ມີເດຍລາວແຂວງເຊກອງ ຂ່າວ: ເຈີນ ແດນວົງວິຈິດ ວັນທີ 11 ມີນາ 2021 ຢູ່ທີ່ໂຮງໝໍຊຸມຊົນ ເມືອງທ່າແຕງແຂວງເຊກອງໄດ້ເປີດຂະບວນການສັກຢາວັກຊິນປ້ອງກັນພະຍາດໂຄວິດ – 19 ເຂັມທໍາອິດ ໃຫ້ກຸ່ມທີ່ມີຄວາມສ່ຽງສູງ ຮອບທີ 1 ,ມີ ຄະນະນຳຂັ້ນເມືອງ ນຳໂດຍ ທ່ານສົມເພັດ ເອີດລັດດາ ເຈົ້າເມືອງໆເມືອງທ່າແຕງ ພ້ອມຄະນະ,ມີພະນັກງານແພດໝໍ, ບຸກຄະລາກອນທີ່ມີຄວາມສ່ຽງ, ພະນັກງານທີ່ເຮັດວຽກຢູ່ດ່ານເຂົ້າ – ອອກເມືອງ,ພະນັກງານອໍານວຍຄວາມສະດວກຢູ່ຈຸດຈໍາກັດບໍລິເວນເຂົ້າຮ່ວມ.

ທ່ານ ກໍລະກັນ ບຸດສະບາ ຫົວໜ້າຫ້ອງການສາທາລະນະສຸກເມືອງທ່າແຕງ ທັງເປັນຮອງປະທານຄະນະສະເພາະກິດໄດ້ໃຫ້ຮູ້ວ່າ: ການສັກວັກຊິນປ້ອງກັນພະຍາດໂຄວິດ – 19 ແມ່ນເລັ່ງໃສ່ກຸ່ມເປົ້າໝາຍ 450 ຄົນເຊັ່ນ: ກຸ່ມບຸກຄະລາກອນທີ່ເປັນກຸ່ມສ່ຽງທີ່ຈະໄດ້ຮັບວັກຊິນ ປ້ອງກັນພະຍາດໂຄວິດ-19 ເຂັມທໍາອິດ ຄັ້ງນີ້ປະກອບມີ: ຄະນະນໍາຂອງເມືອງ, ພະນັກງານພະນັກງານແພດ – ໝໍ,ບັນດາຜູ້ໃຫ້ບໍລິການນັກທ່ອງທ່ຽວ,ເຈົ້າຂອງເຮືອນພັກ,ໂຮງແຮມ,ກຸ່ມຄົນທີ່ປະຕິບັດໜ້າທີ່ຕາມຈຸດຜ່ານດ່ານເຂົ້າ – ອອກເມືອງ ແລະ ຈະເລີ່ມຈັດຕັ້ງປະຕິບັດ ສັກວັກຊິນໃນວັນທີ 11 – 15 ມີນາ ເປັນຕົ້ນໄປ ແລະ ພາກສ່ວນອື່ນໆຕາມລໍາດັບ ທີ່ຈະໄດ້ຮັບວັກຊິນໂຄວິດ-19 ,ສ່ວນຮອບທີ 2 ແມ່ນຈະໄດ້ສັກໃນວັນທີ 4 – 8 ເມສາທີ່ຈະມາເຖິ່ງນີ້ ວັກຊິນທີ່ນໍາມາສັກໃຫ້ກຸ່ມສ່ຽງກ່ອນໝູ່ຄັ້ງນີ້ ເປັນວັກຊິນທີ່ລັດຖະບານລາວຊ່ວຍເຫຼືອ, ປັດຈຸບັນເມືອງທ່າແຕງແຂວງເຊກອງໄດ້ຮັບວັກຊິນກັນພະຍາດໂຄວິດ – 19 ທັງໝົດ 900 ໂດຼສ.