ລະຫວ່າງວັນທີ 14 ມີນາ 2021 ທີ່ສະໜາມບິນທະຫານແຂວງ ທ່ານ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກ-ເຈົ້າແຂວງຫຼວງພະບາງ ພ້ອມດ້ວຍຄະນະ ແລະ ການນໍາຂອງແຂວງ ໄດ້ຕ້ອນຮັບທ່ານ ໄຊສົມພອນ ພົມວິຫານ ກົມການເມືອງສູນກາງພັກ ປະທານສູນກາງແນວລາວສ້າງຊາດ ແລະ ພັນລະຍາ ພ້ອມດ້ວຍຄະນະ,ມີທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ແລະ ພະນັກງານ ຕິດຕາມ. ຈາກນັ້ນ ກໍໄດ້ເດີນທາງໄປບ້ານປາກອູ ເມືອງປາກອູ ແລະ ຂີ່ເຮືອຂື້ນໄປຕາມລໍານໍ້າຂອງ ເພື່ອສໍາຫຼວດ, ຕິດຕາມກວດກາການດໍາເນີນງານ ໂຄງການກໍ່ສ້າງເຂື່ອນໄຟຟ້ານໍ້າຂອງຕອນເໜືອ ທີ່ເມືອງປາກອູ ຫຼື ເຂື່ອນໄຟຟ້າຈຸດແຂວງຫຼວງພະບາງ ໂດຍການຕ້ອນຮັບຈາກທ່ານ ທໍາມະນູນ ສຸລະລັດ ຜູ້ຈັດການບໍລິສັດຊໍການຊ່າງລາວ ຈໍາກັດ ໂຄງການກໍ່ສ້າງເຂື່ອນນໍ້າຂອງ ແລະ ຄະນະ.


ໂຄງການເຂຶ່ອນໄຟຟ້ານໍ້າຂອງ ຈຸດແຂວງຫຼວງພະບາງ ມີເປົ້າໝາຍຈະດໍາເນີນການຂາຍໄຟໃນຊ່ວງສິ້ນປີ 2027 ເຊິ່ງມີເວລາພຽງ 7 ປີຈາກນີ້,ປັດຈຸບັນໄດ້ສໍາເລັດກໍ່ສ້າງພື້ນຖານໂຄງລ່າງຕ່າງໆຄື: ໄດ້ກໍ່ສ້າງເສັ້ນທາງບໍລິການເຂົ້າ-ອອກ ຈາກບ້ານຫາດຍາ ໄປຫາຂົວຂ້າມແມ່ນໍ້າຂອງແຫ່ງໃໝ່ສໍາເລັດ 98,57% (ກວ້າງ 9.00 ແມັດ, ຍາວ 11.673 ກິໂລແມັດ), ຂົວຂ້າມນໍ້າຂອງ 41,39% (ກວ້າງ 9.00 ແມັດ, ຍາວ 500 ແມັດ). ທ່າເຮືອຊົ່ວຄາວມີ 3 ຈຸດ ຄື: ບ້ານຄົກແສງສຸລິຍາ,ມ່ວງແກ້ວ ແລະບ້ານຖິ່ນໂຮງ 100%. ລະບົບສາຍສົ່ງ 115 KV / 22 KV ແລະ ສະຖານີໄຟຟ້າຍ່ອຍ 64,48%. ແຫຼ່ງຫີນ, ແຫຼ່ງຊາຍແມ່ນໍ້າຂອງ ແລະ ການພັດທະນາພື້ນທີ່ 98.74%, ທີ່ພັກບຸກຄະລະກອນ, ລະບົບໄຟຟ້າ-ປະປາ ແລະ ສິ່ງອໍານວຍຄວາມສະດວກວຽກກໍ່ສ້າງ 99.82%.ພາບລວມຄວາມຄືບຫນ້າທັງໝົດ 80.99%. ນອກຈາກນີ້ ຍັງມີວຽກປະຊາສໍາພັນເຊັ່ນ: ຈ່າຍເງິນຊົດເຊີຍໃຫ້ເຂດທີ່ໄດ້ຮັບຜົນກະທົບຂອງປະຊາຊົນແລ້ວ 69.40 %, ເຮັດໜັງສືສະເໜີຂໍອະນຸມັດຂໍ້ຕົກລົງຮັບຮອງຊັບສິນ 28.76 %, ຂັ້ນຕອນການເກັບກໍາຂໍ້ມູນ ແລະ ສັງລວມຊັບສິນ 1.83% ສໍາລັບການຈັດການທີ່ພັກອາໄສຖືກຫລັກສຸຂະອານາໄມ. ການຈັດຫານໍ້າດຶ່ມ, ນໍ້າໃຊ້ທີ່ສະອາດ ແລະ ພຽງພໍ ການຈັດການຂີ້ເຫຍື້ອພາຍໃນແຄ້ມ ແລະ ຫ້າມລ້ຽງສັດທຸກຊະນິດ ສໍາລັບມາດຕະການປ້ອງກັນ ໂຄວິດ-19 ກໍໄດ້ປະຕິບັດຕາມການແຈ້ງການຂອງລັດຖະບານລາວຢ່າງເຂັ້ມງວດ, ໄດ້ຕັ້ງຈຸດກວດກາ 8 ຈຸດ, ພ້ອມກັນນີ້ກໍ່ຍັງຕິດຕາມ, ເຝົ້າລະວັງໂລກລະບາດ ຂອງພະຍາດໂຄວິດ-19 ພາຍໃນຂອບເຂດໂຄງການທີ່ຕົນເອງຜິດຊອບ ລວມທັງຜູ້ຮັບເໝົາໂຄງການຕື່ມອີກ.


ໂອກາດດັ່ງກ່າວ ທ່ານ ປອ ໄຊສົມພອນ ພົມວິຫານ ປະທານແນວລາວສ້າງຊາດ ກໍໄດ້ໃຫ້ທິດຊີ້ນໍາ ໂດຍກ່າວວ່າ: ໂຄງການດັ່ງກ່າວນີ້ເປັນໂຄງການໜຶ່ງ ທີ່ລັດຖະບານໃຫ້ຄວາມສໍາຄັນ ເປັນໂຄງການພັດທະນາເຂດລຸ່ມນໍ້າ ໂດຍສະເພາະແມ່ນການຜະລິດກະແສໄຟຟ້າ ແລະ ພັດທະນາພື້ນຖານໂຄງລ່າງ ພ້ອມນີ້ທ່ານກໍໄດ້ເນັ້ນໃຫ້ທາງໂຄງການຈົ່ງສືບຕໍ່ປະຕິບັດຄາດໝາຍທີ່ຄົງຄ້າງ,ຈົ່ງຄໍານຶງເຖິງຜົນກະທົບຕໍ່ສິ່ງແວດລ້ອມ, ຕໍ່ຊີວິດຂອງແຮງງານກໍ່ສ້າງ ແລະ ວິຊາການໃນການເຮັດວຽກ, ເຂັ້ມງວດຕໍ່ການປ້ອງກັນ ແລະ ສະກັັດກັ້ນ ພະຍາດໂຄວິດ-19 ເຊິ່ງຈະສົ່ງຜົນກະທົບຕໍ່ໂຄງການ.
ຂ່າວ: ເພັດສາຄອນ ສິມມະວົງ