ໃນທ້າຍອາທິດທີ່ຜ່ານມານີ້ ທ່ານ ທາເກວາກະ ເຄໂຊ ເອກອັກຄະລັດຖະທູດຜູ້ມີອຳນາດເຕັມ ແຫ່ງປະເທດຍີ່ປຸ່ນ ປະຈໍາສປປ ລາວ ພ້ອມດ້ວຍຄະນະໄດ້ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ ໂອກາດນີ້ທ່ານ ທູດພ້ອມຄະນະກໍ່ໄດ້ເຂົ້າຢ້ຽມ ແລະ ພົບປະກັບທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຜົ້ງສາລີ ຢູ່ທີ່ຫ້ອງຮັບແຂກຂອງຫ້ອງວ່າການແຂວງ, ໂອກາດນີ້ ທ່ານ ເຈົ້າແຂວງໆຜົ້ງສາລີ ກໍ່ໄດ້ກ່າວສະແດງຄວາມຕ້ອນຮັບ ແລະ ຕິລາຄາສູງຕໍ່ການມາເຄື່ອນໄຫວ ຂອງທ່ານທູດພ້ອມດ້ວຍຄະນະໃນຄັ້ງນີ້ ເຊີ່ງມັນໄດ້ສະແດງໃຫ້ເຫັນເຖີງສາຍພົົວພັນ ແລະ ການຮ່ວມມືອັນດີງາມຂອງສອງຊາດລາວ-ຍີ່ປຸ່ນ ເວົ້າລວມ ເວົ້າສະເພາະແມ່ນແຂວງຜົ້ງສາລີ ກັບ ສະຖານເອກອັກຄະລັດຖະທູດຍີ່ປຸ່ນ ປະຈຳສປປ ລາວ ນັບມື້ຍິ່ງແໜ້ນແຟ້ນຂື້ນເລື້ອຍໆ.

ພ້ອມກັນນັ້ນທ່ານ ເຈົ້າແຂວງຍັງໄດ້ລາຍງານກ່ຽວກັບການພັດທະນາເສດຖະກິດ-ສັງຄົມ ຂອງແຂວງໃນໄລຍະທີ່ຜ່ານມາໂດຍຫຍໍ້ໃຫ້ທ່ານ ເອກອັກຄະລັດຖະທູດແຫ່ງ ປະເທດຍີ່ປຸ່ນ ປະຈຳສປປ ລາວ ພ້ອມດ້ວຍຄະນະຮັບຊາບ ເຊີ່ງທົ່ວແຂວງຜົ້ງສາລີມີ 7 ເມືອງ, 59 ກຸ່ມບ້ານ, 515 ບ້ານ, 35.255 ຄອບຄົວ, ພົນລະເມືອງ 189.898 ຄົນ, ປະກອບມີ 15 ເຜົ່າ, 34 ແຊງ, ໃນປີ 2020 GDP ຂະຫຍາຍຕົວໃນລະດັບ 5,1%, ລວຍຍອດຜະລິດຕະພັນພາຍໃນສະເລ່ຍໃສ່ຫົວຄົນບັນລຸໄດ້ 988 ໂດລາ ສຳລັບແຂວງຜົ້ງສາລີໄດ້ຮັບການຊ່ວຍເຫຼື່ອຈາກລັດຖະບານ ແລະ ປະຊາຊົນຍີ່ປຸ່ນ ໂດຍທາງກົງ ແລະ ທາງອ້ອມ ໃນຫຼາຍໂຄງການ ແລະ ມີມູນຄ່າມະຫາສານ ເປັນຕົ້ນແມ່ນໂຄງການກໍ່ສ້າງເຂື່ອນໄຟຟ້ານຳຕົກຂະໝາດນ້ອຍ 110 ກິໂລວັດ, ຢູ່ເຂດນໍ້າງາ, ເມືອງໃໝ່ , ມູນຄ່າ 10 ລ້ານໂດລາ, ຊ່ວຍກໍ່ສ້າງຫໍພັກ ແລະ ໂຮງຮຽນໃຫ້ແກ່ 3 ເມືອງ 9 ຫຼັງ ມີມູນຄ່າ 234.326 ໂດລາ, ໂຄງການກໍ່ສ້າງໄຟຟ້ານໍ້າຄົກຂະໜາດນ້ອຍ 450 ກິໂລວັດ, ທີ່ບ້ານພໍ້, ເມືອງຍອດອູ ມີມູນຄ່າ 17 ລ້ານໂດລາ, ຊ່ວຍກໍ່ສ້າງສຸກສາລາຢູ່ເຂດຊຸມຊົນ ບ້ານມູຈີ່ຫວ້ຍຊານ ມີມູນຄ່າ 107.107 ໂດລາ, ສຸກສາລາບ້ານລອງນາຍເກົ່າ ມີມູນຄ່າ, 97.097 ໂດລາ ນອກຈາກນີ້ກໍ່ຍັງມີການຊ່ວຍເຫຼື່ອອື່ນໆ ອີກຈຳນວນໝື່ງ ເປັນຕົ້ນແມ່ນການພັດທະນາດ້ານສາທາລະນະສຸກ ແລະ ການພັດທະນາຊັບພະຍາກອນມະນຸດ.

ພ້ອມນັ້ນທ່ານ ເອກອັກຄະລັດຖະທູດແຫ່ງ ປະເທດຍີ່ປຸ່ນ ປະຈຳ ສປປ ລາວ ກໍ່ໄດ້ກ່າວສະແດງຄວາມຂອບໃຈຕໍ່ທ່ານເຈົ້າແຂວງຜົ້ງສາລີ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ທ່ານ ທູດ ກໍ່ໄດ້ລາຍງານກ່ຽວກັບຈຸດປະສົງຫຼັກຂອງການມາເຄື່ອນໄຫວໃນຄັງນີ້ໃຫ້ທ່ານເຈົ້າແຂວງຮັບຊາບ ພາຍຫຼັງທີ່ທ່ານ ທາເກວາກະ ເຄໂຊ ເອກອັກຄະລັດຖະທູດຜູ້ມີອຳນາດເຕັມແຫ່ງປະເທດຍີ່ປຸ່ນ ປະຈໍາສປປ ລາວ ພ້ອມດ້ວຍຄະນະພົບປະກັບທ່ານເຈົ້າແຂວງສຳເລັດແລ້ວ ກໍ່ໄດ້ເດີນທາງໄປເຄື່ອນໄຫວຢ້ຽມຊົມສວນຊາ 400 ກ່ວາປີ ຢູ່ບ້ານກໍແມນ ຍັງໄດ້ໄປກຣາບໄຫວ້ ແລະ ທ່ຽວຊົມພະທາດມີ່ງຂວັນພູຟ້າ ເຊີ່ງເປັນພະທາດຄູ່ບ້ານຄູ່ເມືອງຂອງຊາວເມືອງຜົ້ງສາລີມາແຕ່ດົນນານ, ທ່ຽວຊົມຫັດຖະກຳສິນຄ້າໂອດ໋ອບ ຂອງແຂວງຜົ້ງສາລີຕື່ມອີກ.
ພາບ – ຂ່າວ: ແສງຄຳ ສາລີວັນ