ມິເດຍລາວເມືອງທ່າແຕງ ແຂວງເຊກອງ ຂ່າວ: ເຈີນ ແດນວົງວິຈິດ ພິທີປິດຊຸດຝຶກອົບຮົມກົດໝາຍໄລຍະສັ້ນ 45 ວັນ ໃຫ້ແກ່ພະນັກງານຫລັກແຫລ່ງຂອງເມືອງຊຸດທີ II ໄດ້ຈັດຂຶ້ນໃນວັນທີ 2 ມີນາ 2021 ຢູ່ທີ່ສະໂມສອນເມືອງທ່າແຕງໂດຍການເປັນກຽດເຂົ້າຮ່ວມຂອງ ທ່ານ ແສງລາຕີ ຫຼອມຍະເດດ ຄະນະປະຈຳພັກເມືອງ,ມີທ່ານ ຄຳມິ່ງ ໄຊຍະຈັກຄະນະພະແນກຍຸຕິທຳແຂວງເຊກອງ, ມີບັນດາ ຫົວໜ້າຫົວໜ້າຫ້ອງການ, ຄະນະຮັບຜິດຊອບ, ຄູອາຈານ ແລະ ນັກຝຶກອົບຮົມເຂົ້າຮ່ວມ.

ທ່ານ ອະນຸຊາ ຈັນທະວີໄລ ຮອງຫົວໜ້າຫ້ອງການຍຸຕິທຳເມືອງທ່າແຕງໄດ້ລາຍງານຕໍ່ພິທີວ່າ: ການສອນແມ່ນໄດ້ປະຕິບັດຕາມໂຄງການຫຼັກສູດຂອງກະຊວງຍຸຕິທຳກຳນົດອອກຢ່າງຄົບຖ້ວນ ແລະ ຖືກຕ້ອງຕາມກຳນົດເວລາຢູ່ໃນຕາຕະລາງການສອນ – ການຮຽນຄື: ຫຼັກສູດການສອນ-ການຮຽນຊຸດນີ້ມີທັງໝົດ 34 ວິຊາ, ມີ 22,5 ໜ່ວຍກິດ, ມີ 360 ຊົ່ວໂມງ,ມີ 4 ກຸ່ມວິຊາຮຽນຄື: ກຸ່ມວິຊາທິດສະດີການເມືອງ – ການປົກຄອງ,ກຸ່ມວິຊາກົດໝາຍ,ກຸ່ມວິຊາວຽກງານຍຸຕິທຳຮາກຖານ ແລະ ກຸ່ມວິຊາເຕັກນິກການແຕ່ງເອກະສານ , ຜ່ານການຝຶກອົບຮົມຄັ້ງນີ້ ເຮັດໃຫ້ນັກຝຶກອົບຮົມມີຄວາມຮູ້ພື້ນຖານດ້ານກົດໝາຍຫລາຍຂຶ້ນກວ່າເກົ່າ ແລະ ສາມາດນຳເອົາບົດຮຽນດັ່ງກ່າວ ໄປເຮັດໜ້າທີ່ຊີ້ນຳໆພາການຄຸ້ມຄອງລັດຄຸ້ມຄອງເສດຖະກິດ – ສັງຄົມ ໃຫ້ມີຄວາມສອດຄ່ອງກົມກຽວໄປຕາມລັດຖະທຳມະນູນ ແລະ ກົດໝາຍ, ເປັນພື້ນຖານອັນສຳຄັນ ໃຫ້ແກ່ການສ້າງລັດແຫ່ງກົດໝາຍຂອງປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ,ທັງເປັນການຍົກລະດັບທາງດ້ານກົດໝາຍສາມາດບຸກທະລຸການພັດທະນາດ້ານຊັບພະຍາກອນມະນຸດ ແລະ ປະກອບສ່ວນເຂົ້າໃນວຽກງານ 03 ສ້າງອີກບາດກ້າວໜຶ່ງ, ເປັນການເສີມສ້າງນັກຝຶກອົບຮົມທາງດ້ານການເມືອງ – ແນວຄິດດ້ານວິຊາການກົດໝາຍ ແລະ ທາງດ້ານທັດສະນະຄວາມເປັນແບບຢ່າງ,ຍົກສູງ ແລະ ເຊີດຊູບົດບາດຄວາມສາມາດໃນການນຳພາຄຸ້ມຄອງໃຫ້ມີປະສິດທິພາບ ແລະ ມີປະສິດທິຜົນສູງຂຶ້ນຕື່ມອີກ.
ຜ່ານການປະເມີນຈາກໃບເກັບກ່ຽວຂອງນັກຝຶກອົບຮົມຈໍານວນ 44 ທ່ານ,ຍິງ 9 ທ່ານ ເຫັນວ່າມີຄວາມເຂົ້າໃຈ 80 % ຂື້ນໄປ ແລະ ມີເງື່ອນໄຂໄດ້ຮັບໃບຢັ້ງຢືນທ້ງໝົດ 100 %, ການຝຶກອົບຮົມຊຸດນີ້ສາມາດຈັດປະເພດດີມີຈຳນວນ 39 ທ່ານ,ຍິງ 9 ທ່ານ, ແລະ ປະເພດກາງ 5 ທ່ານ.