ມີເດຍລາວແຂວງເຊກອງ
ໃນວັນທີ 18 ມິຖຸນາ 2021 ນີ້ ,ທ່ານ ສຸພົນ ໄຊສະຫງ່າ ຮອງເຈົ້າເມືອງທ່າແຕງໄດ້ນຳເອົາເບ້ຍໄມ້ກິນໝາກ,ມອບໃຫ້ 6 ເຂດຈຸດສຸມພັດທະນາ,ໂດຍແມ່ນຫົວໜ້າ ແລະ ຮອງເຂດຈຸດສຸມພັດທະນາເປັນຜູ້ຮັບ. ທັງນີ້ ເພື່ອປະຕິບັດຕາມຄາດໝາຍສູ້ຊົນຂອງລັດຖະບານໃນການເຮັດໃຫ້ອັດຕາການປົກຫຸ້ມຂອງປ່າໄມ້ໃນ ສປປ ລາວ ກວມ 70% ຕາມທິດການພັດທະນາແບບຍືນຍົງ.

ທ່ານ ສຸພົນ ໄຊສະຫງ່າ ຮອງເຈົ້າເມືອງທ່າແຕງກ່າວວ່າ: ເບ້ຍໄມ້ທີ່ນຳມາມອບໃຫ້ຄັ້ງນີ້ແມ່ນໄດ້ຮັບການຊ່ວຍເຫຼືອຈາກບໍລິສັດຄູນມີໄຊ ຈຳນວນ 1.284 ເບ້ຍ ໂດຍປະກອບມີເບ້ຍໝາກມີ້ – ໝາກລຳໄຍລວມ ມູນຄ່າ 31 ລ້ານກວ່າກີບ ເຊິ່ງພາຍຫຼັງໄດ້ມອບແລ້ວແມ່ນໃຫ້ແຕ່ລະ ເຂດພັດທະນາເປັນຜູ້ແຈກຢາຍໃຫ້ຄອບຄົວທຸກຍາກໃນຈຳນວນ 42 ບ້ານ ,642 ຄອບຄົວທົ່ວເມືອງເປັນຜູ້ປູກແລະບົວລະບັດຮັກສາ ເພື່ອເປັນການສ້າງຂະບວນການ ແລະ ສ້າງບັນຍາກາດ ໃຫ້ແກ່ວັນເດັກນ້ອຍສາກົນ ທັງເປັນວັນປູກຕົ້ນໄມ້ແຫ່ງຊາດ ວັນທີ 01 ມິຖຸນາ 2021 ໃຫ້ມີຄວາມໝາຍເລິກເຊິ່ງ ແລະ ມີບັນຍາກາດເບີກບານມ່ວນຊື່ນ.

ທີ່ສຳຄັນ ແມ່ນເພື່ອຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ ທີ່ວ່າ: ສ້າງປະເທດລາວ ໃຫ້ເປັນພື້ນທີ່ສີຂຽວ, ມີສະເໜ່ ແລະ ສີວິໄລ. ພ້ອມດຽວກັນນັ້ນ, ກໍ່ເພື່ອເປັນການປົກປັກຮັກສາ ແລະ ອະນຸລັກ ພັນໄມ້ພື້ນບ້ານ ທີ່ມີຄຸນຄ່າ ໄວ້ໃຫ້ຄົນລຸ້ນຫຼັງ, ທັງເປັນການປັບປຸງ ທັດສະນີຍະພາບ, ສ້າງສະພາບແວດລ້ອມ ໃຫ້ມີຄວາມສວຍງາມ, ຮົ່ມເຢັນ. ຄຽງຄູ່ກັນນັ້ນ, ກໍ່ເປັນການສ້າງໂອກາດທີ່ດີ ໃຫ້ຫຼານນ້ອຍເຍົາວະຊົນ ແລະ ລູກຫຼານ ຜູ້ທີ່ຈະເປັນອະນາຄົດຂອງຊາດ. ຕິດພັນກັບ ການປູກຈິດສຳນຶກ ກ່ຽວກັບຄວາມສຳຄັນ ຂອງຕົ້ນໄມ້ ແລະ ການປົກປັກຮັກສາ ສິ່ງແວດລ້ອມທີ່ດີ ໃຫ້ມີຄວາມຍືນຍົງ.
ຂ່າວ: ແດນວົງວິຈິດ