ມີເດຍລາວແຂວງເຊກອງ ຂ່າວ: ສະຫຍາມ ຈັນທະສອນ ພາບ: ພອນ ບຸນອຸທິດ
ເມືອງທ່າແຕງ ແຂວງເຊກອງເອົາໃຈໃສ່ຢ່າງເຂັ້ມງວດໃນການປະຕິບັດມາດຕະການຄວບຄຸມ ແລະ ປ້ອງກັນພະຍາດໂຄວິດ 19 ເລີ່ມແຕ່ວັນທີ 22 ເມສາ 2021 ເຖິງປັດຈຸບັນໂດຍລວມແລ້ວບໍ່ມີຜູ້ຕິດເຊື້ອ.

ພັທ ແສງມະນີ ດາລາສິນ ຄະນະປະຈຳພັກເມືອງ ຫົວໜ້າກອງບັນຊາການທະຫານເມືອງທ່າແຕງພ້ອມດ້ວຍຄະນະສະເພາະກິດຄວບຄຸມ ແລະ ປ້ອງກັນພະຍາດໂຄວິດ 19 ຂັ້ນເມືອງໄດ້ລົງປຸກລະດົມຊຸກຍູ້ອຳນາດການປົກຄອງບ້ານ ແລະ ພໍ່ແມ່ປະຊາຊົນຢູ່ເຂດຈຸດສຸມພັດທະນາທີ 6 ດອນຊາ ໃນວັນທີ 6 ພຶດສະພາ 2021 ເພື່ອໃຫ້ສືບຕໍ່ຂະຫຍາຍເວລາຄວບຄຸມ ແລະ ປ້ອງກັນພະຍາດໂຄວິດ 19 ອອກຕື່ມອີກ 15 ວັນ ແຕ່ວັນທີ 6 – ວັນທີ 20 ພຶດສະພາ 2021.

ທ່ານ ກໍລະກັນ ບຸດສະບາ ຫົວໜ້າຫ້ອງການສາທາລະນະສຸກ ຮອງປະທານສະເພາະກິດຄວບຄຸມ ແລະ ປ້ອງກັນພະຍາດໂຄວິດ 19 ເມືອງທ່າແຕງໄດ້ຊີ້ແຈງໃຫ້ເອົາໃຈໃສ່ຢ່າງເຂັ້ມງວດໃນການປ້ອງກັນພະຍາດໂຄວິດ 19 ໂດຍປະຕິບັດຕາມແຈ້ງການຂອງນາຍົກ, ແຈ້ງການຂອງແຂວງ ແລະ ຂອງເມືອງພ້ອມທັງປະຕິບັດກວດກາເກັບກຳຄົນເຂົ້າ-ອອກຢ່າງລະອຽດຊັດເຈນ.

ໃນໂອກາດນີ້. ພັທ ແສງມະນີ ດາລາສິນ ໄດ້ຮຽກຮອງໃຫ້ອຳນາດການປົກຄອງເຂດຈຸດສຸມພັດທະນາທີ 6 ທຸກຂັ້ນເອົາໃຈໃສ່ເພີ່ມທະວີຄວາມຮັບຜິດຊອບຢ່າງເຄັ່ງຄັດຕໍ່ມາດຕະການປ້ອງກັນການແຜ່ລະບາດຂອງພະຍາດໂຄວິດ 19 ໂດຍຕິດພັນຂະບວນການປູກຕົ້ນໄມ້,ຕ້ານ ແລະ ສະກັດກັ້ນການບຸກລຸປ່າເພື່ອເຮັດໄຮ່ດ້ວຍຄວາມເປັນເຈົ້າການ.