ມີເດຍລາວແຂວງໄຊສົມບູນ ຂ່າວ: ເຈີນ ແດນວົງວິຈິດ
ໃນກາງເດືອນມິນາ ນີ້ ຫ້ອງການແຜນການ ແລະການລົງທຶນ ຮ່ວມກັບຫ້ອງການ-ການເງິນເມືອງທ່າແຕງ ໄດ້ຈັດກອງປະຊຸມສະຫຼຸບວຽກງານແຜນການ- ການລົງທຶນ ແລະການເງິນ ປະຈໍາປີ 2020 ແລະວາງທິດທາງປະຈໍາປີ 2021 ຂຶ້ນຢູ່ທີ່ສະໂມສອນເມືອງ, ໂດຍການເປັນປະທານຂອງທ່ານ ສຸພົນ ໄຊສະຫງ່າ ຮອງເຈົ້າເມືອງໆທ່າແຕງ, ຜູ້ຊີນໍາວຽກງານເສດຖະກິດຂັ້ນເມືອງ, ມີຮອງເຈົ້າເມືອງ, ຮອງພະແນກ, ຫົວໜ້າຫ້ອງການຂັ້ນເມືອງ, ຫົວໜ້າໜ່ວຍງານ, ພ້ອມດ້ວຍການເງິນຂັ້ນບ້ານທົ່ວເມືອງເຂົ້າຮ່ວມ.


ທ່ານ ສຸພົນ ໄຊສະຫງ່າ ປະທານກອງປະຊຸມກ່າວວ່າ: ກອງປະຊຸມໃນຄັ້ງນີ້ ແມ່ນຈະໄດ້ຮັບຟັງການຜ່ານບົດສະຫລຸບຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໂດຍສະເພາະແມ່ນການເຕີບໂຕດ້ານເສດຖະກິດມະຫາພາກ,ສະພາບການລົງທຶນ ຂອງລັດ ໂດຍລວມໃນປີຜ່ານມາ, ສະພາບການຈັດຕັ້ງປະຕິບັດວຽກງານການຈັດເກັບລາຍຮັບງົບປະມານ, ການປະຕິບັດລາຍຈ່າຍງົບປະມານ ນອກນັ້ນ; ຍັງຈະໄດ້ຮັບຟັງການຜ່ານບົດແນະນໍາ ໃນການຈັດຕັ້ງປະຕິບັດວຽກງານແຜນການ-ການລົງທຶນ ແລະ ວຽກງານການເງິນ ປະຈໍາປີ 2021 ເພື່ອເປັນບ່ອນອີງ ໃນການຈັດຕັ້ງປະຕິບັດແຜນການ ຂອງຂະແໜງການ , ນອກຈາກນັ້ນ ບັນດາທ່ານ,ຍັງໄດ້ ພ້ອມກັນເອົາໃຈໃສ່ ຕິດຕາມ ແລະ ປະກອບຄຳຄິດ-ຄໍາເຫັນໃສ່ເນື້ອໃນດັ່ງກ່າວດ້ວຍຄວາມເປັນເຈົ້າການ ແລະ ຈິງໃຈ ເພື່ອເຮັດແນວໃດໃຫ້ວຽກງານແຜນການ-ການລົງທຶນ ແລະ ວຽກງານການເງິນ ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຢູ່ຂັ້ນເມືອງມີຄວາມເປັນເອກະພາບ, ມີປະສິດທິພາບ, ປະສິດທິຜົນສອດຄ່ອງ ແລະ ຍືນຍົງ ສາມາດບັນລຸໄດ້ຕາມຈຸດປະສົງເປົ້າໝາຍກໍຄືເນື້ອໃນຈິດໃຈ ຂອງມະຕິກອງປະຊຸມໃຫຍ່ຄັ້ງທີ VI ຂອງຄະນະບໍລິຫານງານພັກເມືອງທ່າແຕງວາງອອກໃຫ້ປະກົດຜົນເປັນຈິງ.