ມີເດຍລາວແຂວງເຊກອງ ໃນ 26 ເມສາ 2021 ນີ້ ທີ່ສະໂມສອນເມືອງ,ໄດ້ຈັດກອງປະຊຸມເພື່ອປຶກສາຫາລືກ່ຽວກັບການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ -19,ໂດຍການເປັນປະທານຂອງທ່ານ ສົມເພັດ ເອີດລັດດາ ກຳມະການພັກແຂວງ,ເຈົ້າເມືອງໆທ່າແຕງ,ມີຄະນະກໍາມະການສະເພາະກິດປ້ອງກັນ ແລະຄວບຄຸມພະຍາດໂຄວິດ-19ຂັ້ນເມືອງ,ບັນດາພະແນກການອອ້ມຂ້າງເມືອງ ພ້ອມດ້ວຍ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ກໍລະກັນ ບຸດສະບາ ຫົວໜ້າຫ້ອງການສາທາລະນະສຸກເມືອງທ່າແຕງແຂວງເຊກອງລາຍງານວ່າ: ເຊີ່ງມາຮອດປະຈຸບັນຄະນະກໍາມະການສະເພາະກິດປ້ອງກັນ ແລະຄວບຄຸມພະຍາດໂຄວິດ-19ຂັ້ນເມືອງແມ່ນເອົາໃຈໃສ່ຍົກສູງຄວາມຮັບຜິດຊອບ ແລະຊອກທຸກວິທີທາງເພື່ອຕ້ານການລະບາດຂອງພະຍາດດັ່ງກ່າວ,ໂດຍໄດ້ມີການຕັ້ງດ່ານກວດກາຄົນເຂົ້າອອກລະຫວ່າງເມືອງຫາເມືອງ,ມີຈຸດກັ່ນກອງຄົນເຂົ້່າອອກຢູ່ 2 ຈຸດຄື: ຈຸດກັ່ນກອງບ້ານກົກພຸງໃຕ້ໄປຫາເມືອງສາລະວັນແຂວງສາລະວັນ, ຈຸດບ້ານຫຼັກຂາວ ໄປຫາເມືອງປາກຊ່ອງແຂວງຈໍາປາສັກ, ນອກນີ້ທາງຄະນະສະເພາະກິດຍັງໄດ້ເລັ່ງໃຫ້ພໍ່ແມ່ປະຊາຊົນບັນດາເຜົ່າທີ່ມີພີ່ນ້ອງທີ່ເດີນທາງຈາກແຂວງໄກ້ຄຽງຫຼື ຕ່າງ ປະເທດທີ່ີມີຄວາມສ່ຽງສູງ ຕ້ອງໄດ້ໃຫ້ມາລາຍງານຕໍ່ເຈົ້າໜ້າທີ່ ຢ່າງຮີບດ່ວນ ເພື່ອຈະໄດ້ນຳຕົວຜູ້ກ່ຽວມາກັກໄວ້ສູນກັກບໍລິເວນທີ່ທາງເມືອງ -ແຂວງຈັດຫາໃຫ້ ທັງນີ້ ເພື່ອຄວບຄຸມບໍ່ໃຫ້ພະຍາດດັ່ງກ່າວລະບາກແຜ່ອອກໄປຊະຊາຍ ແລະ ເພື່ອຄວາມປອດໄພຂອງທ່ານ ແລະ ຄອບຄົວທ່ານເອງ,ພ້ອມນີ້ ໄດ້ສົມທົບກັບກໍາລັງ ປກຊ – ປກສ ກວດກາ ຕາມຊາຍແດນ ເພື່ອປ້ອງກັນບໍ່ໃຫ້ມີຄົນລັກລອບເຂົ້າມາແບບບໍ່ຖືກຕ້ອງ, ພ້ອມທັງໄດ້ຜ່ານແຈ້ງການເພີ່ມເຕີມຂອງທ່າເຈົ້າແຂວງ,ສະບັບເລກທີ 20/ຈຂ,ຊກ,ລົງວັນທີ 25/04/201 ເລື່ອງ: ເພີ່ມທະວີການມາດຕະການປ້ອງກັນ ແລະ ຄວບຄຸມ,ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ທົ່ວແຂວງເຊກອງ.

ໃນໂອກາດນີ້,ທ່ານ ສົມເພັດ ເອີດລັດດາ ກຳມະການພັກແຂວງ,ເຈົ້າເມືອງໆທ່າແຕງ ໄດ້ສະແດງຄວາມຊົມເຊີຍ ແລະ ຕີລາຄາສຸງ ຕໍ່ຄະນະກໍາມະການສະເພາະກິດປ້ອງກັນ ແລະ ຄວບຄຸມພະຍາດໂຄວິດ-19ຂັ້ນເມືອງ ແລະ ທຸກພາກສ່ວນທີ່ກ່ຽວຂ້ອງທີ່ໄດ້ປະຕິບັດໜ້າທີ່ ແລະ ຄວາມຮັບຜິດຊອບຂອງຕົນ ເພື່ອປະເທດຊາດ ແລະ ປະຊາຊົນ ດ້ວຍຄວາມເປັນເຈົ້າການ,ທັງໄດ້ເນັ້ນໃຫ້ສືບຕໍ່ປະຕິບັດໜ້າທີ່ ອັນໜັກໜ່ວງດັ່ງກ່າວ ໄປຈົນກ່ວາຈະມີຄໍາສັ່ງປ່ຽນແປງ ເພາະວ່າ ຕົວເລກຜູ້ຕິດເຊື້ອພະຍາດນັບມື້ເພີ່ມຂຶ້ນ ແລະ ຖ້າມີຄວາມຈໍາເປັນ ຈະໄດ້ໃຊ້ມາດຕະການເຂັ້ມງວດຂຶ້ນຕື່ມ, ດັ່ງນັ້ນ ໃຫ້ພ້ອມກັນສຸມໃສ່ບັນດາກຸ່ມສ່ຽງ ເພື່ອພ້ອມກັນແກ້ໄຂໃຫ້ທັນການ; ໃຫ້ເພີ່ມທະວີການກວດກາລາດຕະເວນ ຢ່າງເຂັ້ມງວດ ເພື່ອສະກັດກັ້ນການເຂົ້າເມືອງບໍ່ຖືກຕ້ອງຕາມກົດໝາຍ; ເອົາໃຈໃສ່ໂຄສະນາເຜີຍແຜ່ ຜົນຮ້າຍຂອງພະຍາດໂຄວິດ-19 ຜ່ານສື່ຕ່າງໆທາງໂທລະໂຄ່ງ-ວິທະຍຸ-ເຟດບຸກຂອງເມືອງ ແລະ ໂທລະໂຄ່ງຂອງບ້ານ ຢ່າງປົກກະຕິ ເພື່ອໃຫ້ປະຊາຊົນ ເຂົ້າໃຈ, ພ້ອມທັງ ແນະນຳວິທີປ້ອງກັນ ແລະ ຮັກສາຕົນເອງ ໂດຍສະເພາະ ການປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ຢ່າງເຂັ້ມງວດ, ເຂົ້າຮ່ວມຂະບວນການຕ້ານພະຍາດດັ່ງກ່າວ ຢ່າງແຂງແຮງ ລວມທັງ ໄປສັກຢາວັກຊີນກັນພະຍາດໂຄວິດ-19 ເພື່ອຊ່ວຍຫລຸດຜ່ອນການແຜ່ລະບາດຂອງພະຍາດ ແລະ ເຮັດໃຫ້ຈຳນວນຜູ້ຕິດເຊື້ອພະຍາດ ຫລຸດລົງເປັນກ້າວໆ.