸບັນເຫັນວ່າໃນທົ່ວແຂວງປະຊາຊົນໄດ້ຊົມໃຊ້ໄຟຟ້າກວມເອົາ 98,95% ຂອງຈໍານວນບ້ານໃນທົ່ວແຂວງ ແລະ ມີຄອບຄົວທີ່ຊົມໃຊ້ໄຟຟ້າແລ້ວ 74.606 ຄອບຄົວ ກວມ 92,64% ຂອງຈໍານວນຄອບຄົວໃນທົ່ວແຂວງ, ຖະໜົນຫົນທາງກໍ່ໄດ້ຮັບການກໍ່ສ້າງ ແລະ ສ້ອມແປງ, ປະຊາຊົນໄດ້ມີສ່ວນຮ່ວມໃນການກໍ່ສ້າງສ້ອມແປງເສັ້ນທາງຕາມບ້ານຊ່ອງ. ທາງດ້ານວຽກງານຂົນສົ່ງ ເນື່ອງຈາກຢູ່ໃນຊ່ວງການແຜ່ລະບາດຂອງພະຍາດໂຄວິດ 19 ຢູ່ສອງດ່ານສາກົນແຕ່ລະວັນມີລົດຂົນສົ່ງຜ່ານ ໂດຍສະເລ່ຍ 150 ຄັນ/ວັນ; ວຽກງານຊັບ ພະຍາກອນທຳມະຊາດ ແລະ ສິ່ງແວດລ້ອມ: ໄດ້ເອົາໃຈໃສ່ໃນການຄູ້ມຄອງປົກປັກຮັກສາ ເປັນຕົ້ນບັນດາໂຮງຈັກ-ໂຮງງານຕ່າງໆ ແລະ ໂຄງການກໍ່ສ້າງເຂື່ອນໄຟຟ້າ ກໍ່ໄດ້ມີຄະນະກຳມະການຕິດຕາມກວດກາຢ່າງເຂັ້ມງວດ ແລະ ແກ້ໄຂບັນຫາທັນທີ ເມື່ອພົບເຫັນໂຄງການໃດປະຕິບັດບໍ່ຖືກຕ້ອງ.


ຂົງເຂດການສຶກສາ, ວັດທະນະທຳ-ສັງຄົມ: ໃນປີຜ່ານມາ ໄດ້ສໍາເລັດການ ປະກາດຈົບຊັ້ນມັດທະຍົມສຶກສາບໍາລຸງຕອນຕົ້ນທົ່ວແຂວງແລ້ວ, ນອກນັ້ນກໍ່ໄດ້ສືບຕໍ່ຂະຫຍາຍຕາໜ່າງການສຶກສາກ່ອນໄວຮຽນເປັນບູລິມະສິດໃຫ້ແກ່ເດັກນ້ອຍໃນການເສີມສ້າງພັດທະນາການ ແລະ ກຽມຄວາມພ້ອມໃຫ້ເດັກກ່ອນເຂົ້າຮຽນຊັ້ນປະຖົມສຶກສາ ໂດຍມີການຂະຫຍາຍໂຮງຮຽນອານຸບານທັງພາກລັດ ແລະ ເອກະຊົນ; ດ້ານສາທາລະນະສຸກ: ພວກເຮົາໄດ້ສ້າງເງື່ອນໄຂໃຫ້ປະຊາຊົນໄດ້ຮັບການບໍລິການປິ່ນປົວທົ່ວເຖິງ, ສະດວກວ່ອງໄວ ແລະ ຍົກສູງຄຸນນະພາບດີຂຶ້ນກວ່າເກົ່າ, ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ SDGs ເຫັນວ່າຫຼາຍອັນໄດ້ບັນລຸຄາດໝາຍ ແລະ ລື່ນຄາດໝາຍ; ດ້ານວຽກງານຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແມ່ນໄດ້ເອົາໃຈໃສ່ໃນການສ້າງຄອບຄົວ ແລະ ບ້ານວັດທະນາທໍາ, ມາຮອດປະຈຸບັນມີຄອບຄົວວັດທະນະທໍາແລ້ວ ກວມ 92,96% ຂອງຈຳນວນຄອບຄົວທົ່ວແຂວງ, ປະກາດບ້ານວັດທະນາທຳ ກວມ 92,79% ຂອງຈຳນວນບ້ານໃນທົ່ວແຂວງ, ສ່ວນການທ່ອງທ່ຽວ ໃນປີ 2020 ເນື່ອງຈາກມີການລະ ບາດພະຍາດໂຄວິດ 19 ຈຶ່ງຫັນມາທ່ອງທ່ຽວພາຍໃນ ແລະ ປະຈຸບັນນີ້ແມ່ນສຸມໃສ່ຊຸກຍູ້ໃຫ້ນັກລົງທຶນ – ຜູ້ປະກອບການຫຼາຍບໍລິສັດ ດໍາເນີນການສຶກສາ, ສຳຫຼວດ ແລະ ວາງແຜນພັດທະນາແຫຼ່ງທ່ອງທ່ຽວໃນຫຼາຍແຫ່ງ. ພ້ອມນີ້ດ້ານວຽກງານການປົກຄອງ-ບໍລິຫານລັດ. ດ້ານການກໍ່ສ້າງພັກ-ພະນັກງານ ແລະ ອົງການຈັດຕັ້ງມະຫາຊົນ. ດ້ານການພົວພັນຮ່ວມມືກັບຕ່າງປະເທດ ກໍ່ມີທ່າຂະຫຍາຍຕົວ ແລະ ໄດ້ຮັບການພັດທະນາດີຂຶ້ນເປັນກ້າວໆ.

ພີ່ນ້ອງບັນດາເຜົ່າ ຊາວແຂວງຄຳມ່ວນ ທີ່ຮັກແພງທັງຫຼາຍ ! ປີໃໝ່ ພສ 2564 ນີ້, ພວກເຮົາຮູ້ນໍາກັນແລ້ວວ່າຍັງມີຂໍ້ຫຍຸ້ງຍາກ ແລະ ສິ່ງທ້າທາຍຫຼາຍດ້ານ ດັ່ງນັ້ນຮຽກຮ້ອງໃຫ້ພວກເຮົາຕ້ອງມີການເຄື່ອນໄຫວຢ່າງແຂງແຮງຮອບດ້ານ ເພື່ອພ້ອມກັນສຸມໃສ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມຂອງແຂວງ ພ້ອມທັງກຳນົດບັນດາມາດຕະການຕົວຈິງຫຼາຍຢ່າງ ເພື່ອສຸມໃສ່ແກ້ໄຂບັນຫາອັນຮີບດ່ວນໃຫ້ທັນການ ເພື່ອຮັບປະກັນສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ. ເຖິງວ່າເສດຖະກິດໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ກໍ່ຕາມ ພວກເຮົາກໍ່ຕ້ອງພ້ອມໃຈກັນຢັບຢັ້ງບໍ່ໃຫ້ເກີດເຫດການທີທົດຖອຍຕໍ່ເສດຖະກິດ-ສັງຄົມ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການແກ້ໄຂດີຂື້ນເປັນກ້າວໆ, ຄວາມທຸກຍາກຂອງປະຊາຊົນໄດ້ຮັບການສືບຕໍ່ແກ້ໄຂຕາມຄາດໝາຍທີ່ວາງໄວ້.


ຂ້າພະເຈົ້າ ຈຶ່ງຂໍຖືໂອກາດນີ້ຮຽກຮ້ອງມາຍັງ ສະມາຊິກພັກ, ພະນັກງານ, ທະຫານ ຕໍາຫຼວດ ຕະຫຼອດຮອດພີ່ນ້ອງປະຊາຊົນບັນດາເຜົ່າຊາວແຂວງຄຳມ່ວນ ຈົ່ງພ້ອມກັນເພີ່ມທະວີຮັກສາມູນເຊື້ອຄວາມສາມັກຄີ ອັນເປັນປຶກແຜ່ນແໜ້ນໜາ, ຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດສອບ, ສືບຕໍ່ເສີມຂະຫຍາຍຜົນສໍາເລັດອັນດີງາມ ແລະ ຕັ້ງໜ້າແກ້ໄຂຈຸດອ່ອນຂໍ້ຄົງຄ້າງ ໃນປີຜ່ານມາໃຫ້ຫຼຸດໜ້ອຍຖອຍລົງ ຮ່ວມກັນສ້າງສາພັດທະນາ, ເຮັດໃຫ້ປະເທດຊາດ ກໍ່ຄື ແຂວງຄຳມ່ວນທີ່ແສນຮັກຂອງພວກເຮົາ ມີຄວາມມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລຍິ່ງໆຂຶ້ນໄປ.


ຂໍໃຫ້ທຸກທ່ານ ຈົ່ງປະກອບສ່ວນເຮັດໃຫ້ ປີສະລຸ ພສ 2564 ເປັນປີແຫ່ງຄວາມສາມັກຄີອັນຍິ່ງໃຫຍ່, ເປັນປີແຫ່ງການເຊີດຊູມານະຈິດ ແລະ ອຸທິດຕົນ ເພື່ອຄວາມຢູ່ດີກິນດີຂອງປະຊາຊົນ ແລະ ຄວາມມັ່ງຄັ່ງເຂັ້ມແຂງ ຂອງປະເທດຊາດກໍ່ຄືແຂວງຄຳມ່ວນພວກເຮົາ. ໃນປີ ພສ 2564 ນີ້ ຂໍໃຫ້ທຸກໆທ່ານ ຈົ່ງມີໂຊກໃໝ່ໄຊງາມ, ໃຫ້ເປັນປີແຫ່ງຄວາມສຸກ- ຄວາມສົມຫວັງທຸກປະການ.