ເພື່ອເປັນການປະຕິບັດຕາມຄໍາສັ່ງເລກທີ 016/ຈນວ ລົງວັນທີ 19 ກັນຍາ 2021 ຂອງເຈົ້າຄອງນະຄອນຫຼວງວຽງຈັນ ວ່າດ້ວຍມາດຕະການການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຢູ່ນະຄອນຫຼວງວຽງຈັນ ເລີ່ມແຕ່ວັນທີ 19-30 ກັນຍາ 2021.

ນະຄອນຫຼວງວຽງຈັນ ໄດ້ເລີ່ມຕັ້ງດ່ານກວດກາ 24 ຊົ່ວໂມງ ຢູ່ຕາມຈຸດຕ່າງໆ ໃນເຂດ 7 ຕົວເມືອງ ຄື: ເມືອງຈັນທະບູລີ, ເມືອງສີໂຄດຕະບອງ, ເມືອງສີສັດຕະນາກ ແລະ ເມືອງໄຊເສດຖາ ແລະ ບາງສ່ວນໃນ 3 ເມືອງ ນອກຄື: ເມືອງໄຊທານີ (ປິດແຕ່ຂົວທ່າງອນເຂົ້າມາ), ເມືອງຫາດຊາຍຟອງ (ປິດແຕ່ສວນວັດທະນະທຳຊຽງຄວນເຂົ້າມາ), ເມືອງນາຊາຍທອງ (ປິດແຕ່ບ້ານສີເກີດເຂົ້າມາ) .

ສະນັ້ນ ຈື່ງຮຽກຮ້ອງມາຍັງນັກຂັບຂີ່, ຜູ້ໃຊ້ລົດໃຊ້ຖະໜົນ ເປັນຕົ້ນແມ່ນປະຊາຊົນ, ພະນັກງານ-ລັດຖະກອນ, ວິສາຫະກິດ, ອົງການຈັດຕັ້ງສາກົນ, ທະຫານ, ຕໍາຫຼວດ, ກໍາມະກອນ, ນັກຮຽນ, ນັກສຶກສາ, ຜູ້ປະກອບການ, ຊາວຕ່າງດ້າວ, ຜູ້ບໍ່ມີສັນຊາດ ແລະ ຊາວຕ່າງປະເທດ ທີ່ເຄື່ອນໄຫວຢູ່ ນະຄອນຫຼວງວຽງຈັນ ຫ້າມບໍ່ໃຫ້ອອກຈາກເຮືອນ ຫຼື ທີ່ພັກອາໄສ ເດີນທາງໄປ-ມາ ຢູ່ພາຍໃນນະຄອນຫຼວງວຽງຈັນ ຍົກເວັ້ນກໍລະນີທີ່ຈໍາເປັນເຊັ່ນ: ໄປຊື້ອາຫານ, ຊື້ຢາປົວພະຍາດ, ໄປໂຮງໝໍ ແລະ ໄປປະຕິບັດໜ້າທີ່ເທົ່ານັ້ນ.