ມີເດຍລາວແຂວງບໍ່ແກ້ວ
ທ່ານ ຫົງແກ້ວ ວິໄນວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງໆຫ້ວຍຊາຍ ພ້ອມດ້ວຍຄະນະ ໄດ້ເຄື່ອນໄຫວພົບປະຢ້ຽມຢາມ ແລະ ໂອ້ລົມປະຊາຊົນກຸ່ມບ້ານ ໂພນທອງ ໃນວັນທີ 11 ມິຖຸນານີ້, ໃຫ້ການຕ້ອນຮັບມີບັນດາຄະນະພັກ, ຜູ້ຊີ້ນຳກຸ່ມບ້ານ, ອົງການປົກຄອງບ້ານ, ອົງການຈັດຕັ້ງ, ເຖົ້າແກ່ແນວໂຮມ ແລະ ປະຊາຊົນບັນດາເຜົ່າເຂົ້າຮ່ວມ.
ທ່ານໄດ້ຮັບຟັງບົດລາຍງານຫຍໍ້ການເຄື່ອນໄຫວ, ດ້ານດີ, ດ້ານອ່ອນ ແລະ ທິດທາງແຜນ ການຕໍ່ໜ້າພາຍໃນກຸ່ມ ໄດ້ຍົກໃຫ້ເຫັນເຖິງຜົນງານ, ດ້ານດີອັນພົ່ນເດັ່ນຫຼາຍດ້ານ.

ພາຍໃນກຸ່ມບ້ານຍັງສືບຕໍ່ມີສະຖຽນລະພາບທາງດ້ານການເມືອງ, ພື້ນຖານໂຄງລ່າງໄດ້ຮັບການປັບປຸງແກ້ໄຂ, ປະຊາຊົນມີແນວຄິດອຸ່ນອ່ຽນທຸ່ນທ່ຽງ ເຊື່ອໝັ້ນຕໍ່ການຊີ້ນຳໆພາຂອງພັກ, ເຄົາລົບຕໍ່ລະບຽບກົດໝາຍຂອງລັດ ເຮັດໃຫ້ບ້ານມີຄວາມສະຫງົບປອດໄພດ້ວຍພື້ນຖານ, ສະພາບເສດຖະກິດ-ຊີວິການເປັນຢູ່ ຂອງປະຊາຊົນນັບມື້ນັບດີຂຶ້ນ. ພ້ອມນີ້ ບັນດາຜູ້ເຂົ້າຮ່ວມແມ່ນໄດ້ເຊື່ອມຊຶມມະຕິກອງປະຊຸມຄັ້ງທີ XI ຂອງສູນກາງພັກ, ມະຕິກອງປະຊຸມຄັ້ງທີ VI ຂອງອົງຄະນະພັກແຂວງບໍ່ແກ້ວ, ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງຫ້ວຍຊາຍ, ຄໍາແນະນຳຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ກ່ຽວກັບການອະນຸຍາດເດີນທາງເຂົ້າອອກແຂວງບໍ່ແກ້ວ, ການສືບຕໍ່ປະຕິບັດມາດຕະການປ້ອງກັນການລະບາດຂອງພະຍາດໂຄວິດ 19 ແຕ່ວັນທີ 5-19 ມິຖຸນາ ແລະ ບັນດາຄໍາສັ່ງແນະນຳຕ່າງຂອງຄະນະສະເພາະກິດຂັ້ນຕ່າງໆອີກຕື່ມ.

ເພື່ອໃຫ້ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈກ່ຽວກັບແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດກໍ່ຄືແນວທາງການຕ້ານ, ສະກັດກັ້ນ ການແຜ່ລະບາດຂອງພະຍາດໂຄວິດ 19 ຢ່າງເລິກເຊິງ. ຈາກນັ້ນ, ທ່ານໄດ້ຮັບຟັງການສະເໜີຄຳຄິດຄຳເຫັນຂອງປະຊາຊົນດ້ວຍຫຼາຍບັນຫາເປັນຕົ້ນແມ່ນ ການປັບປຸງການຈັດຕັ້ງພັກ, ອົງການປົກຄອງບ້ານທີ່ຄົບວາລະ, ຈັດສັນເນື້ອທີ່ດິນເພື່ອປູກອ້ອຍ, ມັນຕົ້ນ, ບັນຫາຜົນກະທົບຈາກການສໍາຫຼວດແລວເສັ້ນທາງດ່ວນບໍ່ແກ້ວ-ແຂວງຫຼວງນ້ຳທາ, ຢາເສບຕິດ, ຂີ້ລັກງັດແງະ, ພົນລະເມືອງເລື່ອນລອຍ, ການຊົດເຊີຍຜົນກະທົບຈາກໄພແຫ້ງແລ້ງໃນຊຸມປີຜ່ານມາ ແລະ ອື່ນໆ.

ໂອກາດນີ້, ທ່ານ ຫົງແກ້ວ ວິໄນວົງ ໄດ້ມີຄຳເຫັນສະແດງຄວາມຍໍຍ້ອງຊົມເຊີຍ ຕໍ່ຜົນສຳເລັດທີ່ກຸ່ມບ້ານຍາດມາໄດ້ ເນັ້ນໜັກ ເພີ້ມທະວີການຄົ້ນຄວ້າ, ກໍາແໜ້ນບັນດາເນື້ອໃນມະຕິກອງປະຊຸມຂອງພັກແຕ່ລະຂັ້ນໃຫ້ລະອຽດ, ຖືເອົາວຽກງານສຶກສາອົບຮົມການເມືອງ-ແນວຄິດ, ໃຫ້ປະຊາຊົນບັນດາເຜົ່າ ເຕົ້າໂຮມຄວາມສາມັກຄີປອງດອງເປັນສຳຄັນ ຕິດພັນກັບ ປະຕິບັດມາດຕະການເພື່ອປ້ອງກັນການລະບາດຂອງພະຍາດໂຄວິດ 19, ວຽກງານປ້ອງກັນຊາດ-ປ້ອງກັນຄວາມສະຫງົບ ເປັນກົກ ຍົກສູງການປຸກລະດົມໃຫ້ປະຊາຊົນຫັນມາປູກຝັງ-ລ້ຽງສັດໃຫ້ກາຍເປັນສິນຄ້າ ຈົ່ງພ້ອມກັນ ແກ້ໄຂບັນຫາປະກົດການຫຍໍ້ທໍ້ຕ່າງໆໃຫ້ຫຼຸດໜ້ອຍຖອຍລົງເທື່ອລະກ້າວ ແລະ ຈະນໍາເອົາທຸກການສະເໜີຂອງປະຊາຊົນໄປປຶກສາຫາລືນໍາໝູ່ຄະນະ ເພື່ອຊອກຫາແນວທາງການແກ້ໄຂໃນຕໍ່ໜ້າ.