ນັກຮົບສື່ມວນຊົນລາວເປັນກໍາລັງປະຈັນບານໃນສະໜາມຮົບແນວຄິດແລະວັດທະນະທໍາ,ເປັນເຄື່ອງມືທາງດ້ານການເມືອງ-ແນວຄິດຂອງບັນດາອົງການຈັດຕັ້ງໃນລະບົບການເມືອງເຊິ່ງມີພັກເປັນແກນນໍາແລະດໍາລົງບົດບາດໂຄສະນາ, ເຜີຍແຜ່ແນວທາງນະໂຍບາຍຂອງພັກແລະລັດໃນການພັດທະນາ, ປົກປັກຮັກສາປະເທດຊາດ, ພ້ອມນັ້ນຍັງເປັນເວທີຖະແຫຼງຂ່າວ ຊີ້ແຈງບັນຫາຕ່າງໆຂອງສັງຄົມທີ່ມີລັກສະນະສຶກສາອົບຮົມ, ລັກສະນະຕໍ່ສູ້, ລັກສະນະຊີ້ນໍາມະຫາຊົນແລະລັກສະນະຕົວຈິງ, ນອກນີ້ ຍັງມີໜ້າທີ່ຕອບໂຕ້-ຕອບຕ້ານທຸກເລ້ຫຼ່ຽມ, ກົນອຸບາຍຫັນປ່ຽນໂດຍສັນຕິຂອງອິດທິກໍາລັງປໍລະປັກແລະກຸ່ມຄົນບໍ່ດີທີ່ຫວັງທໍາລາຍຄວາມໝັ້ນຄົງຂອງຊາດ, ຄວາມສະຫງົບສຸກຂອງປະຊາຊົນ ແນໃສ່ປົກປັກຮັກສາໝາກຜົນຂອງການປະຕິວັດປະກອບສ່ວນເຂົ້າໃນການຈັດຕັ້ງປະຕິບັດ 2 ໜ້າທີ່ຍຸດທະສາດກໍ່ຄືການປ່ຽນແປງໃໝ່ຮອບດ້ານມີຫຼັກການຂອງພັກເຮົາ.

ປັດຈຸບັນນີ້, ຖັນແຖວນັກຂ່າວລາວ ໄດ້ປະຕິບັດໜ້າທີ່ໃນສື່ສິ່ງພິມ-ສື່ເອເລັກໂທຼນິກທີ່ສັງກັດຂັ້ນສູນກາງ ແລະທ້ອງຖິ່ນໃນທົ່ວປະເທດລວມທັງເຄື່ອນໄຫວຢູ່ຕ່າງປະເທດຈໍານວນໜຶ່ງໄດ້ປະຕິບັດໜ້າທີ່ລາຍງານຂ່າວ, ຜະລິດບົດແລະຮູບ-ສຽງອອກຢູ່ໜ້າໜັງສືພິມ, ວິທະຍຸ-ໂທລະພາບ, ເວັບໄຊ…ຕອບສະໜອງໃຫ້ຜູ້ບໍລິໂພກຂ່າວເຫັນໄດ້ຄວາມເປັນຈິງຂອງສັງຄົມຢ່າງຖືກຕ້ອງ, ທັນເຫດການ, ພ້ອມນັ້ນສື່ມວນຊົນຍັງເປັນເຄື່ອງມືອັນແຫຼມຄົມທີ່ສຸດໃນຈັດຕັ້ງປະຕິບັດໜ້າທີ່ການເມືອງຂອງພັກ, ເປັນສາຍໃຍແຫ່ງຄວາມຜູກພັນລະຫວ່າງພັກກັບປະຊາຊົນທັງເປັນຜູ້ນໍາເອົາຄວາມຄິດເຫັນ, ຄວາມມຸ້ງມາດປາຖະໜາອັນແຮງກ້າຂອງປະຊາຊົນສ່ອງແສງໃຫ້ພັກ-ລັດແລະມີບົດບາດໂຄສະນາ, ປຸກລະດົມຂົນຂວາຍຊຸກຍູ້ພະນັກງານ-ສະມາຊິກພັກ, ປະຊາຊົນທຸກເຜົ່າເຂົ້າໃນການຈັດຕັ້ງປະຕິບັດແນວທາງປ່ຽນແປງໃໝ່ຂອງພັກ, ສັນລະເສີນແບບຢ່າງວຽກດີ-ຄົນເດັ່ນ, ຍົກໃຫ້ເຫັນປັດໃຈ​ບົດຮຽນໃໝ່ທີ່ເກີດຂຶ້ນໃນຂະບວນການປົກປັກຮັກສາແລະພັດທະນາປະເທດຊາດ.

ໃນຕະຫຼອດໄລຍະຕໍ່ສູ້ກູ້ຊາດຕ້ານພວກລ່າເມືອງຂຶ້ນ ແລະໄລຍະສ້າງຊາດຜ່ານມາ; ບັນດານັກຂ່າວລ້ວນແຕ່ມີຄວາມພະຍາຍາມສູງໃນການປະຕິບັດໜ້າທີ່ຂອງຕົນ ຜ່ານແປວໄຟສົງຄາມຢ່າງດຸເດືອດ, ເຂດທຸລະກັນດານ, ຊົນນະບົດ-ຫ່າງໄກສອກຫຼີກ ແລະການສ້າງເສດຖະກິດ-ການຜະລິດຂອງປະຊາຊົນທ້ອງຖິ່ນຕ່າງໆໃນທົ່ວປະເທດຢ່າງຂະຫຍັນຂັນແຂງ ໂດຍໄດ້ມີການກະຈາຍຂ່າວ ທີ່ມີຄວາມຫຼາກຫຼາຍ-ມີເນື້ອໃນອຸດົມສົມບູນ ທີ່ສ່ອງແສງໃຫ້ເຫັນເຖິງການປົກປັກຮັກສາ ແລະສ້າງສາພັດທະນາປະເທດຊາດຕາມແນວທາງປ່ຽນແປງໃໝ່ຂອງພັກ ແລະແຜນພັດທະນາເສດຖະກິດສັງຄົມຂອງລັດຖະບານໃນແຕ່ລະໄລຍະ; ພ້ອມນັ້ນ, ຍັງໄດ້ນໍາເອົາຄວາມຄິດເຫັນທີ່ມີລັກສະນະສ້າງສັນ ແລະຄວາມເປັນຈິງຂອງສັງຄົມ, ການຈັດຕັ້ງປະຕິບັດແນວທາງການເມືອງ, ການທະຫານ, ເສດຖະກິດແລະການຕ່າງປະເທດຂອງພັກ, ການຈັດຕັ້ງຜັນຂະຫຍາຍເນື້ອໃນ 4 ບຸກທະລຸ, ການແກ້ໄຂຄວາມທຸກຍາກ, ວຽກງານ 3 ສ້າງ; ອັນພົ້ນເດັ່ນແມ່ນການເກາະຕິດສະຖານະການຂ່າວ ກ່ຽວກັບໄພພິບັດທາງທໍາມະຊາດ;ພະຍາດລະບາດ ໂດຍສະເພາະການແຜ່ລະບາດຂອງພະຍາດໂຄວິດ-19 ທ້າຍປີ 2019 ມາເຖິງປະຈຸບັນ; ສໍາລັບນັກຂ່າວຢູ່ທ້ອງຖິ່ນກໍ່ຕັດສິນໃຈຜ່ານຜ່າອຸປະສັກນາໆປະການບົນສະໜາມຮົບການຜະລິດ, ເຂດຫ່າງໄກສອກຫຼີກ, ພູຜາທີ່ສູງຊັນເພື່ອນໍາເອົາຄວາມຮູ້ສຶກ-ຜົນງານແລະການເຄື່ອນໄຫວສ້າງຊີວິດໃໝ່ຂອງປະຊາຊົນບັນດາເຜົ່າພາຍໃຕ້ການນໍາພາຂອງພັກແລະລັດ ມາສະເໜີໃຫ້ສັງຄົມແລະສາກົນຮັບຊາບ.

ເຖິງວ່າຈະມີຜົນສໍາເລັດອັນຫຼວງຫຼາຍ ແຕ່ມາເບິ່ງເບື້ອງຄຸນນະພາບແລະເນື້ອຫາສາລະບາງຄັ້ງຍັງເຮັດບໍ່ທັນດີ; ໃນຜ່ານມາຍັງເນັ້ນຂ່າວພິທີການຫຼາຍເກີນໄປ, ແຕ່ວຽກດີ-ຄົນເດັ່ນ, ໂຄງການ ແລະບຸກຄົນຕົວແບບ ຍັງມີຄວາມຈໍາກັດ ໃນນັ້ນວຽກດີ-ຄົນເດັ່ນ ແມ່ນເກືອບບໍ່ມີໃນໜ້າໜັງສືພິມ ຫຼື ສື່ເອເລັກໂທຼນິກ; ບົດ ແລະຂ່າວ ບໍ່ທັນດຶງດູດຄວາມສົນໃຈແລະບໍ່ທັນໃຫ້ຄຸນປະໂຫຍດເທົ່າທີ່ຄວນເປັນຕົ້ນບັນຫາຂໍ້ມູນຂ່າວສານບໍ່ຫຼາກຫຼາຍ, ຍັງຊັກຊ້າບໍ່ທັນເວລາ, ການໃຊ້ພາສາບໍ່ຖືກຕ້ອງ, ຮູບຈໍານວນໜຶ່ງບໍ່ທັນຄົມຊັດ, ມີການແກະຂ່າວ ຫຼື ນໍາເນື້ອຫາຈາກອິນເຕິແນັດ-ສື່ອອນລາຍໂດຍບໍ່ກັ່ນກອງ, ການສ່ອງແສງສະພາບຄວາມເປັນຈິງຂອງສັງຄົມບໍ່ກ້ວາງຂວາງ, ການຊອກເຫັນປັດໃຈໃໝ່, ວຽກດີ-ຄົນເດັ່ນ, ບັນດາບົດຮຽນທີ່ເກີດໃນວຽກງານຕົວຈິງຍັງເຮັດບໍ່ທັນດີເຮັດບໍ່ລຽນຕິດ, ສ່ວນຫຼາຍເວົ້າແຕ່ດ້ານດີ,ພັດບໍ່ເວົ້າຂໍ້ຄົງຄ້າງສາຍເຫດຂອງມັນແລະບໍ່ທັນຊີ້ໃຫ້ເຫັນວິທີແກ້ໄຂຢ່າງຈະແຈ້ງ,ພ້ອມນີ້ມີບາງຂະແໜງການແລະທ້ອງຖິ່ນຍັງບໍ່ເອົາຫົວຊານໍາວຽກງານສື່ມວນຊົນ,ບາງບ່ອນຊໍ້າພັດກວດກາເຂັ້ມງວດ,ລົງເລິກໃນອັນຍິກຍ່ອຍຂອງວິຊາການ,ວາງກົນໄກເຄັ່ງຄັດຫຼາຍຢ່າງ, ບາງບ່ອນພັດເອົາຄົນບໍ່ມີຄວາມຮູ້ແລະບໍ່ມີປະສົບການດ້ານສື່ມວນຊົນມາເປັນບັນນາທິການ ເຮັດໃຫ້ການດໍາເນີນວຽກອືດອາດ, ຊັກຊ້າ, ຂ່າວ-ບົດແຫ້ງແລ້ງ, ຈືດຈາງກ້າວໄປເຖິງສັງຄົມບໍ່ໃຫ້ຄວາມສົນໃຈ.

ຢືນຢູ່ຕໍ່ໜ້າສະພາບແວດລ້ອມສາກົນແລະພາກພື້ນທີ່ຜັນແປໄປຢ່າງວ່ອງໄວແລະສະຫຼັບສັບຊ້ອນ ເຊິ່ງໄດ້ເລັ່ງທວງໃຫ້ຖັນແຖວນັກຂ່າວລາວຕ້ອງມີທັດສະນະຫຼັກໝັ້ນການເມືອງຈະແຈ້ງ,ສະດຸ້ງໄວຕໍ່ສະພາບການ, ມີຄວາມຊໍານານໃນດ້ານວິຊາການ, ມັກຄົ້ນຄິດ-ຄົ້ນຄ້ວາແນວທາງແຜນນະໂຍບາຍຂອງພັກ, ກົດໝາຍແລະນິຕິກໍາກໍ່ຄືແຜນພັດທະນາເສດຖະກິດຂອງຊາດ, ຂອງທ້ອງຖິ່ນແລະບັນຫາອື່ນໆ, ພ້ອມນັ້ນ ຄະນະພັກ-ຄະນະນໍາທຸກຂັ້ນ ຕ້ອງເອົາໃຈໃສ່ຮອບດ້ານຕໍ່ສື່ມວນຊົນນັບທັງການນໍາພາການເມືອງແນວຄິດ, ພະລາທິການ-ປະກອບວັດຖຸເຕັກນິກ, ຍົກລະດັບດ້ານອື່ນໆແລະຕ້ອງເຂົ້າໃຈວ່າ:ນັກຂ່າວເປັນກະບອກສຽງອັນແຫຼມຄົມຂອງຕົນ, ສິ່ງສໍາຄັນນັກຂ່າວເອງກໍ່ຕ້ອງຍົກລະດັບຂ່າວສານໃນຍຸກປ່ຽນແປງໃໝ່ ໂດຍຕ້ອງກໍາແໜ້ນແນວທາງ ແລະມະຕິຕ່າງໆຂອງພັກ, ແຜນຂອງລັດຖະບານ, ຂະແໜງການ-ທ້ອງຖິ່ນ, ເພີ່ມຄວາມຮູ້ດ້ານການຂ່າວ, ວິຊາການສະເພາະດ້ານ, ພາສາຕ່າງປະເທດ, ໄອທີ…ໃຫ້ສູງຂຶ້ນ,ສ້າງແຮງສັດທາ, ສ້າງຄວາມໄວ້ເນື້ອເຊື່ອຖືຈາກປະຊາຊົນ ເຮັດໃຫ້ສົມກັບເປັນເຄື່ອງມືອັນແຫຼມຄົມຂອງພັກ-ລັດ, ເປັນເວທີຂອງມະຫາຊົນ, ເປັນສາຍໃຍຜູກພັນມະຫາຊົນກັບພັກ, ສ້າງຄວາມນິຍົມ, ຄວາມສົນໃຈດ້ວຍການນໍາເອົາຜົນປະໂຫຍດທາງກົງ ແລະທາງອ້ອມໃຫ້ຜູ້ອ່ານ, ຜູ້ຟັງແລະຜູ້ເບິ່ງໄດ້ຮັບຮູ້ທັນເວລາ; ດັ່ງທີ່ທ່ານ ທອງລຸນ ສີສຸລິດ ເລຂາທິການໃຫຍ່ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ, ປະທານປະເທດ ໄດ້ໃຫ້ທິດຊີ້ນໍາວ່າ: “ປາຖະໜາໃຫ້ນັກຮົບສື່ມວນຊົນລາວ ເປັນຜູ້ກ້າ ປາກອອກແສງ, ຜູ້ຮູ້ແທງຈິດໃຈ, ຜູ້ສະດຸ້ງໄວ ເມື່ອອ່ານ, ຜູ້ຮູ້ຜ່ານອຸປະສັກ, ຜູ້ທີ່ຮັກ ຄວາມຈິງ ແລະຜູ້ທີ່ຍິງຖືກເປົ້າ”.         

Medialaos MMD (ແຫຼ່ງຂໍ້ມູນຈາກ: ຣັດສະໝີ ດວງສັດຈະ)