ມີເດຍລາວແຂວງຫຼວງນ້ຳທາ
ວັນທີ 18 ມິຖຸນາ 2021 ນີ້, ທ່ານ ດຣ ອຸ່ນເຮືອນ ພຸດສະຫວັດ ຮອງຫົວຫນ້າພະແນກສາທາລະນະສຸກ ແຂວງຫລວງນໍ້າທາ ໄດ້ໃຫ້ຮູ້ວ່າ : ວັນແພດລາວແມ່ນວັນທີ່ມີຄວາມໝາຍເພື່ອລະນຶກເຖິງການກຳເນີດ, ການເຕີບໃຫຍ່ຂະຫຍາຍ ຕົວຂອງວຽກງານຮັກສາສຸຂະພາບ ຂອງປະຊາຊົນບັນດາເຜົ່າ ແລະ ການພັດທະນາບຸກຄະລາກອນສາທາລະນະສຸກ, ໂດຍສະເພາະ ເພື່ອຈາລຶກບຸນຄຸນຕໍ່ແພດໝໍ ແລະ ພະນັກງານສາທາລະນະສຸກລາວ ທີ່ໄດ້ເສຍສະຫຼະ, ອຸທິດສະຕິປັນຍາ ແລະ ເຫື່ອແຮງເປັນເຈົ້າການໃນການປະຕິບັດໜ້າທີ່ໃນແຕ່ລະໄລຍະ.

ວັນແພດລາວໄດ້ສ້າງຕັ້ງຂຶ້ນໃນວັນທີ 18 ມິຖຸນາ ອັນເປັນຂີດໝາຍແຫ່ງການກໍາເນີດຂອງວັນແພດລາວ ແລະ ເຮັດໃຫ້ພົນລະເມືອງລາວບັນດາເຜົ່າທຸກຊັ້ນຄົນ ເຫັນໄດ້ການເຕີບໃຫຍ່ຂະຫຍາຍຕົວຂອງວຽກງານສາທາລະນະສຸກ ໃນຖັນແຖວແພດໝໍລາວ ແຕ່ລະໄລຍະ, ເຊິ່ງມີຄວາມໝາຍສໍາຄັນຕໍ່ບັນດາແພດໝໍ ແລະ ພະນັກງານສາທາລະນະສຸກທັງໝົດ, ໃຫ້ເຫັນໄດ້ບົດບາດຄວາມສໍາຄັນ, ຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບການມອບໝາຍ ແລະ ເພື່ອປັບປຸງສ້າງຕົນເອງໃຫ້ມີຄວາມຮູ້, ຄວາມສາມາດ, ຈັນຍາທໍາ ແລະ ຈັນຍາບັນວິຊາຊີບ ໃນການຮັບໃຊ້ປະຊາຊົນບັນດາເຜົ່າຢ່າງກ້ວາງຂວາງຈາກຕົວເມືອງສູ່ຊົນນະບົດ
ຮ່າງໄກສອກຫຼີກ.

ທ່ານ ດຣ ອຸ່ນເຮືອນ ພຸດສະຫວັດ ຍັງກ່າວຕື່ມວ່າ: ສະເພາະແຂວງຫຼວງນໍ້າທາ ພະແນກສາທາລະນະສຸກກໍ່ຄືວຽກງານ ສາທາລະນະສຸກແຂວງໄດ້ສ້າງຕັ້ງຂື້ນໃນວັນທີ 18 ມີຖຸນາ ປີ 1966 ຊື່ງໄດ້ແຍກຕົວອອກຈາກເສນາຮັກທະຫານແຂວງ, ໂດຍເຫັນໄດ້ຄວາມສໍາຄັນ ສຸຂະພາບຂອງປະຊາຊົນບັນດາເຜົ່າ ຈີ່ງໄດ້ມີການເຕີບໃຫຍ່ຂະຫຍາຍຕົວເປັນກ້າວໆ, ໄດ້ສົ່ງເສີມໃຫ້ມີການບໍລິການສຸຂະພາບ ແມ່, ເດັກເກີດໃໝ່ ແລະ ເດັກນ້ອຍ, ເພື່ອຮັບປະກັນ ເດັກເກີດລອດ, ແມ່ປອດໄພ, ເອົາໃຈໃສ່ຊຸກຍູ້ການວາງແຜນຄອບຄົວເພື່ອຫຼຸດຜ່ອນການຕາຍຂອງແມ່ ແລະ ເດັກ, ໄດ້ສຸມໃສ່ນໍາພາຈັດຫານໍ້າດື່ມ, ນໍ້າໃຊ້ໃຫ້ປະຊາຊົນເຂດຫ່າງໄກຊອກຫຼີກ, ເຝົ້າລະວັງການລະບາດຂອງພະຍາດຕາມລະດູການ, ໄດ້ເອົາໃຈໃສ່ຍົກລະດັບຄວາມຮູ້, ຄວາມສາມາດຂອງແພດໝໍແຕ່ລະຂັ້ນໃຫ້ມີຄວາມຊໍານານໃນການບໍລິການປິ່ນປົວຄົນເຈັບໃຫ້ມີຄຸນນະພາບ ແລະ ປະສິດທິຜົນ, ປັດຈຸບັນພະແນກສາທາລະສຸກແຂວງໄດ້ປະຕິບັດ ສອງຍຸດທະສາດໃຫຍ່ຄື : ຍຸດທະສາດກັນ ແລະ ສົ່ງເສີມສຸຂະພາບ, ຍຸດທະສາດປີ່ນປົວ ແລະ ຟື້ນຟູຫນ້າທີ່ການໃຫ້ ແກ່ຄົນເຈັບ. ໄດ້ຫັນຈາກສອງຍຸດທະສາດໃຫຍ່ມາເປັນ 8 ແຜນງານ, ທົ່ວແຂວງມີພະນັກງານສາທາລະນະສຸກທັງໝົດ 820 ຄົນ, ຍີງ 495 ຄົນ ແລະ ໄດ້ເອົາໃຈໃສ່ ແຕ່ລະດ້ານຂອງວຽກງານ,

ເຊີ່ງໃນໄລຍະນີ້ແມ່ນວຽກປ້ອງກັນ, ຄວບຄຸມພະຍາດຕິດຕໍ່ ແລະ ເຝົ້າລະວັງ , ມີການຮ່ວມມືເຝົ້າລະວັງພະຍາດຊາຍແດນ ກັບ ສປຈີນ ເນື່ອງຈາກມີການລະບາດຂອງພະຍາດ ໂຄວິດ-19 ແຕ່ຕົ້ນປີ 2020 ເປັນຕົ້ນມາ ທາງພະແນກສາທາລະນະສຸກແຂວງກໍ່ໄດ້ສົມທົບກັບບັນດາຂະແໜງການຂັ້ນແຂວງ, ເມືອງ ໄດ້ເອົາໃຈໃສ່ໃນການສະກັດກັ້ນການລະບາດຂອງພະຍາດດັ່ງກ່າວ, ໄດ້ໂຄສະນາເຜີຍແຜ່ໃຫ້ຄວາມຮູ້ໃນການປ້ອງກັນ. ການກຽມຄວາມພ້ອມຂອງການເກີດລະບາດ ເຊັ່ນ: ທາງດ້ານບຸກຂະລາກອນ, ສະຖານທີ່ຮອງຮັບປິ່ນປົວ ພ້ອມຢາ ແລະ ອຸປະກອນການແພດ, ເລີ່ມແຕ່ການລະບາດຂອງພະຍາດໂຄວິດ-19 ແຕ່ປີ 2020 ເປັນຕົ້ນມາ ໄດ້ຮັບຄົນເຂົ້າສູນກັກກັນຂອງລັດທັງໝົດ ສະສົມ ຄົນເຂົ້າມາທັງໝົດ ມີ 1.881 ຄົນ , ຍີງ 1.189 ຄົນ ( ຄົບກໍານົດ 14 ວັນໝົດ ) , ຢູ່ໃນສູນປັດຈູບັນມີໜ້າ 64 ຄົນ, ຍີງ 37 ຄົນ ຜູ້ຕິດເຊື້ອເດີນທາງມາຈາກບ່ອນອື່ນ 6 ຄົນ(ຄົນລາວ 6 ຄົນ,ຍິງ 4 ຄົນ )ລວມທັງໝົດ 10 ຄົນ ໃນນີ້ໄດ້ປິ່ນປົວຫາຍດີແລ້ວ 9 ຄົນ, ຍັງສືບຕໍ່ປິ່ນປົວ 1 ຄົນ. ນອກນີ້ຍັງໄດ້ເອົາໃຈໃສ່ຈັດຕັ້ງປະຕິບັດການໃຫ້ວັກຊີນກັນພະຍາດ ໂຄວິດ-19 ໄດ້ 2 ຮອບ, ມີຈໍານວນຜູ້ໄດ້ຮັບວັກຊີນເຂັມທີ່ 1 ທັງໝົດ 19.033 ຄົນ,ເຂັມທີ່ 2 ທັງໝົດ: 15.544 ຄົນ, ເທົ່າ 8,04 % ຂອງປະຊາກອນແຂວງຫລວງ
ນໍ້າທາທັງໝົດ ແລະ ຈະສືບຕໍ່ສັກຜູ້ທີ່ຍັງບໍ່ທັນຄົບມີ 3.323 ຄົນຕື່ມອີກ.
ຂ່າວ: ສົມພອນ ຂຸນດາວົງ