ມີເດຍລາວແຂວງເຊກອງ
ນັກຮຽນມັດທະຍົມສົມບູນ ດອນຊາ ແລະ ນັກຮຽນມັດທະຍົມສົມບູນ ທ່າແຕງຫຼາຍຮ້ອຍຄົນໄດ້ເຊື່ອມຊຶມຜົນຮ້າຍຂອງຢາເສບຕິດ ໃນວັນທີ 5 ຕຸລາ 2021 ໂດຍມີ ທ່ານ ຄໍາສອນ ກອນເຍີ ຮອງເຈົ້າແຂວງເຊກອງ,ມີຄະນະກໍາມະການສ້າງໂຮງຮຽນປອດຢາເສບຕິດຂັ້ນແຂວງ ແລະ ເມືອງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ພຕ ນາງ ລັງ ໄຊມີວົງ ຮອງພະແນກກວດກາ ແລະ ຄວບຄຸມຢາເສບຕິດກອງບັນຊາການປ້ອງກັນຄວາມສະຫົງບແຂວງເຊກອງກ່າວວ່າ: ຢາເສບຕິດມີຜົນກະທົບຫຼາຍຕໍ່ຜູ້ເສບ ເມື່ອເສບເຂົ້າໄປແລ້ວຈະກະທົບຢ່າງຮຸນແຮງຕໍ່ຮ່າງກາຍ ແລະ ຈິດປະສາດ,ເຮັດໃຫ້ສະໝອງຖືກທໍາລາຍກາຍເປັນບ້າເສຍຈິດ,ຄົນທີ່ເສບຢາເສບຕິດຈະມັກໃຊ້ຄວາມຮຸນແຮງ,ທໍາລາຍຊີວິດ,ຊັບສິນຂອງຕົນເອງແລະຄົນອື່ນໆ.

ນອກຈາກນີ້ຢາເສບຕິດຍັງມີຜົນກະທົບຕໍ່ຄອບຄົວ ແລະ ສັງຄົມຊຶ່ງເຮັດໃຫ້ສັງຄົມເກີດມີສິ່ງຫຍໍ້ທໍ້ແລະອາດຊະຍາກໍາ,ທັງຂົ່ມຂູ່ຄວາມສະຫງົບສຸກ,ຄວາມເປັນລະບຽບຮຽບຮ້ອຍຂອງສັງຄົມ ແລະ ມີຜົນກະທົບຕໍ່ປະເທດຊາດ ໂດຍສົ່ງຜົນເຮັດໃຫ້ຊາວໜຸ່ມ – ຍິງໝຸ່ມ,ເຍົາວະຊົນທີ່ເປັນອະນາຄົດຂອງຊາດ,ຜູ້ທີ່ຕິດຢາເສບຕິດບໍ່ສາມາດປະກອບສ່ວນເປັນກໍາລັງແຮງໃນການສ້າງສາພັດທະນາປະເທດຊາດໄດ້,ທັງຜິດຕໍ່ກົດໝາຍວ່າດ້ວຍຢາເສບຕິດ,ກົດໝາຍອາຍາ,ເຊິ່ງນອກຈາກເຊືີອມຊຶມແລ້ວຍັງໄດ້ຮັບຊົມສາລະຄະດີກ່ຽວກັບຜົນຮ້າຍຂອງຢາເສບຕິດທີ່ສະທ້ອນໃຫ້ເຫັນພາບເຫດການທີ່ເຄີຍເກີດຂຶ້ນ ເພື່ອຫັວງໃຫ້ນັກຮຽນມີສະຕິເຄົາລົບກົດໝາຍ ,ມີຄວາມຕື່ນຕົວ ແລະ ເຂົ້າມາມີສ່ວນຮ່ວມໃນການປ້ອງກັນ ສະກັດກັ້ນ ແລະ ແກ້ໄຂບັນຫາຢາເສບຕິດຫຼືປະກົດການຫໍ້ຍທໍ້ໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ.
ພາບ – ຂ່າວ: ເຈີນ ແດນວົງວິຈິດ